କଟକ ଅଫିସ, ୧୧।୭: ସିଡିଏ ଫେଜ-୨ ପୋଲିସ ବୁଧବାର ଏକ ଲୁଟେରା ଗ୍ୟାଙ୍ଗକୁ ଠାବ କରିଛି। ଏଥିସହ ଗ୍ୟାଙ୍ଗର ୬ ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ବିଡ଼ାନାସୀ ଥାନା ଅନ୍ତର୍ଗତ ଖ୍ରୀଷ୍ଟିୟାନ ସାହି ଅଞ୍ଚଳର ଜିତେନ୍ଦ୍ର ବସ୍ତିଆ, ପ୍ରଶାନ୍ତ ବସ୍ତିଆ, ରାଜେନ୍ଦ୍ର ବସ୍ତିଆ, ଖୋର୍ଦ୍ଧା ଜିଲା ଜଟଣୀ ଅଞ୍ଚଳର ଚନ୍ଦନ ରାଣାସିଂ, ବାଲେଶ୍ୱର ଜିଲା ଜଳେଶ୍ୱର ଥାନା ଅନ୍ତର୍ଗତ ବାଘବାଡ଼ି ଅଞ୍ଚଳର ପପୁ ମଣ୍ଡଳ ଓ ଲାଲବାଗ ଥାନା ଅନ୍ତର୍ଗତ ବାଲୁବଜାର ଅଞ୍ଚଳର ପରେଶନାଥ ଶାହା। ପୋଲିସ ସେମାନଙ୍କଠାରୁ ଏକ ସୁନାଚେନ, ୩ଟି ମୋବାଇଲ, ଦୁଇଟି ବାଇକ୍ (ଓଡି୦୫ଆର୍-୯୩୦୬, ଓଆର୍୦୭ୟୁ-୮୨୬୦) ଜବତ କରିଛି।
ଅଭିଯୋଗ ଅନୁଯାୟୀ, ଗତ ୬ ତାରିଖ ସକାଳେ ବାରଙ୍ଗ ଥାନା ଅନ୍ତର୍ଗତ ବିଦ୍ୟାଧରପୁର ଅଞ୍ଚଳର ମାନସ ଲେଙ୍କା ନରାଜ ଆଇବିକୁ ଯାଉଥିଲେ। ସେହି ସମୟରେ ବାଟରେ ୨ ଜଣ ଯୁବକ ଏକ ବାଇକ୍ରେ ଆସି ତାଙ୍କୁ ଅଟକାଇଥିଲେ। ମାନସ ରହିବାରୁ ସେମାନେ ତାଙ୍କୁ ଗାଳିଗୁଲଜ କରି ପିନ୍ଧିଥିବା ସୁନାଚେନ, ବ୍ରେସଲେଟ୍, ଦୁଇଟି ମୋବାଇଲ ସହିତ ୬ହଜାର ଟଙ୍କା ଲୁଟି ନେଇ ଫେରାର ହୋଇଯାଇଥିଲେ। ଏ ନେଇ ମାନସ ସିଡିଏ ଫେଜ-୨ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା (ନଂ.୩୯/୧୯) ରୁଜୁ କରି ଘଟଣାର ମୁଖ୍ୟ ଅଭିଯୁକ୍ତ ଜିତେନ୍ଦ୍ରଙ୍କୁ ଗିରଫ କରିଥିଲା। ପଚରାଉଚରା ପରେ ସେ ଅନ୍ୟ ଅଭିଯୁକ୍ତଙ୍କ ସମ୍ପର୍କରେ ସୂଚନା ଦେଇଥିଲେ। ପରେ ପୋଲିସ ଅନ୍ୟ ୫ ଜଣଙ୍କୁ ଗିରଫ କରିଥିଲା। ତେବେ ସେମାନେ ମୁଖ୍ୟତଃ ନରାଜ ଅଞ୍ଚଳକୁ ଯାଉଥିବା ଲୋକମାନଙ୍କୁ ଟାର୍ଗେଟ କରୁଥିଲେ। ନିଛାଟିଆ ସ୍ଥାନ ଦେଖି ଲୋକମାନଙ୍କୁ ଅଟକାଇ ଲୁଟ୍ କରୁଥିଲେ ବୋଲି ଅଭିଯୁକ୍ତମାନେ ପୋଲିସ ନିକଟରେ ସ୍ବୀକାର କରିଛନ୍ତି।