ବଡବିଲ, ୮।୧(ସ୍ବ.ପ୍ର.): କେନ୍ଦୁଝର ଜିଲା ରୁଗୁଡି ପୋଲିସ ବୁଧବାର ସକାଳେ ଏହି ଥାନା ଅଞ୍ଚଳ ଦେଇ ଚୋରାଚାଲାଣ ହେଉଥିବା ସାଇଜ ଲୁହାପଥର ବୋଝେଇ ୨ଟି ଟ୍ରକକୁ ଜବତ କରିଛି। ଘଟଣାରେ ସମ୍ପୃକ୍ତ ୩ ଜଣଙ୍କୁ ଗିରଫ କରି ପୋଲିସ ସେମାନଙ୍କ ନିକଟରୁ ନଗଦ ୧୫ ହଜାର ୬ ଶହ ଟଙ୍କା ଓ ୩ ଟି ମୋବାଇଲ ଜବତ କରି ଅଧିକ ତଦନ୍ତ ଜାରି ରଖିଛି। ଗିରଫ ଅଭିଯୁକ୍ତ ମାନେ ହେଲେ ଝାଡଖଣ୍ଡ ରାଜ୍ୟ ଦେଓଘାଟ ଅଞ୍ଚଳର ନିୟାଜ ଅନସାରୀ, ପଶ୍ଚିମବଙ୍ଗ ପୁରୁଲିଆ ଅଞ୍ଚଳର ଜୟଦେବ ମୁଦି ଓ ସମୀର ବାରୁଇ।
ପ୍ରାପ୍ତ ସୂଚନା ଅନୁଯାୟୀ ରୁଗୁଡି ଥାନାଞ୍ଚଳ ୫୨୦ ନମ୍ବର ଜାତୀୟ ରାଜପଥ ଦେଇ ସାଇଜ ଲୁହାପଥର ଚୋରାଚାଲାଣ ହେଉଥିବା ରୁଗୁଡି ପୋଲିସ କୌଣସି ସୂତ୍ରରୁ ଖବର ପାଇଥିଲା। ଖବର ଅନୁଯାୟୀ ପୋଲିସ ଏକ ୧୨ ଚକିଆ ଟ୍ରକ ଓ ଏକ ୧୦ ଚକିଆ ଟ୍ରକକୁ ଅଟକାଇ ଗାଡି କାଗଜପତ୍ର ଯାଞ୍ଚ କରିବାରୁ ଟ୍ରକ ଗୁଡିକରେ ନକଲି ନମ୍ବର ପ୍ଲେଟ ଲଗାଇ ସାଇଜ ଲୁହାପଥର ଚୋରାଚାଲାଣ ହେଉଥିବା ଜାଣିବାକୁ ପାଇଥିଲା। ଘଟଣାସ୍ଥଳରୁ ପୋଲିସ ମୋଟ ୫୫ ମେଟ୍ରିକ ଟନ ସାଇଜ ଲୁହାପଥର ବୋଝେଇ ଟ୍ରକ ଦ୍ୱୟକୁ ଜବତ କରିବା ସହ ସଂପୃକ୍ତ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଥିବା ରୁଗୁଡି ଥାନା ସବଇନ୍ସପେକ୍ଟର ଶ୍ରୀକାନ୍ତ ସାହୁ ସୂଚନା ଦେଇଛନ୍ତି। ଏହି ଚୋରାକାରବାରର ଅଧିକ ତଦନ୍ତ ଜାରି ରହିଥିବା କହିଛନ୍ତି। ସୂଚନା ଯୋଗ୍ୟ ଯେ, ଖଣିରୁ ଲୁହାପଥର ଚୋରି ରୋକିବା ନିମନ୍ତେ ଖଣିବିଭାଗ ପକ୍ଷରୁ ଜିପିଏସ ସିଷ୍ଟମ ରହିଥିବା ଆଇ-୩-ଏମଏସ ବ୍ୟବସ୍ଥା ଲାଗୁ କରାଯାଇଛି। ଏହି ବ୍ୟବସ୍ଥା ଦ୍ୱାରା ଜିପିଏସ ନ ଥିବା ଭାରିଯାନ ଗୁଡିକରେ ଲୋଡିଂ ନିମନ୍ତେ ଅନୁମତି ମିଳିବା କଥା ନୁହେଁ ହେଲେ ଅଧିକାଂଶ ଭାରିଯାନ ଗୁଡିକରେ ଜିପିଏସ ମେଶିନ ଲାଗିନଥିଲେ ମଧ୍ୟ ଅତି ସହଜରେ ଲୋଡିଂ ହୋଇପାରୁଛି। ଏଭଳିସ୍ଥଳେ ସରକାରଙ୍କ ଅଯଥା ଆଇ-୩-ଏମଏସ ବ୍ୟବସ୍ଥା ଲାଗୁ ଏକ ପ୍ରହସନ ଭଳି ମନେ ହେଉଛି।