କଟକ ଅଫିସ, ୨୨।୧୨- ବାରବାଟୀ ଦିନିକିଆ ମ୍ୟାଚ୍ ଭାରତୀୟ ଚାଇନାମ୍ୟାନ ବୋଲର କୁଲଦୀପ ଯାଦବଙ୍କ ପାଇଁ ସ୍ମରଣୀୟ ହୋଇପାରେ। ବିଶାଖାପାଟଣାରେ ଅନୁଷ୍ଠିତ ମ୍ୟାଚ୍ରେ ହ୍ୟାଟ୍ରିକ ଉଇକେଟ୍ ଅକ୍ତିଆର କରିଥିବା କୁଲଦୀପ ଦିନିକିଆରେ ବର୍ତ୍ତମାନ ସୁଦ୍ଧା ୫୫ ମ୍ୟାଚ୍ରୁ ୯୯ ଉଇକେଟ୍ ହାସଲ କରିସାରିଲେଣି। ଯଦି କଟକରେ କୁଲଦୀପ ଆଉ ଗୋଟିଏ ଉଇକେଟ୍ ହାସଲ କରନ୍ତି ତେବେ ଦିନିକିଆରେ ସେ ୧୦୦ ଉଇକେଟ୍ କ୍ଲବରେ ସାମିଲ ହେବେ। ଏଥିସହ ଦିନିକିଆରେ ୧୦୦ ଉଇକେଟ୍ ହାସଲ କରିବାରେ ସେ ଭାରତର ଯୁଗ୍ମ ଦ୍ରୁତତମ ବୋଲର ହେବେ। ପୂର୍ବରୁ ଭାରତ ପକ୍ଷରୁ ମହମ୍ମଦ ସାମିଙ୍କ ନାମରେ ଦ୍ରୁତତମ ଦିନିକିଆ ୧୦୦ ଉଇକେଟ୍ ହାସଲ ରେକର୍ଡ ରହିଛି। ସାମି ୫୬ ମ୍ୟାଚ୍ ଖେଳି ଏହି ମାଇଲଷ୍ଟୋନ ଛୁଇଁଥିଲେ। ସାମିଙ୍କ ସହ ସମକକ୍ଷ ହେବାକୁ ଏବେ କୁଲଦୀପଙ୍କ ନିକଟରେ ସୁଯୋଗ ରହିଛି।