ଗାଜିଆବାଦ,୨୭।୧୧: ରଖିଲେ ହରି ମାରିବ କିଏ। ଏହି ଉକ୍ତିଟି ସଫଳ ହୋଇଥିବା ଦେଖିବାକୁ ମିଳିଛି ଉତ୍ତରପ୍ରଦେଶ ଗାଜିଆବାଦରେ। ରାଜନଗରର ନୋଏଡ଼ା ସେକ୍ଟର-୬୨ରେ ସଫ୍ଟୱେୟାର ଇଞ୍ଜିନିୟର ରାହୁଲ ସିଂହ ଓ ତାଙ୍କ ସ୍ତ୍ରୀ ରୁହନ୍ତି। ରାହୁଲ ଏକ ନେଟୱର୍କିଂ କମ୍ପାନୀରେ କାମ କରୁଥିବା ବେଳେ ତାଙ୍କ ସ୍ତ୍ରୀ ଶିକ୍ଷୟିତ୍ରୀ। ସୋମବାର ରାତିରେ ରାହୁଲ ଖଟ ଉପରେ ବସି ଲ୍ୟାପ୍ଟପରେ କାମ କରୁଥିଲେ। ଏହାପରେ ଲ୍ୟାପ୍ଟପକୁ ସ୍ଲିପ ମୋଡ୍ରେ ଛାଡ଼ି ଶୋଇ ପଡ଼ିଥିଲେ। ମଙ୍ଗଳବାର ସକାଳେ ଘରେ ସେ ଏକୁଟିଆ ଥିବା ବେଳେ ନିଃଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ କରିଥିଲେ। ହଠାତ୍ ଉଠି ଦେଖିବା ବେଳକୁ ଘରସାରା ଧୂଆଁରେ ଭର୍ତ୍ତି ହୋଇଯାଇଥିଲା। ଏହାର କିଛି ସମୟ ପରେ ଲ୍ୟାପ୍ଟପରେ ବିସ୍ଫୋରଣ ଘଟି ଘରସାରା ନିଆଁ ଲାଗିଯାଇଥିଲା। ଏହି ଅଗ୍ନିକାଣ୍ଡ ଯୋଗୁ ଘରର ସମସ୍ତ ଜିନିଷ ପୋଡିପାଉଁଶ ହୋଇଯାଇଥିଲା। ତେବେ କିଛି ଉପାୟ ନ ପାଇ ରାହୁଲ ବାଲକୋନିରୁ ଓହ୍ଲାଇ ସିକ୍ୟୁରିଟି ଗାର୍ଡକୁ ଚିତ୍କାର କରି ଡାକିଥିଲେ ଏବଂ ଘଟଣା ସମ୍ପର୍କରେ କହିଥିଲେ। ଏହାପରେ ଖବରପାଇ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହ ରାହୁଲଙ୍କୁ ଉଦ୍ଧାର କରିଥିଲା।