ପଦ୍ମପୁର, ୩୧।୮ (ଡି.ଏନ.ଏ.) – ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ପଦ୍ମପୁର-ବିରସ ରାସ୍ତାରେ ଲଗାଯାଇଥିବା ସୂଚନା ଫଳକ ଲୋକଙ୍କୁ ଦ୍ୱନ୍ଦ୍ୱରେ ପକାଉଛି। ପୂର୍ତ୍ତ ବିଭାଗ ଅଧୀନରେ ଥିବା ଏହି ୧୮ କି.ମି. ରାସ୍ତାର ଏବେ ପୁନଃନିର୍ମାଣ ଓ ମରାମତି ଚାଲିଛି। ବିଭିନ୍ନ ଛକରୁ ଦୂରତାକୁ ଆଗରୁ ଏକ ପଥର ଖୁଣ୍ଟରେ ଲେଖାଯାଉଥିବା ବେଳେ ଏବେ ପୂର୍ତ୍ତ ବିଭାଗ ପକ୍ଷରୁ ଲଗାଯାଉଛି ସୂଚନା ଫଳକ। ସୂଚନା ଦେଉଥିବା ଏହି ବୋର୍ଡରେ ବିଭିନ୍ନ ସ୍ଥାନର ଦୂରତାକୁ ଭୁଲ୍ ଭାବେ ଲେଖାଯାଇଥିବା ଅଭିଯୋଗ ଆସିଛି, ଯାହାକୁ ନେଇ ଦ୍ୱନ୍ଦ୍ୱରେ ପଡୁଛନ୍ତି ଜନସାଧାରଣ।
ପ୍ରକାଶ ଯେ, ଏହି ରାସ୍ତାରେ ଯାତାୟାତ କରୁଥିବା ଜନସାଧାରଣ ଜଗନ୍ନାଥପ୍ରସାଦର ହତାଶିଆ ଛକଠାରେ ଲଗାଯାଇଥିବା ଏକ ଫଳକରେ ବିରସ ୧୦ କି.ମି.ଦୂରତା ଲେଖାଯାଇଥିବା ବେଳେ ୪ କି.ମି. ଦୂରରେ ବାଲିମେଦ ଛକଠାରେ ମଧ୍ୟ ଆଉ ଏକ ଫଳକରେ ବିରସ ୧୦ କି.ମି., ବାସୁଦେବପୁର ୪ କି.ମି. ଓ ଚାରବାଟିଆ ୧୨ କି.ମି. ବୋଲି ଲେଖାଯାଇଛି। ପ୍ରକୃତରେ ବାଲିମେଦ ଛକଠାରୁ ବିରସ ୬ କି.ମି., ଚାରବାଟିଆ ୨ କି.ମି. ଓ ବାସୁଦେବପୁର ୧୮ କି.ମି. ଦୂର ବୋଲି ଜଣାପଡ଼ିଛି। ଏଭଳି ଭୁଲ୍ ସୂଚନାକୁ ନେଇ ରାସ୍ତାରେ ଯାତାୟାତ କରୁଥିବା ଜନସାଧାରଣ ଓ ପଥଚାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପୂର୍ତ୍ତ ବିଭାଗ ଏଥିପ୍ରତି ଦୃଷ୍ଟି ଦେଇ ଫଳକରେ ଥିବା ଭୁଲ୍କୁ ସଂଶୋଧନ କରିବାକୁ ବାଲିମେଦ ସରପଞ୍ଚ ପ୍ରଫୁଲ୍ଲ କୁମାର ପଳିତା, ସମିତିସଭ୍ୟ ସସ୍ମିତା ପଟ୍ଟନାୟକଙ୍କ ସମେତ ଗ୍ରାମବାସୀ ଦାବି କରିଛନ୍ତି।