ଭୁବନେଶ୍ୱର, ୫ା୬(ବ୍ୟୁରୋ) – ଆସନ୍ତା ୩୦ ତାରିଖ ପର୍ଯ୍ୟନ୍ତ ୧୧ ଜିଲାରେ ପ୍ରତି ଶନିବାର ଓ ରବିବାରକୁ ଶଟ୍ଡାଉନ ଘୋଷଣା କରିଛନ୍ତି ରାଜ୍ୟ ସରକାର। ଏହା ମଧ୍ୟରେ କଟକ ଓ ଭୁବନେଶ୍ୱର ରହୁଥିବାରୁ କମିଶନରେଟ ପୋଲିସ ପକ୍ଷରୁ ନୂଆ ଗାଇଡ୍ଲାଇନ୍ ଜାରି କରାଯାଇଛି। ଏହି ସମୟରେ କେଉଁମାନେ ଯିବାଆସିବା କରିପାରିବେ ସେସମ୍ପର୍କରେ ସୂଚନା ଦିଆଯାଇଛି। ସ୍ବାସ୍ଥ୍ୟ କର୍ମଚାରୀ ପରିଚୟପତ୍ର ଓ ଗାଡି ପାସ୍ ଦେଖାଇ ଯାଇପାରିବେ। ଫାର୍ମାସିଷ୍ଟ ଓ ଔଷଧ ଦୋକାନ ପାଇଁ ଟ୍ରେଡ୍ ଲାଇସେନ୍ସ ଓ ପୁରୁଣା ପାସ୍ କାର୍ଯ୍ୟ କରିବ। ସେହିପରି ରାଜ୍ୟ ଓ କେନ୍ଦ୍ରସରକାରଙ୍କ କର୍ମଚାରୀ ବିଭାଗୀୟ ପରିଚୟ ପତ୍ର ଦେଖାଇ ଯାଇପାରିବେ। ଟେଲିକମ୍, ପେଟ୍ରୋଲ ପମ୍ପ, ହୋମ୍ ଡେଲିଭରି କରୁଥିବା ସଂସ୍ଥାର କର୍ମଚାରୀଙ୍କ ସମେତ ଗଣମାଧ୍ୟମ ପ୍ରତିନିଧି,କର୍ମଚାରୀ ଓ ହକର ସେମାନଙ୍କ ସଂସ୍ଥାର ପରିଚୟପତ୍ର ଦେଖାଇ ଯାତାୟାତ କରିପାରିବେ। ଜଳ ଯୋଗାଣ, ପରିମଳ ଓ ସ୍ବେରେଜ କର୍ମଚାରୀ ମୁନିସିପାଲିଟି ପ୍ରଦତ୍ତ ପରିଚୟପତ୍ର ଦେଖାଇବେ। ବିଦ୍ୟୁତ୍ କର୍ମଚାରୀ, କାରଖାନା ଓ ନିର୍ମାଣ ସଂସ୍ଥାର କର୍ମଚାରୀ ଏବଂ ଶ୍ରମିକ କମ୍ପାନୀ ପରିଚୟପତ୍ର ଦେଖାଇ ଯାଇପାରିବେ।
ସେହିପରି ଆଇଟି ଶିଳ୍ପ, ହୋଟେଲ ଓ ଅନ୍ୟ ସଂସ୍ଥାର କର୍ମଚାରୀ ପରିଚୟପତ୍ର ଦେଖାଇ ଯାତ୍ରା କରିପାରିବେ। ଟ୍ୟାକ୍ସି, ଅଟୋ, ଓଲା ଏବଂ ଉବର କ୍ୟାବ ଚାଳକ ପୋଲିସ ପ୍ରଦତ୍ତ ପାସ୍ ଦେଖାଇ ଯାଇପାରିବେ। ବିବାହ ଏବଂ ଶବଦାହ ପାଇଁ ପୋଲିସ ପ୍ରଦତ୍ତ ପାସ୍ କାର୍ଯ୍ୟ କରିବ। ଭୁବନେଶ୍ୱରରୁ କଟକକୁ ଯିବାକୁ ଚାହୁଁଥିଲେ ଏବଂ ଅନ୍ୟ ଜରୁରୀ କାର୍ଯ୍ୟ ପାଇଁ ୧୦୦କୁ ଫୋନ୍ କରିବାକୁ ହେବ। ଅନୁମୋଦିତ ମେସେଜ ମିଳିବା ପରେ ତାହାକୁ ଦେଖାଇ ଯାଇପାରିବେ। ଅନ୍ୟପକ୍ଷରେ ଶଟ୍ଡାଉନ୍ରେ ସବୁ ଛକରେ ପୋଲିସ କଡାକଡି ଯାଞ୍ଚ କରାଯିବ। ଯେଉଁମାନେ ବିନା କାର୍ଯ୍ୟରେ କୋଭିଡ୍ ନିୟମ ଓ କଟକଣା ଉଲ୍ଲଂଘନ କରି ବାହାରେ ବୁଲୁଥିବା ନଜରକୁ ଆସିବ ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେବାକୁ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ନିର୍ଦ୍ଦେଶ ଦେଇଛନ୍ତି।