ବଇଣ୍ଡା,୧୫।୯(ଡି.ଏନ.ଏ.)-କିଶୋରନଗର ବ୍ଲକ ନୁନୁକାପଶି ପଞ୍ଚାୟତରେ ଥିବା ଚନ୍ଦନ ପୋଖରୀରେ ୫୫ ନଂ. ଜାତୀୟ ରାଜପଥ ସମ୍ପ୍ରସାରଣ କରୁଥିବା ଠିକାସଂସ୍ଥା ପକ୍ଷରୁ ଶୁକ୍ରବାରଠାରୁ ରବିବାର ୩ ଦିନ ଧରି ବିଷାକ୍ତ ବସ୍ତୁ ପକାଯାଉଛି। ଫଳରେ ପୋଖରୀ ପାଣି ବିଷାକ୍ତ ହେବାସହିତ ଶତାଧିକ ମାଛ ରବିବାର ସକାଳେ ମରି ଭାସୁଥିବା ଦେଖିବାକୁ ମିଳିଛି। ଏ ନେଇ ପୋଖରୀକୁ ନିଲାମ ନେଇଥିବା ଶରଧାମୁଣ୍ଡା ଗ୍ରାମର ସୁରଥ ପ୍ରଧାନ ହଣ୍ଡପା ଥାନାରେ ଠିକାସଂସ୍ଥା ନାମରେ ଲିଖିତ ଅଭିଯୋଗ କରିଛନ୍ତି।
ଘଟଣାରୁ ଜଣାପଡ଼ିଛି, ଚଳିତ ମାସ ୧୧,୧୨,୧୩ ତାରିଖରେ ପ୍ରଶାସନ ଓ ଠିକାସଂସ୍ଥା ପକ୍ଷରୁ ବଇଣ୍ଡା ଛକ ଅଞ୍ଚଳରେ ଥିବା ଦୋକାନ ଓ ବାସ ଗୃହ ଉଚ୍ଛେଦ କରାଯାଇଥିଲା। ଏଥିରୁ ବାହାରିଥିବା ଅଶଂବିଶେଷ ଓ ବିଷାକ୍ତ ବସ୍ତୁ ଗୁଡ଼ିକ ଠିକାସଂସ୍ଥା ପକ୍ଷରୁ ଚନ୍ଦନ ପୋଖରୀରେ ପକାଯାଇଛି। ଫଳରେ ଶହ ଶହ ମାଛ ମରି ଯାଇଛନ୍ତି। ଏହି ପୋଖରୀରେ ବଇଣ୍ଡା, ନୁନୁକାପଶି, ଶଙ୍ଖାରୀସାହି, ଦଳିତସାହି ଆଦି ଗ୍ରାମବାସୀ ଶୌଚ କରୁଥିବାବେଳେ ଏବେ ବିଭିନ୍ନ ରୋଗରେ ଆକ୍ରାନ୍ତ ହେବେ ବୋଲି ସନ୍ଦେହ କରାଯାଉଛି। ତୁରନ୍ତ ଠିକାସଂସ୍ଥା ପକ୍ଷରୁ ପୋଖରୀ ପାଣିକୁ ଶୁଦ୍ଧ କରିବା ସହ ବିଷାକ୍ତ ବସ୍ତୁ ଅନ୍ୟତ୍ର ପକାଇବା ପାଇଁ ବଇଣ୍ଡା ଗ୍ରାମବାସୀ ଦାବି କରିଛନ୍ତି। ଏ ନେଇ ନୁନୁକାପଶି ସରପଞ୍ଚ ଜଳଧର ସାହୁ କହିଛନ୍ତି, ୨୦୧୮ରେ ଉକ୍ତ ପୋଖରୀରେ ଉକ୍ତ ଠିକାସଂସ୍ଥା ପକ୍ଷରୁ ବିଷାକ୍ତ ବସ୍ତୁ ପକାଯାଇଥିବାବେଳେ ପଞ୍ଚାୟତ ପକ୍ଷରୁ ମନା କରାଯାଇଥିଲା। ପୁଣି ୩ଦିନ ହେବ ବିଷାକ୍ତ ବସ୍ତୁ ଠିକାସଂସ୍ଥା ପକ୍ଷରୁ ଜୋର ଜବରଦସ୍ତ ପକାଯାଉଛି। ଫଳରେ ପୋଖରୀ ପାଣି ବିଷାକ୍ତ ହେବାସହ ମଛ ମରି ଭାସୁଥିବା ଦେଖିବାକୁ ମିଳିଛି। ଏ ନେଇ ପଞ୍ଚାୟତ ପକ୍ଷରୁ ଆଠମଲ୍ଲିକ ଉପଜିଲାପାଳ, କିଶୋରନଗର ବିଡିଓ, ତହସିଲଦାରଙ୍କୁ ଅବଗତ କରାଯାଇଛି। ଠିକାସଂସ୍ଥା ନାମରେ ମାମଲା ରୁଜୁ କରାଯିବ। ଏ ନେଇ ଆଠମଲ୍ଲିକ ଉପଜିଲାପାଳ ଡ. ରଜନୀକାନ୍ତ ବିଶ୍ୱାଳ କହିଛନ୍ତି, ଚନ୍ଦନ ପୋଖରୀରେ ବର୍ଜ୍ୟବସ୍ତୁ ପକାଇବା ପାଇଁ କାହାରିକୁ ନିର୍ଦ୍ଦେଶ ଦିଆଯାଇନାହିଁ। ଉକ୍ତ ପୋଖରୀରେ ସର୍ବସାଧାରଣ ଲୋକ ନିର୍ଭର କରୁଛନ୍ତି। ଠିକାସଂସ୍ଥା ସେଠାରେ ବିଷାକ୍ତ ବସ୍ତୁ ନ ପକାଇବା ପାଇଁ ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଛି। ଘଟଣାର ତଦନ୍ତ କରାଯିବ।
