ମନୋଜ କୁମାର ବରାଳ ଓରଫ ଗୁଲସନ୍। ସ୍କୁଲରେ ପଢ଼ିବା ବେଳେ ଏକକ ଅଭିନୟ ତାଙ୍କ ମନରେ ଅଭିନୟର ଆଶା ଜାଗ୍ରତ କରିଥିଲା। କଲେଜରେ ପଢ଼ିବା ସମୟରେ ଡ୍ରାମାରେ ଅଭିନୟ କରି ନିଜ ଲକ୍ଷ୍ୟ ପଥରେ ଅଗ୍ରସର ହୋଇଥିଲେ ସେ। ୨୦୧୫ରେ ତାଙ୍କ କ୍ୟାରିୟରରେ ଆସିଥିଲା ଏକ ନୂଆ ମୋଡ଼। ଥିଏଟର ଜଗତରେ ପ୍ରବେଶ କରିଥିଲେ ମନୋଜ। ଅଗ୍ରଣୀ ଥିଏଟର ଅନୁଷ୍ଠାନ ଶତାବ୍ଦୀର କଳାକାର ଏବଂ ମିରର୍ ଥିଏଟର ଗ୍ରୁପ୍ରେ ସାମିଲ ହୋଇ ସେ ‘କିଙ୍ଗ୍ ଲିୟର, ପର କଲମ, ଯୋଦ୍ଧା, ଅର୍ଦ୍ଧନାରୀ, ବକ୍ସି ଜଗବନ୍ଧୁ, ଦେବୀ ଆଦି ପାଖାପାଖି ୪୦ଟି ଥିଏଟର ନାଟକରେ ନିଜ ଅଭିନୟ ଦକ୍ଷତା ଦେଖାଇଥିଲେ। ଏହି ସମୟରେ ତାଙ୍କର ସାକ୍ଷାତ୍ ହୋଇଥିଲା ଅପେରା ଜଗତର ନାମୀ ନିର୍ଦ୍ଦେଶକ ଲାଲା ବୀରେନ ରାୟଙ୍କ ସହ। ତାଙ୍କର କେଇ ପଦ କଥା ମନୋଜଙ୍କୁ ବେଶ୍ ପ୍ରଭାବିତ କରିଥିଲା। ତା’ପରେ ଆଉ ସେ ଡେରି ନ କରି ଚଳିତ ଯାତ୍ରା ସିଜନରେ ଅପେରା ମଇଦାନରେ ପ୍ରବେଶ କରିଥିଲେ। ବର୍ତ୍ତମାନ ରାଜଧାନୀ ଅପେରାରେ ଅଭିନୟରତ ଏହି ଲମ୍ବା ରେସ୍ର ଘୋଡ଼ା ଆସନ୍ତା ଯାତ୍ରା ସିଜନ୍ରେ ଅଗ୍ରଣୀ ଅପେରା ପାର୍ଟି ଯାତ୍ରା ରଙ୍ଗମହଲରେ ଯୋଗ ଦେଉଛନ୍ତି। ନିଜ ଅଭିନୟ କ୍ୟାରିୟର ସମ୍ପର୍କରେ ଜଗତ୍ସିଂହପୁର ଜିଲା ବାଲିକୁଦା ଅନ୍ତର୍ଗତ ଓଳାସ ଗ୍ରାମରେ ଜନ୍ମିତ ତଥା ୨୬ ବର୍ଷ ବୟସ୍କ ମନୋଜ କହନ୍ତି, ‘ଅଭିନୟ ନିଶା ମୋତେ ପାଗଳ କରିଦେଇଛି ବୋଲି କହିବି। ଥିଏଟର ହେଉ ଅବା ଅପେରା-ଅଭିନୟ ସମୟରେ ମୁଁ ଅନେକ କଥା ଶିଖିଛି। ମୁଁ ସବୁବେଳେ କିଛି ନିଆରା ଆକ୍ଟିଂ କରିବାକୁ ଚେଷ୍ଟା କରେ। ଆଉ ବରିଷ୍ଠ କଳାକାରଙ୍କ ନିକଟରୁ କିଛି ଶିଖିବାକୁ ପ୍ରୟାସ କରେ। ଏବେ ମୁଁ ଅପେରା ଜଗତରେ ନୂଆ। ଏଠାରେ କ୍ୟାରିୟର କରିବାକୁ ଆଶା ରଖିଛି। ଆସନ୍ତା ଯାତ୍ରା ସିଜନରେ ମୁଁ ଅପେରା ରଙ୍ଗମହଲରେ ଯୋଗ ଦେବି। ଏହି ପାର୍ଟିର ସ୍ବତ୍ୱାଧିକାରୀ ସତ୍ୟ ଜେନା ମୋତେ ସିଲେକଶନ କରିଛନ୍ତି ତାହା ମୋ ପାଇଁ ବଡ଼ କଥା। ବିଶେଷ ଭାବର ଜଣେ ଯୁବ ଖଳନାୟକ ଭାବରେ ସେ ଦର୍ଶକଙ୍କୁ ବେଶ୍ ପ୍ରଭାବିତ କରିପାରିଛନ୍ତି। ମନୋଜ ଅଭିନୟ କରିଥିବା ନାଟକଗୁଡ଼ିକ ମଧ୍ୟରେ ରହିଛି ‘ସବୁ ରାଜନୀତି ରାଜଧାନୀରେ’ (ଅନଳ ନାଗରାଜ), ‘ଭୁଲ ହୋଇଗଲା ତୋତେ ଭଲ ପାଇ’ (ବିକାଶ ଚୌଧୁରୀ), ‘ଦି ଘଣ୍ଟାର ବୋହୂ ଦି ପଟ ଶଙ୍ଖା’ (ଡନ୍ ସାମନ୍ତରାୟ) ଏବଂ ‘ଫୁଲେଇ ଶିବାନୀ ରାଜଧାନୀରେ’ (ସନିଆ ପ୍ରଧାନ)। ସ୍ନାତକୋତ୍ତର ଡିଗ୍ରୀ ହାସଲ ପରେ ସେ ଏବେ କଟକସ୍ଥିତ ଏମ୍ଏସ୍ ଲ’ କଲେଜରେ ଏଲ୍ଏଲ୍ବିର ତୃତୀୟ ବର୍ଷ ଛାତ୍ର। ତେବେ ଜଲିଉଡରେ ମନୋଜ କି କିମିଆ କରୁଛନ୍ତି ତାହା ଦେଖିବାକୁ ବାକି ରହିଲା।