ଆନନ୍ଦପୁର,୧୧।୬(ସ୍ବ.ପ୍ର.): ଓଡ଼ିିଆମାନଙ୍କ ଗଣପର୍ବ ରଜ। ଏଥିପାଇଁ ରଜ ତିନି ଦିନ ଯାକ ଘରେ ପିଠାପଣା ଓ ମିଠାର ଆସର ଜମିଥିବାବେଳେ ବନ୍ଧୁ ପ୍ରିୟଜନଙ୍କ ଭେଟଘାଟ ହେବାର ପରମ୍ପରା ଅତ୍ୟନ୍ତ ନିଆରା। ଏହି ତିନି ଦିନ ଓଡ଼ିଆମାନେ କୌଣସି କାମଧନ୍ଦା ନକରି ରଜ ଦୋଳି, ବାଗୁଡି, ତାସ୍, ପଶା ଖେଳ ଆଦିର ମଜା ଉଠାଇଥାନ୍ତି। ଚଳିତ ମାସ ୧୪ ତାରିଖରେ ଏହା ଆରମ୍ଭ ହେଉଥିବାବେଳେ ଗାଁ ଗହଳିରେ ରଜ ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି। ବିଶେଷ କରି ଘସିପୁରା ବ୍ଲକ ବାଲିପାଳ ରଜ ମଉଜ ନିଆରା ଢଙ୍ଗରେ ପାଳିବାର ପରମ୍ପରା ରହି ଆସିଛି। ଆଉ ଦୁଇ ଦିନ ପରେ ରଜ ଥିବାରୁ ପୁରୁଣା ପାରମ୍ପରିକ ରୀତିରେ ଢେଙ୍କିରେ ଚୁନା କୁଟିବାକୁ ଭୁଲି ନାହାନ୍ତି ଝିଅ ବୋହୁମାନେ। ଅପରପକ୍ଷେ ଗାଁ ଗହଳିର ଯୁବକମାନେ କାଠରେ ବିଭିନ୍ନ ଦୋଳି ବାନ୍ଧିବା ଆରମ୍ଭ କରିଦେଲେଣି। ଝିଅ ବୋହୁମାନେ ହାତରେ ମେହେନ୍ଦୀ ଲଗାଇବା ଆରମ୍ଭ କରିଛନ୍ତି। ବାଲିପାଳ ହାଟ ପଡିଆରେ ବେଶ ଯାକ ଜମକରେ ଅନୁଷ୍ଠିତ ହେଉଥିବା ରଜ ଉତ୍ସବରେ ରାଧାକୃଷ୍ଣଙ୍କ ଯୁଗଳମୂର୍ତ୍ତୀ ଦୋଳିରେ ଝୁଲିବା ଅବସ୍ଥାରେ ପୂଜା ପାଇବାର ପରମ୍ପରା ଅତ୍ୟନ୍ତ ନିଆରା ସାଜିଥାଏ।