ଫୁଲବାଣୀ ଅଫିସ, ୨୫ା୭-ଏକ ଲାଞ୍ଚ ମାମଲାର ବିଚାର କରି ବୁଧବାର ଫୁଲବାଣୀ ସ୍ବତନ୍ତ୍ର ଭିଜିଲାନ୍ସ ଜଜ୍ ଭଗବାନ ପ୍ରଧାନ ଅଭିଯୁକ୍ତ ବରିଷ୍ଠ କିରାଣିଙ୍କୁ ୨ ବର୍ଷ ଜେଲ ଦଣ୍ଡାଦେଶ ଶୁଣାଇଛନ୍ତି। ଏଥିସହ ୫ ହଜାର ଟଙ୍କା ଜରିମାନା କରିଛନ୍ତି। ଏହା ଅନାଦାୟ ଅଧିକ ୬ ମାସ ଜେଲ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ହେଲେ ପୂର୍ବତନ ବୌଦ୍ଧ ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟର ବରିଷ୍ଠ କିରାଣି ବୀରେନ୍ଦ୍ର କୁମାର ପଣ୍ଡା। ଏବେ ସେ ହରଭଙ୍ଗା ବିଇଓ ଅଫିସରେ କାର୍ଯ୍ୟରତ।
ମିଳିଥିବା ସୂଚନା ଅନୁଯାୟୀ, ଜିଲାର ମନମୁଣ୍ଡା ଥାନା ପୁରୁଣାପାଣିର ଶିକ୍ଷକ କୈଳାସ ସାଗର ଚାକିରିରୁ ଅବସର ନେଇଥିଲେ। ତାଙ୍କ ଅବସରକାଳୀନ ବକେୟା ଅର୍ଥ ପାଇବା ପାଇଁ ବୌଦ୍ଧ ବିଇଓଙ୍କ କାର୍ଯ୍ୟାଳୟ ବରିଷ୍ଠ କିରାଣି ତଥା ଡିଲିଂ ଆସିଷ୍ଟାଣ୍ଟ ପଣ୍ଡାଙ୍କୁ ଦେଖା କରିଥିଲେ। ଦେହ ଖରାପ ହେବାରୁ ପୁଅ ଦେବଦତ୍ତ ଟଙ୍କା ପାଇବା ପାଇଁ କିରାଣି ପଣ୍ଡାଙ୍କୁ ଯାଇ ଭେଟିଥିଲେ। ହେଲେ ପଣ୍ଡା ୧୫୦୦ ଟଙ୍କା ଲାଞ୍ଚ ମାଗିଥିଲେ ା ଏ ନେଇ ଦେବଦତ୍ତ ବ୍ରହ୍ମପୁର ଭିଜିଲାନ୍ସରେ ୨୦୧୬ ଜାନୁଆରୀ ୩୧ରେ ଅଭିଯୋଗ କରିଥିଲେ। ଭିଜିଲାନ୍ସ ବିଭାଗରେ ଏ ନେଇ ନଂ.୫/୧୬ରେ ମାମଲା ରୁଜୁ କରିଥିଲା ା ଯୋଜନା ମୁତାବକ ପରଦିନ ଅର୍ଥାତ୍ ଫେବୃୟାରୀ ୧ରେ ଦେବଦତ୍ତ ୧୫୦୦ ଟଙ୍କା କିରାଣି ପଣ୍ଡାଙ୍କୁ ଦେଇଥିଲେ। ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଡିଏସ୍ପି ହରେକୃଷ୍ଣ ବେହେରା, ଇନ୍ସପେକ୍ଟର ପି.ଛତ୍ରିଆ ଏବଂ ଅନ୍ୟମାନେ ପଣ୍ଡାଙ୍କ ଠାରୁ ରଙ୍ଗବୋଳା ଟଙ୍କା ଜବତ କରି ତାଙ୍କୁ ଗିରଫ କରିଥିଲେ। ଉପଯୁକ୍ତ ସାକ୍ଷ୍ୟ ପ୍ରମାଣକୁ ଆଧାର କରି ବିଚାରପତି ଉପରୋକ୍ତ ଦଣ୍ଡାଦେଶ ଦେଇଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ସୁରେଶ ମହାପାତ୍ର ମାମଲା ପରିଚାଳନା କରୁଥିଲେ ।