ଲର୍ଡସ,୧୫।୮(ଏଏଫପି)- ଇଂଲଣ୍ଡ ଓ ଅଷ୍ଟ୍ରେଲିଆ ମଧ୍ୟରେ ବୁଧବାର ଏଠାରେ ଆରମ୍ଭ ହେବାକୁ ଥିବା ଦ୍ୱିତୀୟ ଆଶେସ ଟେଷ୍ଟର ପ୍ରଥମ ଦିନର ଖେଳ ବାତିଲ ହୋଇଛି। କ୍ରମାଗତ ବର୍ଷା କାରଣରୁ ବିନା ଟସ୍ ଓ ବଲ୍ ପଡିବାରେ ପ୍ରଥମ ଦିନରେ ଖେଳ ସମ୍ପୂର୍ଣ୍ଣ ଭାବେ ଧୋଇଯାଇଛି। ଦୁଇ ଦଳ ମଧ୍ୟ ସେମାନଙ୍କ ଅନ୍ତିମ ଏକାଦଶ ଘୋଷଣା କରିନାହାନ୍ତି। ଯୁବ ଦ୍ରୁତ ବୋଲର ଜୋଫ୍ରା ଆର୍ଚରଙ୍କୁ ଇଂଲଣ୍ଡ କ୍ୟାପ୍ ପ୍ରଦାନ କରାଯାଇଥିଲା। ଫଳରେ ସେ ଏହି ଟେଷ୍ଟରେ ପଦାର୍ପଣ କରିବାର ନିଶ୍ଚିତ ହୋଇଛି। ପ୍ରଥମ ଦିନର ଖେଳ ବାତିଲ ହୋଇଥିବାରୁ ଏବେ ଅବଶିଷ୍ଟ ୪ ଦିନରେ ଅତିରିକ୍ତ ୮ ଓଭର ଲେଖାଏ ଖେଳ ହେବ। ଆଗକୁ ପୁଣି ବର୍ଷା ହେବ ବୋଲି ପୂର୍ବନୁମାନ କରାଯାଇଛି।
ଉଲ୍ଲେଖଥାଉ କି, ଏଜ୍ବାଷ୍ଟନରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍ରେ ଅଷ୍ଟ୍ରେଲିଆ ପୂର୍ବତନ ଅଧିନାୟକ ଷ୍ଟିଭ୍ ସ୍ମିଥ୍ଙ୍କ ଦମ୍ଦାର ପ୍ରଦର୍ଶନ ବଳରେ ୨୫୧ରନରେ ବିଜୟୀ ହୋଇଥିଲା ଓ ୫ ମ୍ୟାଚ୍ ବିଶିଷ୍ଟ ଏହି ହାଇପ୍ରୋଫାଇଲ ସିରିଜରେ ୧-୦ରେ ଅଗ୍ରଣୀ ହୋଇଥିଲା। ସ୍ମିଥ ଉଭୟ ଇନିଂସରେ ଶତକ ହାସଲ କରି ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ।