ନୟାଗଡ଼ ଅଫିସ,୨୧।୧-ନୟାଗଡ଼ କ୍ଷୁଦ୍ର ଜଳସେଚନ ବିଭାଗର ବରିଷ୍ଠ କିରାଣି ତଥା କ୍ୟାଶିୟର ନିଗମାନନ୍ଦ ଭୂୟଁା ୧୩ ହଜାର ୫୦୦ ଟଙ୍କା ଲାଞ୍ଚ ନେଉଥିବା ବେଳେ ସୋମବାର ଭୁବନେଶ୍ୱର ଭିଜିଲାନ୍ସ ହାତରେ ଧରାପଡିଛନ୍ତି। ସେ ଇଟାମାଟି ଥାନା ନାଟୁଗାଁ ଗ୍ରାମର ଠିକାଦାର ଯୁଗଳ କିଶୋର ପରିଡ଼ା କରିଥିବା ଏକ ଚେକ୍ ଡ୍ୟାମ୍ର ବିଲ୍ କରାଇ ଦେବା ପାଇଁ ଲାଞ୍ଚ ନେଉଥିଲେ। ୨୦୧୭-୧୮ ମସିହାରେ ଯୁଗଳ ୧ ଲକ୍ଷ ୮୯ ହଜାର ୬୧୧ ଟଙ୍କାର ସିଙ୍ଗପଡ଼ା ଚେକ୍ ଡ଼୍ୟାମ୍ କରିଥିଲା ବେଳେ ଏହାର ବିଲ୍ କରାଇ ଦେବା ପାଇଁ ବାରମ୍ବାର କାର୍ଯ୍ୟାଳୟକୁ ଯାଇଥିଲେ। ୧୩,୫୦୦ ଟଙ୍କା ଲାଞ୍ଚ ଦେଲେ ତାଙ୍କ ବିଲ୍ ହୋଇଯିବ ବୋଲି ନିଗମାନନ୍ଦ ତାଙ୍କୁ କହିଥିଲେ। ପରେ ଏ ନେଇ ଯୁଗଳ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ । ସୋମବାର ଅପରାହ୍ନରେ ଠିକାଦାର ଯୁଗଳ କ୍ଷୁଦ୍ର ଜଳସେଚନ କାର୍ଯ୍ୟାଳୟରେ ନିଗମାନନ୍ଦଙ୍କୁ ଟଙ୍କା ଦେଉଥିବା ବେଳେ ଛପି ରହିଥିବା ଭିଜିଲାନ୍ସ ଟିମ୍ ତାଙ୍କୁ କାବୁ କରି ନେଇଥିଲେ। ତାଙ୍କୁ ଗିରଫ କରାଯିବା ସହିତ ଟଙ୍କା ଜବତ କରାଯାଇଥିଲା। ଏ ନେଇ ଭୁବନେଶ୍ୱର କାର୍ଯ୍ୟାଳୟରେ ୩/୨୦ରେ ଏକ ମାମଲା ରୁଜୁ କରାଯାଇ ତଦନ୍ତ କରାଯାଉଥିବା ସୂଚନା ମିଳିଛି। ସେହିଭଳି ତାଙ୍କ ସରକାରୀ ବାସଭବନରେ ମଧ୍ୟ ଚଢ଼ାଉ କରାଯାଇଥିଲା।
ସୂଚନାଯୋଗ୍ୟ, ଗତ ବର୍ଷ ଅକ୍ଟୋବର ୧୭ ତାରିଖରେ ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ନୟାଗଡ଼ କ୍ଷୁଦ୍ର ଜଳସେଚନର ନିର୍ବାହୀ ଯନ୍ତ୍ରୀ ବିନୟ କୁମାର ସୁବୁଦ୍ଧି ଭଜିଲାନ୍ସ ଦ୍ୱାରା ଗିରଫ ହୋଇଥିଲେ।