ଭୁବନେଶ୍ୱର, ୫ା୪ (ବ୍ୟୁରୋ): ଭୁବନେଶ୍ୱରର ବମିଖାଲ ଓ ସୂର୍ଯ୍ୟନଗରରୁ ୧୧ ଜଣ କରୋନାରେ ଆକ୍ରାନ୍ତ ଚିହ୍ନଟ ହେବା ପରେ ଉଭୟ ଅଞ୍ଚଳକୁ ସିଲ୍ କରିବା ସହ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ନିଷିଦ୍ଧାଞ୍ଚଳ ଘୋଷଣା କରାଯାଇଛି । ସିଲ୍ ସମୟରେ ଲୋକଙ୍କୁ ଅତ୍ୟାବଶ୍ୟକ ସେବା ଯୋଗାଇବା ପାଇଁ ଭୁବନେଶ୍ୱର ମହାନଗର ନିଗମ (ବିଏମ୍ସି) ଦାୟିତ୍ୱ ନେଇଛି । ହେଲେ ଲକ୍ଡାଉନ୍ ସହ ଶଟ୍ଡାଉନ୍ ଘୋଷଣା ହେବା ପରେ ସମ୍ପୃକ୍ତ ଅଞ୍ଚଳରେ ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ ମିଳିପାରି ନ ଥିବା ଅଭିଯୋଗ ହୋଇଛି । ଅତ୍ୟାବଶ୍ୟକ ସାମଗ୍ରୀ ପାଇଁ ସୂର୍ଯ୍ୟନଗରରୁ ୪ କଲ୍ ଓ ବମିଖାଲରୁ ୨ କଲ୍ ବିଏମ୍ସି ଅଧିକାରୀଙ୍କୁ କରାଯାଇଛି । ବିଶେଷ କରି କ୍ଷୀର, ଅଟା ଓ ଅଣ୍ଡା ପାଇଁ ଏହି କଲ୍ ଆସିଥିବାବେଳେ ଶଟ୍ ଡାଉନ ଥିବାରୁ ସେମାନଙ୍କୁ ସାମଗ୍ରୀ ମିଳିପାରି ନ ଥିବା ବିଏମ୍ସି ପକ୍ଷରୁ ଜଣାପଡ଼ିଛି ।
ଆତ୍ୟାବଶ୍ୟକ ସାମଗ୍ରୀ ପହଂଚାଇବା ଦାୟିତ୍ୱରେ ଥିବା ଡେପୁଟି କମିଶନର କମଲଜିତ୍ ଦାସ କହିଛନ୍ତି, ଶଟ୍ଡାଉନ୍ ପୂର୍ବରୁ ବିଏମ୍ସି ଦିନକୁ ଦୁଇଥର ରାଶନ ଓ ଅନ୍ୟ ସାମଗ୍ରୀ ଘର ଦୂଆର ମୁହଁରେ ବିକ୍ରି କରିବାକୁ ଯାଇଥିଲା । ହେଲେ ଶଟ୍ଡାଉନ୍ ସମୟରେ ଦୋକାନ ବଜାର ବନ୍ଦ ଥିବାରୁ ଏହି ସାମଗ୍ରୀ ଉପଲବ୍ଧ ହୋଇପାରି ନାହିଁ । ତେବେ ୪୮ ଘଣ୍ଟାର ଶଟ୍ଡାଉନ୍ ପରେ ଲୋକଙ୍କୁ ପୁନର୍ବାର ନିୟମିତ ସେବା ଯୋଗାଇ ଦିଆଯିବ ବୋଲି ସେ କହିଛନ୍ତି । ସେହିପରି ଲୋକଙ୍କ ପ୍ରାଥମିକତା ପ୍ରତି ବିଏମ୍ସି ବିଶେଷ ଭାବେ ଗୁରୁତ୍ୱ ଦେଉଛି । କିନ୍ତୁ କରୋନା ସଂକ୍ରମଣକୁ ଏଡ଼ାଇବା ପାଇଁ ହେଲେ ଶଟ୍ଡାଉନ୍କୁ ମାନିବାକୁ ପଡ଼ିବ । ବିଏମ୍ସି କର୍ମଚାରୀମାନେ ଶଟ୍ଡାଉନ୍ରେ ସେବା ଯୋଗାଉଛନ୍ତି । ସହରକୁ ବିଷୋଧନ ଓ ସିଂଚନ କରିବା କରିବା ସହ କେମିକାଲଯୁକ୍ତ ଧୁଆଁ ଦ୍ୱାରା ମଧ୍ୟ ବିଷୋଧନ କରୁଛନ୍ତି । ହେଲେ ଯାତାୟତର ସୁବିଧା ନ ଥିବା ସହ ଅନ୍ୟ କେତେକ ସମସ୍ୟା ପାଇଁ ସମ୍ପୃକ୍ତ ଅଂଚଳରେ ଅତ୍ୟାବଶ୍ୟକ ସାମଗ୍ରୀ ପହଂଚି ପାରି ନାହିଁ ବୋଲି ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି ।