ରାଜନନ୍ଦଗାଁ,୩।୧୧: ମା’ ସବୁବେଳେ ମା’। କୁହାଯାଏ ସେ ସର୍ବଂସହା। ସନ୍ତାନ ପାଇଁ ମା’ ସବୁକିଛି କରିପାରେ। ଏମିତିକି ନିଜ ଜୀବନକୁ ବାଜି ବି ଲଗାଇପାରେ। ଛତିଶଗଡ଼ ରାଜନନ୍ଦଗାଁରେ ଏମିତି ଏକ ଘଟଣା ଦେଖିବାକୁ ମିଳିଛି ଯାହା ସମସ୍ତଙ୍କ ଆଖିରେ ଲୁହ ଆଣି ଦେଇଛି। ସୁଜର ତିଓ୍ବାରୀ(୩୦) ଜଣେ ଲୋକଗୀତ ଗାୟକ ଥିଲେ। ତାଙ୍କର ଇଚ୍ଛା ଥିଲା ଶେଷ ସମୟରେ ତାଙ୍କ ନିକଟରେ ‘ଚୋଲା ମାଟି କେ ରାମ’ ଲୋକଗୀତ ଗାନ କରାଯିବ। ଏକଥା ସେ ଆଗରୁ ସମସ୍ତଙ୍କୁ କହି ଆସୁଥିଲେ। ଶନିବାର ତାଙ୍କର ଅସମୟରେ ମୃତ୍ୟୁ ହୋଇଯାଇଥିଲା। ସବୁ କୋହକୁ ଛାତିରେ ଚାପିଧରି ଲୋକଗୀତ ଗାୟୀକା ତଥା ସୁରଜଙ୍କ ମା’ ପୁନମ ତିଓ୍ବାରୀ ପୁଅର ଶେଷ ଇଚ୍ଛା ପୁରଣ କରିଥିଲେ। ପୁଅର ଶେଷ ଯାତ୍ରା ପୂର୍ବରୁ ସେ ତାଙ୍କ ନିକଟରେ ତାଙ୍କର ପ୍ରିୟ ଲୋକଗୀତ ଗାଇ ଥିଲେ। ପୁନମ ‘ଚୋଲା ମାଟି କେ ରାମ’ ଲୋକଗୀତକୁ ମଞ୍ଚ ଉପରେ ବହୁବାର ଗାଇ ସାରିଥିଲେ ବି ପୁଅଙ୍କ ଅନ୍ତିମ ଯାତ୍ରା ସମୟରେ ଯେତେବେଳେ ଗାଇଥିଲେ ସେତେବେଳେ ସେଠାରେ ଉପସ୍ଥିତ ଥିବା ଲୋକେ କୋହ ସମ୍ବରଣ କରି ପାରି ନ ଥିଲେ। ଆଉ ଏହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ସୁରଜ ହୃଦରୋଗରେ ପୀଡିତ ଥିବା ବେଳେ କିଛିଦିନ ହେବ ତାଙ୍କର ଏକ ଘରୋଇ ହସ୍ପିଟାଲରେ ଚିକିତ୍ସା ଚାଲୁଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଶନିବାର ତାଙ୍କର ଦେହାନ୍ତ ହୋଇଥିଲା।