ଯୋଡ଼ା,୧୮।୭(ଡି.ଏନ.ଏ.)-କେନ୍ଦୁଝର ଜିଲା ଯୋଡ଼ା ଖଣିମଣ୍ଡଳରେ ରାସ୍ତାରେ ଥିବା ଖାଲଢିପକୁ ପୋତିବା ପାଇଁ ଖଣିଜ ପଦାର୍ଥ ବ୍ୟବହାର କରାଯାଉଛି। ଯୋଡ଼ା ଖଣିମଣ୍ଡଳର ଜୁରୁଡ଼ି-ବାମେବାରୀ ରାଜ୍ୟ ରାଜପଥ ନଂ ୨ରେ ବିପୁଳ ପରିମାଣର ଲୁହାପଥରଗୁଣ୍ଡକୁ ଏକ ନିର୍ଦ୍ଦିଷ୍ଟ ଖଣିରୁ ଆଣି ରାସ୍ତା ମରାମତି କାର୍ଯ୍ୟରେ ବ୍ୟବହାର କରାଯାଉଛି। ତେଣେ ଖଣିରୁ ଗୋଟିଏ ଟ୍ରିପ ମାଟି ପରିବହନ କରିବାକୁ ହେଲେ ଖଣିବିଭାଗଠାରୁ ଅନୁମୋଦନ ନିଆଯାଇ ମାଟିର ମାନ ପରୀକ୍ଷା କରାଯାଏ। ଲୌହାଂଶର ପରିମାଣ ଅନୁଯାୟୀ ରାଜସ୍ବ ଜମା କରିବା ପରେ ହିଁ ପରିବହନ ଅନୁମୋଦନ ମିଳିଥାଏ। ହେଲେ ଏହି ରାଜରାସ୍ତା ମରାମତିରେ ବିପୁଳ ପରିମାଣର ଲୁହାପଥରଗୁଣ୍ଡ ପକାଇ ନିର୍ମାଣ କରାଯାଉଛି। ତେବେ ରାସ୍ତା ମରାମତି ଆଳରେ ଖଣିରୁ ଲୁହାପଥର ଚୋରାଚାଲାଣ କରାଯାଉଛି ବୋଲି ମଧ୍ୟ ଶୁଣିବାକୁ ମିଳୁଛି। ଶତକଡ଼ା ୫୪ପ୍ରତିଶତ ଲୌହାଂଶ ଥିବା ଳୁହାପଥରଗୁଣ୍ଡ ବିଦେଶକୁ ରପ୍ତାନି କରାଯାଉଛି। ହେଲେ ରାସ୍ତା ନିର୍ମାଣରେ ଏହି ଉନ୍ନତମାନର ଲୁହାପଥରଗୁଣ୍ଡକୁ ପକାଇ ମରାମତି ହେଉଥିବାରୁ ଲକ୍ଷ ଲକ୍ଷ ଟଙ୍କା ରାଜସ୍ବ ହାନି ହେଉଛି।
ଗତ କିଛି ବର୍ଷ ପୂର୍ବେ ଏକ ଦୁର୍ଗାମଣ୍ଡପ ନିର୍ମାଣ ପାଇଁ ଏକ ଖଣିରୁ କିଛି ଲୌହମିଶ୍ରିତ ମାଟି ବିନା ଅନୁମୋଦନରେ ପରିବହନ କରାଯାଇଥିଲା। ତତ୍କାଳୀନ ଯୋଡ଼ା ଖଣି ଉପନିର୍ଦ୍ଦେଶକ ସୁଶାନ୍ତ କୁମାର ନାୟକ ଏହା ଉପରେ କଟକଣା ଲଗାଇ ଉକ୍ତ ମାଟିମିଶ୍ରିତ ଲୁହାପଥରଗୁଣ୍ଡକୁ ଜବତ କରିବା ସହିତ ପରିବହନ ହୋଇ ଆସିଥିବା ସମ୍ପୃକ୍ତ ଖଣି କମ୍ପାନୀକୁ କାରଣ ଦର୍ଶାଅ ନୋଟିସ ଜାରିକରି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ସେହିପରି ନିକଟ ଅତୀତରେ କିଛି ବଡ଼ ଲୁହାପଥରଖଣ୍ଡ ପରିବହନ କରାଯାଇ ଲହଣ୍ଡାସ୍ଥିତ ଓଜନ କଣ୍ଟାର ରାସ୍ତା ମରାମତି କାର୍ଯ୍ୟରେ ଲଗାଯାଇଥିଲା। ତତ୍କାଳୀନ ଖଣି ଉପନିର୍ଦ୍ଦେଶକ ଏହାକୁ ମଧ୍ୟ ବନ୍ଦ କରିବା ସହିତ ସଂପୃକ୍ତ ଖଣି ବିରୋଧରେ କାରଣ ଦର୍ଶାଅ ନୋଟିସ ଜାରି କରିଥିଲେ। ଏତେଗୁଡ଼ିଏ ଘଟଣା ଘଟିବାପରେ ମଧ୍ୟ ପୁନଃ ଏହିପରି ଅନିୟମିତତା ନଜରକୁ ଆସିଛି। ଏ ନେଇ ଯୋଡ଼ାସ୍ଥିତ ଖଣି ଉପନିର୍ଦ୍ଦେଶାଳୟର ଖଣି ଉପନିର୍ଦ୍ଦେଶକ ଏଲ.ଡି.ନାଏକଙ୍କୁ ପଚାରିବାରୁ ରୋଡ଼ ମେଣ୍ଟେନାନ୍ସ ପାଇଁ ତାହା ବ୍ୟବହାର କରାଯାଇଥିବ। ତେବେ ଏ ନେଇ କୌଣସି ଖଣି କମ୍ପାନୀକୁ ପରିବହନ ଅନୁମୋଦନ ଦିଆଯାଇ ନାହିଁ। ଏ ସମ୍ପର୍କରେ ସେ ବୁଝିକି ଜଣାଇବେ ବୋଲି ତାଙ୍କ ପ୍ରତିକ୍ରିୟାରେ କହିଛନ୍ତି।