ଢାକା,୩୦।୫(ଏଏଫ୍ପି)- ବାଂଲାଦେଶ କ୍ରିକେଟ ଦଳର ସୁପରଫ୍ୟାନ ଭାବେ ପରିଚିତ ଶୋୟାବ ଅଲି ବିଶ୍ୱର ବିଭିନ୍ନ ଦେଶ ଭ୍ରମଣ କରି ଜାତୀୟ ଦଳକୁ ସମର୍ଥନ କରନ୍ତି। ଦେହ ଓ ମୁହଁରେ ବାଘ ଭଳି ରଙ୍ଗ କରି ମ୍ୟାଚ୍ ଦେଖୁଥିବା ୩୧ ବର୍ଷୀୟ କାର ମେକାନିକ୍ ନିଜ ଉତ୍ସାହ ଲାଗି ଲାଞ୍ଚ ଦେବାଠାରୁ ଆରମ୍ଭ କରି ନିଜକୁ ଆଘାତ ଦେବାରୁ ପଛାଇ ଯାଇ ନାହାନ୍ତି। ବାଂଲାଦେଶ ବୋଲର ଶାହାଦାଦ ହୋସେନଙ୍କ ଗାଡ଼ି ସଜାଡ଼ି ପ୍ରଥମ ଥର ଅନ୍ତର୍ଜାତୀୟ ମ୍ୟାଚ୍ ଦେଖିବାକୁ ଟିକେଟ୍ ପାଇଥିଲେ। ଭାରତ ବିପକ୍ଷ ମ୍ୟାଚ୍କୁ ବାଂଲାଦେଶ ଦଳ ୫ ଉଇକେଟରେ ଜିତି ନେଇଥିଲା। ଏହି ମ୍ୟାଚ୍ରେ ସଚିନ ତେନ୍ଦୁଲକର ବହୁ ପ୍ରତୀକ୍ଷିତ ୧୦୦ତମ ଶତକ ଅର୍ଜନ କରିଥିଲେ। ମ୍ୟାଚ୍ ପରେ ମୁଁ ବହୁ ସମୟ ଧରି ଗ୍ରାଉଣ୍ଡରେ କାନ୍ଦିଥିଲି। ସେଠାରେ ମୁଁ ଭାରତୀୟ ସୁପରଫ୍ୟାନ ସୁଧିର ଗୌତମଙ୍କୁ ଦେଖିଥିଲି, ଯିଏକି ଦେହରେ ଭାରତୀୟ ପତାକା ରଙ୍ଗ ଲଗାଇ ସମଗ୍ର ବିଶ୍ୱରେ ଟିମ୍ ଇଣ୍ଡିଆକୁ ସମର୍ଥନ କରନ୍ତି। ସେହିଠାରୁ ମୁଁ ତାଙ୍କ ଭଳି ଦେହରେ ରଙ୍ଗ ଲଗାଇ ପ୍ରତ୍ୟେକ ମ୍ୟାଚ୍ ଦେଖିବା ପାଇଁ ନିଷ୍ପତ୍ତି ନେଇଥିଲି ବୋଲି ସେ କହିଛନ୍ତି। ୧୩ ବର୍ଷରୁ ପାଠପଢ଼ା ଛାଡ଼ି ଦେଇଥିବା ଅଲି ଏପର୍ଯ୍ୟନ୍ତ ନିଜ ଦେଶରେ ଖେଳାଯାଇଥିବା ଗୋଟିଏ ମ୍ୟାଚ୍ ହାତଛଡ଼ା କରିଛନ୍ତି। ୨୦୧୩ଠାରୁ ସେ ବିଦେଶରେ ମଧ୍ୟ ଟିମ୍ ବାଂଲାଦେଶକୁ ଉତ୍ସାହିତ କରିବାକୁ ଯାଉଛନ୍ତି। ୨୦୧୩ରେ ସେ ଜିମ୍ବାଓ୍ବେ ଗସ୍ତ କରିଥିଲେ। କିନ୍ତୁ ଭିଜା, ପାସପୋର୍ଟ ଢାକା ବିମାନବନ୍ଦରରେ ଛାଡ଼ି ଦେଇଥିବାରୁ ହରାରେ ଆପ୍ରବାସନ କର୍ମକର୍ତ୍ତା ଅଲିଙ୍କୁ ସେଠାରୁ ଫେରାଇ ଦେବାକୁ ନିଷ୍ପତ୍ତି ନେଇଥିଲେ। ଏଣୁ ସେ ୧୦ ଡଲାର ଲାଞ୍ଚ ଦେଇ ବାଂଲାଦେଶ ଦଳକୁ ଫୋନ କରିଥିଲେ। ହେଲେ ସେମାନେ ଏ ସମ୍ପର୍କରେ କିଛି ବିଶେଷ ସହାୟତା କରିପାରି ନ ଥିଲେ। ନିୟମ ଅନୁଯାୟୀ କୌଣସି ଅସୁସ୍ଥ ବ୍ୟକ୍ତିଙ୍କୁ ଆପ୍ରବାସନ କର୍ମକର୍ତ୍ତା ଫେରାଇ ଦେଇ ପାରିବେ ନାହିଁ। ଏହା ଜାଣିବା ପରେ ମୁଁ ମୁଣ୍ଡକୁ କାନ୍ଥରେ ପିଟି ଅଚେତ ହେବାର ନାଟକ କରିଥିଲି। ବିମାନବନ୍ଦରରେ ଗୋଟିଏ ରାତି ରହିବା ପରେ ବାଂଲାଦେଶ ଅଫିସିଆଲ ମୋ ଭିଜା ନେଇ ଆସିଥିଲେ। ତାଙ୍କୁ ୨୦୧୫ ବିଶ୍ୱକପ୍ ପାଇଁ ଅଷ୍ଟ୍ରେଲିଆ ଭିଜା ମିଳି ନ ଥିଲା। ଏବେ ତାଙ୍କ ଗସ୍ତ ବାବଦ ଖର୍ଚ୍ଚକୁ ବାଂଲାଦେଶ କ୍ରିକେଟ ବୋର୍ଡ ବହନ କରୁଛି। ସେ ବର୍ତ୍ତମାନ ଇଂଲଣ୍ଡରେ ବାଂଲାଦେଶ ଦଳକୁ ଉତ୍ସାହିତ କରିବାକୁ ଆସିଛନ୍ତି।