ଭୁବନେଶ୍ୱର,୭ା୫ (ବ୍ୟୁରୋ): କରୋନା ସଂକ୍ରମିତଙ୍କ ଟେଷ୍ଟକୁ ସରଳ କରିବା ପାଇଁ କେନ୍ଦ୍ର ସରକାର ‘ଆରୋଗ୍ୟ ସେତୁ ଆପ୍’ ତିଆରି କରିଛନ୍ତି। ଏହି ଆପ ଜରିଆରେ ଜଣେ ନାଗରିକ କରୋନା ଲକ୍ଷଣ ଅଛି କି ନାହିଁ ପରୀକ୍ଷା କରି ନିଜେ ଜାଣିପାରିବ। ବର୍ତ୍ତମାନ ଏହି ଆପ ପ୍ରତ୍ୟେକ ନାଗରିକ ପାଇଁ ଜରୁରୀ ଥିବାରୁ କମିଶନରେଟ ପୋଲିସ ପକ୍ଷରୁ ଜନତାଙ୍କୁ ସତର୍କ କରାଯାଇଛି। ଏ ନେଇ ବୁଧବାର କୁହାଯାଇଛି, ପାକିସ୍ତାନ ସାଇବର ଅପରାଧୀମାନେ ଆରୋଗ୍ୟ ସେତୁ ଆପ୍କୁ ହ୍ୟାକ କରି ଆପଣଙ୍କ ସମସ୍ତ ଗୁରୁତ୍ୱପୂର୍ଣ୍ଣ ତଥ୍ୟ ନେଇଯିବାର ସମ୍ଭାବନା ରହିଛି। ତେଣୁ ଏହି ଆପ୍କୁ ହ୍ବାଟସଆପ୍ କି, ଏସ୍ଏମସ୍ରେ ଆସୁଥିବା ଲିଙ୍କ୍ରୁ ଡାଉନ୍ଲୋଡ୍ ନ କରିବାକୁ କୁହାଯାଇଛି। କାରଣ ଏହି ଆପ୍ ପ୍ରକୃତରେ ଆରୋଗ୍ୟ ଆପ୍ର ଲିଙ୍କ୍ ନୁହେଁ। ଯଦି କିଏ କରିଛନ୍ତି ତେବେ, ଏହାକୁ ଅନ୍-ଇନ୍ଷ୍ଟଲ୍ କରି ଦିଅନ୍ତୁ। କେବଳ ଗୁଗୁଲ ପ୍ଲେ ଷ୍ଟୋରରୁ ଡାଉନ୍ଲୋଡ୍ କରିବାକୁ ପୋଲିସ ପରାମର୍ଶ ଦେଇଛି। ଆରୋଗ୍ୟ ସେତୁ ଆପର ସୁରକ୍ଷିତ ବ୍ୟବହାରର ୫ଟି ଦିଗକୁ ନେଇ କମିଶନରେଟ୍ ପୋଲିସ ପକ୍ଷରୁ ସାଇବର୍ ସର୍ତକତା କରାଯାଇଛି। ଏହି ଆପ୍ ମାଧ୍ୟମରେ ପାକିସ୍ତାନ ସାଇବର ଅପରାଧୀମାନେ ଗୁରୁତ୍ୱପୂର୍ଣ୍ଣ ତଥ୍ୟ ହ୍ୟାକ କରୁଥିବା ପୋଲିସ ପକ୍ଷରୁ ସୂଚନା ଦିଆଯାଇଛି। ପାକିସ୍ତାନୀ ଅପରାଧୀ ଛାଡ଼ିଥିବା ଲିଙ୍କରେ ଚାଟ୍ ମି ଆପ ବୋଲି କୁହାଯାଇଛି। ତେଣୁ କୌଣସି ଲିଙ୍କରୁ ଆପ ଡାଉନଲୋଡ ନ କରିବାକୁ କୁହାଯାଇଛି। ଆରୋଗ୍ୟ ସେତୁ ଆପ୍ ଦ୍ୱାରା ସହଜରେ ଜଣେ ଲୋକ ପରୀକ୍ଷା କରିହେଉଥିବାରୁ ଏହାକୁ ସମସ୍ତେ ଡାଉନ୍ଲୋଡ୍ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅପିଲ୍ କରିଥିଲେ। କିନ୍ତୁ ଏହି ଆପ୍ ମାଧ୍ୟମରେ ଲୋକଙ୍କ ଗୁରୁତ୍ୱପୂର୍ଣ୍ଣ ତଥ୍ୟ ଚୋରି ହେବାର ସମ୍ଭାବନା ଥିବାରୁ କମିଶନରେଟ୍ ପୋଲିସ ସର୍ତକ କରାଯାଇଛି।