ନୂଆଦିଲ୍ଲୀ,୨୬।୯: ସେପ୍ଟେମ୍ବର ପହିଲାରୁ ନୂଆ ମୋଟରଯାନ ନିୟମ ଆରମ୍ଭ ହେବାପରେ ଲୋକଙ୍କ ବହୁ ସଂଖ୍ୟାରେ ଚାଲାଣ କଟୁଥିବା ଦେଖିବାକୁ ମିଳିଛି। ନିକଟରେ ଲୁଙ୍ଗି ଓ ଚପଲ ପିନ୍ଧି ଗାଡି ଚଳାଇଲେ ବି ଚାଲାଣ କଟିବ ବୋଲି ଶୁଣିବାକୁ ମିଳିଥିଲା। ହେଲେ ଏନେଇ କେନ୍ଦ୍ର ପରିବହନ ମନ୍ତ୍ରୀ ନୀତୀନ ଗଡ଼କରୀ ଟୁଇଟ କରି ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଏହା ସମ୍ପର୍ଣ୍ଣ ଗୁଜବ। ଏଥିରୁ ଦୂରେଇ ରହିବା ପାଇଁ ସେ ଲୋକଙ୍କୁ ପରାମର୍ଶ ଦେଇଛନ୍ତି। ଲୁଙ୍ଗି ଓ ଚପଲ ପିନ୍ଧି ଗାଡି ଚଳାଇଲେ କୌଣସି ପ୍ରକାର ଚାଲାଣ କଟାଯିବ ନାହିଁ। ଏଥିସହ ଗାଡ଼ିର କାଚ ମଇଳା ହେବା, ଗାଡିରେ ଅଧିକ ବଲ ରଖିବା କି ଚପଲ ପିନ୍ଧି ଗାଡ଼ି ଚଳାଇବା ଉପରେ ଚାଲାଣ କଟାଯିବା ନେଇ କୌଣସି ଆଇନ ବ୍ୟବସ୍ଥା ନାହିଁ ବୋଲି ଗଡ଼କରୀ କହିଛନ୍ତି। ତେବେ ସଡକ ସୁରକ୍ଷା ଆଇନକୁ ନେଇ କିଛି ଗଣମାଧ୍ୟମ ଲୋକଙ୍କୁ ଭ୍ରମିତ କରାଉଛନ୍ତି ବୋଲି ପରିବହନ ମନ୍ତ୍ରୀ କହିଛନ୍ତି। ଯେଉଁଥିରୁ ଚାଳକମାନେ ହନ୍ତସନ୍ତ ହେବା ସହ ମିଥ୍ୟା ଗୁଜବର ଶିକାର ହେଉଛନ୍ତି।
