ନୂଆଦିଲ୍ଲୀ, ୨୦।୫- ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ଏବେ ଅନ୍ତର୍ଜାତୀୟ କ୍ରିକେଟରେ ଜଣେ ଚର୍ଚ୍ଚିତ ବ୍ୟକ୍ତିତ୍ୱ। ମାତ୍ର ଏକଦା ତାଙ୍କ ବାପା ଲାଞ୍ଚ ଦେବାକୁ ମନାକରି ଦେବାରୁ ତାଙ୍କୁ ଦିଲ୍ଲୀ ଜୁନିୟର ଦଳରେ ଚୟନ କରାଯାଇ ନ ଥିଲା। ମୋ ରାଜ୍ୟ ଦିଲ୍ଲୀରେ ଅନେକ ସମୟରେ ଏପରି କାର୍ଯ୍ୟ ହୁଏ, ଯାହା ନ୍ୟାୟସଙ୍ଗତ ହୋଇ ନ ଥାଏ। ଥରେ ଚୟନ ପ୍ରକ୍ରିୟା ସମୟରେ ଜଣେ ନିୟମ ବହିର୍ଭୂତ କାର୍ଯ୍ୟ କରିଥିଲେ ବୋଲି କୋହଲି କହିଛନ୍ତି। ”ମୋ ନିକଟରେ ପ୍ରତିଭା ଅଛି। ମାତ୍ର ଜୁନିୟର ଦଳରେ ସ୍ଥାନ ନିଶ୍ଚିତ କରିବାକୁ ହେଲେ କିଛି ଅଧିକ(ଲାଞ୍ଚ) ଆବଶ୍ୟକ“ ବୋଲି ମୋ ବାପାଙ୍କୁ ଉକ୍ତ ବ୍ୟକ୍ତି କହିଥିଲେ। ଭାରତୀୟ ଫୁଟବଲ ଅଧିନାୟକ ସୁନୀଲ ଛେତ୍ରୀଙ୍କ ସହ ୱେବ୍ ଚାଟ୍ ଅବସରରେ କୋହଲି ଏହା ପ୍ରକାଶ କରିଛନ୍ତି। ମୋ ବାପା ଜଣେ ସଚ୍ଚୋଟ ମଧ୍ୟବିତ୍ତ ଶ୍ରେଣୀର ବ୍ୟକ୍ତି। ନିଜ ଜୀବନରେ କଠିନ ପରିଶ୍ରମ କରି ସେ ଜଣେ ସଫଳ ଆଇନଜୀବୀ ହୋଇ ପାରିଥିଲେ। ମୋ ଚୟନ ପାଇଁ ଆଉଟିକେ ଅଧିକ(ଲିଟିଲ ଏକ୍ସଟ୍ରା) କ’ଣ ଆବଶ୍ୟକ ବୋଲି ସେ ଠିକ୍ଭାବେ ବୁଝିପାରି ନ ଥିଲେ। ତେଣୁ ସେ ସହଜ ଭାବରେ ଉତ୍ତର ଦେଇଥିଲେ ଯେ, ”ତୁମେ ଯଦି ବିରାଟକୁ ଚୟନ କରିବାକୁ ଚାହୁଁଛ ତେବେ କେବଳ ମେରିଟ ଉପରେ ଧ୍ୟାନ ଦିଅ, ମୁଁ ଆଉକିଛି ଅଧିକ ଦେଇ ପାରିବି ନାହିଁ“। ଫଳରେ ମୁଁ ଚୟନ ହୋଇପାରି ନ ଥିଲି। ମୁଁ ବହୁତ କାନ୍ଦିଥିଲି ଏବଂ ଭାଙ୍ଗିପଡ଼ିଥିଲି ବୋଲି କୋହଲି କହିଛନ୍ତି।
ଏଥିରୁ ଅନେକ କିଛି ବୁଝିପାରିଥିଲେ ବୋଲି କହିଛନ୍ତି କୋହଲି। ”ଏହି ଘଟଣା ପରେ ମୁଁ ବହୁତ କିଛି ଚିନ୍ତା କରିଥିଲି। ସମ୍ପୂର୍ଣ୍ଣ ବିଶ୍ୱ ଏପରି ଚାଲିଛି ବୋଲି ମୋର ଅନୁଭବ ହୋଇଥିଲା। ଆଗକୁ ବଢ଼ିବାକୁ ହେଲେ ଏପରି କିଛି କରିବାକୁ ପଡ଼ିବ ଯାହାକି ଅନ୍ୟକେହି କରିପାରୁ ନ ଥିବେ। ସଫଳ ହେବାକୁ ହେଲେ ମୋତେ ଅଧିକ କିଛି ଦେଖାଇବାକୁ ହେବ ବୋଲି ଅନୁଭବ କରିଥିଲି। ଆଜି ମୁଁ ଯେଉଁଠି ବି ପହଞ୍ଚତ୍ଛି ତାହା କେବଳ କଠିନ ପରିଶ୍ରମ ଏବଂ ପ୍ରଚେଷ୍ଟା ଯୋଗୁ। ମୋ ବାପା ମୋତେ ଠିକ୍ ମାର୍ଗରେ ନେଇଥିଲେ। ତାଙ୍କ ବ୍ୟକ୍ତିତ୍ୱ ମୋ ଉପରେ ଗଭୀର ପ୍ରଭାବ ପକାଇଛି“ ବୋଲି କୋହଲି ପ୍ରକାଶ କରିଛନ୍ତି। ୨୦୦୬ରେ ଦିଲ୍ଲୀ ପକ୍ଷରୁ କର୍ନାଟକ ବିପକ୍ଷରେ ରଣଜୀ ଟ୍ରଫି ଖେଳୁଥିବାବେଳେ କୋହଲି ୧୮ ବର୍ଷ ବୟସରେ ବାପାଙ୍କୁ ହରାଇଥିଲେ। ପରଦିନ ସକାଳେ ଗ୍ରାଉଣ୍ଡକୁ ଫେରି ମୂଲ୍ୟବାନ ଇନିଂସ ଖେଳି ଦିଲ୍ଲୀକୁ ବିପଦରୁ ରକ୍ଷା କରିଥିଲେ। ”ମୁଁ ବାପାଙ୍କ ମୃତ୍ୟୁରେ ମର୍ମାହତ ହୋଇଥିଲେ ହେଁ କ୍ୟାରିୟର ପ୍ରତି ସଚେତନ ଥିଲି। ତେଣୁ ରଣଜୀ ଟ୍ରଫିରେ ଖେଳିବା ଜାରି ରଖିଥିଲି। ଅବସର ପରେ ଶାନ୍ତିପୂର୍ଣ୍ଣ ଜୀବନ ଯାପନ କରିବା ପାଇଁ ବାପା ହକ୍ଦାର ଥିଲେ।