ଅନୁଗୋଳ ଅଫିସ, ୧୬।୯: ଗୁରୁତର ଅବସ୍ଥାରେ ରବିବାର ମେଡିକାଲ ଆସିଥିବା ଜଣେ ଦେଢ ବର୍ଷର ଶିଶୁପୁତ୍ର ଚିକିତ୍ସା ପାଇ ନ ପାରିବାରୁ ତାହାର ମୃତ୍ୟୁ ଘଟିଥିବା ଅଭିଯୋଗ ହୋଇଛି। ମୃତ ଶିଶୁ କୁଇଓ ଜାମୁନାଳି ଅଞ୍ଚଳର ଶଙ୍କର୍ଷଣ ପ୍ରଧାନଙ୍କ ପୁଅ ସୁମନ ପ୍ରଧାନ ବୋଲି ଜଣାପଡିଛି। ଏହାକୁ ନେଇ କିଛି ସମୟ ମେଡିକାଲ ପରିସରରେ ଅପ୍ରୀତିକର ପରିସ୍ଥିତି ଦେଖାଦେଇଥିଲା।
ଶଙ୍କର୍ଷଣଙ୍କ ଅଭିଯୋଗ ମୁତାବକ, ପୁଅକୁ ଜ୍ୱର ହୋଇଥିବାରୁ ସକାଳ ପ୍ରାୟ ସାଢେ ୮ଟାରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। କିନ୍ତୁ ଲମ୍ବା ଧାଡ଼ି ଲାଗିଥିବାରୁ ଶିଶୁଟିକୁ ସେ ସଙ୍ଗେ ସଙ୍ଗେ ଡାକ୍ତରଙ୍କୁ ଦେଖାଇ ପାରି ନ ଥିଲେ। କାଜୁଆଲିଟି ଓ୍ବାର୍ଡରେ ଥିବା ସୁରକ୍ଷା କର୍ମୀ, ଡାକ୍ତର କର୍ମଚାରୀଙ୍କୁ ସେ ବାରମ୍ବାର ନେହୁରା ହୋଇଥିଲେ ହେଁ କେହି ନ ଶୁଣିବାକୁ ଠିକ୍ ସମୟରେ ଶିଶୁଟି ଚିକିତ୍ସା ପାଇପାରି ନ ଥଲା। ପ୍ରାୟ ଦେଢ ଘଣ୍ଟା ଧରି ଲାଇନରେ ଛିଡା ହେବାର ପରେ ଶିଶୁଟିର ମୃତ୍ୟୁ ଘଟିଥିବା ଶଙ୍କର୍ଷଣ ଅଭିଯୋଗ କରିଛନ୍ତି। ଏହା ପରେ ମଧ୍ୟ ଡାକ୍ତରଖାନା କର୍ମଚାରୀ ମୃତ ଶିଶୁର ବ୍ୟବଚ୍ଛେଦ ନ କରି ସେମିତି ମୃତଦେହ ନେଇଯିବାକୁ କହିଥିବା ଶଙ୍କର୍ଷଣ ପ୍ରକାଶ କରିଛନ୍ତି। ଏ ସମ୍ପର୍କରେ ଏଡିଏମ୍ଓ ମେଡିକାଲ ଲକ୍ଷ୍ମୀନାରାୟଣ ବିଶୋଇଙ୍କୁ ପଚାରିବାରେ କହିଛନ୍ତି, ମୋ ନିକଟକୁ ଏଭଳି କିଛି ଅଭିଯୋଗ ଆସିନାହିଁ। ଅଭିଯୋଗ ଆସିବା ପରେ ଅନୁଧ୍ୟାନ କରାଯିବ। ଏହା ସତ୍ୟ ହୋଇଥିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।