ବ୍ରହ୍ମପୁର ଅଫିସ,୧୬ା୫: ବ୍ରହ୍ମପୁର ବଡ଼ବଜାର ଅଞ୍ଚଳର ଶଙ୍କରପୁର ସାହିକୁ ସଂଯୋଗ କରୁଥିବା ରାସ୍ତାଗୁଡିକୁ ଶୁକ୍ରବାର ବିଳମ୍ବିତ ରାତିରୁ ସିଲ୍ କରିଛି ବ୍ରହ୍ମପୁର ମହାନଗର ନିଗମ(ବିଏମସି)। ଶନିବାରଠାରୁ କଣ୍ଟ୍ରୋଲ ଜୋନ୍ ମଧ୍ୟରେ ରହିଥିବା ସମସ୍ତ ପରିବାରଙ୍କୁ ହୋମ୍ କ୍ୱାରାଣ୍ଟାଇନ୍ରେ ରହିବାକୁ ନିର୍ଦ୍ଦେଶ ଦିଆଯିବା ସହ ସେମାନଙ୍କ ନିକଟରେ ଅତ୍ୟାବଶ୍ୟକୀୟ ସାମଗ୍ରୀ ପହଞ୍ଚାଇବା ନେଇ ବିଏମ୍ସି ପକ୍ଷରୁ ପଦକ୍ଷେପ ନିଆଯାଇଛି।ଅତ୍ୟାବଶ୍ୟକୀୟ ସାମଗ୍ରୀ ପାଇଁ ଯଷ୍ଟରିଚ୍ ଆପ୍ ଅଥବା ଟେଲିଫୋନ ନଂ-୭୦୭୭୦୨୪୨୬୭ ଯୋଗେ ଯୋଗାଯୋଗ କରିବାକୁ ବିଏମ୍ସି ପକ୍ଷରୁ କୁହାଯାଇଥିବା କମିଶନର ଚକ୍ରଓ୍ବର୍ତ୍ତୀ ସିଂ ରାଠୋର ସୂଚାନା ଦେଇଛନ୍ତି ।ଏତଦ୍ବ୍ୟତୀତ କଣ୍ଟ୍ରୋଲ ଜୋନ୍ ମଧ୍ୟରେ ରହିଥିବା ଶଙ୍କରପୁର ସାହିର ୮୫ ପରିବାରର ୩୭୦ ଲୋକଙ୍କ ଶନିବାର ସ୍ବାସ୍ଥ୍ୟପରୀକ୍ଷା ହୋଇଥିବା ବେଳେ ସନ୍ଧ୍ୟା ସୁଦ୍ଧା ୬ ଜଣଙ୍କ ସ୍ବାବ୍ ନମୁନା ପରୀକ୍ଷା ପାଇଁ ପଠାଯାଇଛି। ଜୋନ୍ ମଧ୍ୟରେ ଥିବା ସମସ୍ତ ଲୋକଙ୍କ ସ୍ବାସ୍ଥ୍ୟ ଅବସ୍ଥା ଉପରେ ନଜର ରଖିବା ପାଇଁ ୫ ମେଡିକାଲ ଟିମ୍କୁ ନିୟୋଜିତ କରାଯାଇଥିବା କମିଶନର ସୂଚାଇଛନ୍ତି। ଜୋନ୍ ମଧ୍ୟରେ ହୋମ୍ କ୍ବାରାଣ୍ଟାଇନ୍ରେ ରହିଥିବା ବେଳେ ୩ ଫଳ ଗୋଦାମ, ୩ଟ୍ରାନ୍ସପୋର୍ଟ ଗୋଦାମ, କିଛି ହଳଦୀଗୁଣ୍ଡ ଓ ଲଙ୍କାଗୁଣ୍ଡ ହୋଲସେଲ ଦୋକାନ ଜୋନ ମଧ୍ୟରେ ରହିଥିବା ଜଣାପଡ଼ିଛି।
ସୂଚନାଯୋଗ୍ୟ, କୋଭିଡ୍-୧୯ ସଂକ୍ରମିତଙ୍କ ସଂସ୍ପର୍ଶରେ ବ୍ରହ୍ମପୁର ବଡ଼ବଜାର ଅଞ୍ଚଳର ଶଙ୍କରପୁର ସାହିର କିଛି ଲୋକ ଆସିଥିବା ଶୁକ୍ରବାର ସୂଚନା ମିଳିଥିଲା। ଏହାପରେ ବିଏମ୍ସି ପକ୍ଷରୁ ଶୁକ୍ରବାର ବିଳମ୍ବିତ ରାତିରେ ଶଙ୍କରପୁର ସାହିକୁ ଆସେସ୍ କଣ୍ଟ୍ରୋଲ ଜୋନ୍ ଭାବେ ଘୋଷଣା କରାଯାଇଥିଲା। ସାହିର ସମସ୍ତ ପରିବାରଙ୍କୁ ହୋମ୍ କ୍ବାରାଣ୍ଟାଇନ୍ରେ ରହିବାକୁ ନିର୍ଦ୍ଦେଶ ଦିଆଯାଇଥିଲା। ଉକ୍ତ ସାହିର ସ୍ଥିତି ଅନୁଧ୍ୟାନ କରିବା ନେଇ ବିଏମ୍ସିର ୪ ଅଧିକାରୀଙ୍କୁ ନୋଡାଲ ଅଫିସର ଭାବେ ଦାୟିତ୍ୱ ପ୍ରଦାନ କରାଯାଇଥିଲା।
