ହରିୟାଣା,୯।୪: ଲକ୍ଡାଉନ୍ ଶବ୍ଦ କେହି କେହି ଆଗରୁ ଶୁଣି ନ ଥିବା ବେଳେ ଏବେ କିନ୍ତୁ ଏହା ସମସ୍ତଙ୍କ ପାଇଁ ଏକ ପରିଚିତ ଶବ୍ଦ ପାଲଟି ଯାଇଛି। ଏହାର ଅର୍ଥ ମଧ୍ୟ ସମସ୍ତେ ହୁଏତ ଭାଲଭାବେ ବୁଝି ସାରିବେଣି। କରୋନା ଭାଇରସ ସଂକ୍ରମଣକୁ ନେଇ ଏବେ ସାରା ଦେଶରେ ଲକ୍ଡାଉନ୍ ଚାଲିଥିବା ବେଳେ କୌଣସି ପ୍ରିୟଜନଙ୍କ ମୃତ୍ୟୁ ପରେ ମଧ୍ୟ ସେମାନଙ୍କର ଅନ୍ତିମ ସଂସ୍କାର ଦାୟିତ୍ୱ ଘର ଲୋକଙ୍କୁ ଦିଆ ଯାଉ ନ ଥିବା ଦେଖାଯାଇଛି। ହରିୟାଣା ଯମୁନା ନଗର ପ୍ରେମନଗର ନିକଟରେ ଜଣେ ମହିଳାଙ୍କ ମୃତ୍ୟୁ ହେବା ପରେ ତାଙ୍କ ଅନ୍ତିମ ସଂସ୍କାରକୁ ନେଇ ଚର୍ଚ୍ଚା ହୋଇଥିଲା। ସୂଚନାଯୋଗ୍ୟ, ପ୍ରେମନଗର ନିବାସୀ ବିନୋଦ କୁମାରଙ୍କ ଜେଜେମା’ଙ୍କର ବୁଧବାର ପରଲୋକ ହୋଇଥିଲା। ହେଲେ କରୋନା ସଂକ୍ରମଣ ଦୃଷ୍ଟିରୁ ଦୂରରେ ରହୁଥିବା ତାଙ୍କ ସମ୍ପର୍କୀୟଙ୍କୁ ଆସିବାକୁ ବାରଣ କରାଯାଇଥିବା ବେଳେ ଭିଡ଼ିଓ କନଫରେନ୍ସ ଜରିଆରେ ସମସ୍ତେ ମୃତା ମହିଳାଙ୍କ ଅନ୍ତିମ ଦର୍ଶନ କରିବା ସହ ଲୋତକ ଭରା ଆଖିରେ ତାଙ୍କୁ ବିଦାୟ ଦେଇଥିବା ଜଣାପଡିଛି। ଏବେ ସୋସିଆଲ ଡିଷ୍ଟାନସିଂକୁ ଗୁରୁତ୍ୱ ଦିଆଯାଉଥିବାରୁ ପରିବାର ଲୋକେ ଏଭଳି କରିଥିବା କୁହାଯାଏ।