କୋଣାର୍କ,୩୧।୧(ଡି.ଏନ୍.ଏ.): ପୁରୀ ଜିଲା କୋଣାର୍କ ପ୍ରସିଦ୍ଧ ମାଘବୁଡ଼ ଲାଗି ପ୍ରଶାସନିକ କ୍ଷେତ୍ରରେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଶନିବାର ପ୍ରାତଃରେ ଚନ୍ଦ୍ରଭାଗା ପବିତ୍ର ପୁଷ୍କରିଣୀରେ ଶ୍ରଦ୍ଧାଳୁମାନେ ବୁଡ଼ ପକାଇବେ। ଏହାପୂର୍ବରୁ ଶୁକ୍ରବାର କୋଣାର୍କକୁ ଶ୍ରଦ୍ଧାଳୁମାନଙ୍କ ଆଗମନ ଲାଗି ରହିଛି। ତେବେ ଚଳିତ ବର୍ଷ ବାରୁଡ଼ି ବୁଡ଼ ପଡ଼ୁଥିବାରୁ ୫ ଲକ୍ଷରୁ ଅଧିକ ଲୋକଙ୍କ ସମାଗମ ହେବା ଅନୁମାନ କରାଯାଉଛି। ଏଥିନିମନ୍ତେ ପ୍ରଶାସନିକ ତରଫରୁ ଟ୍ରାଫିକ ନିୟନ୍ତ୍ରଣ ସହ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।
ମାଘ ମାସ ସପ୍ତମୀ ତିଥିରେ ଚନ୍ଦ୍ରଭାଗା ପବିତ୍ର ପୁଷ୍କରିଣୀରେ ବୁଡ଼ ପକାଇଲେ ପାପ ନାଶ ଓ ମନସ୍କାମନା ପୂର୍ଣ୍ଣ ହେବା ସହ ଆରୋଗ୍ୟ ରହିବାର ବିଶ୍ୱାସ ରହିଛି। ଏହାକୁ ନେଇ ପୁଷ୍କରିଣୀକୁ ବାରିକେଡ ଦ୍ୱାରା ଘେରାଯାଇଛି। ଶ୍ରଦ୍ଧାଳୁମାନଙ୍କ ସୁରକ୍ଷାକୁ ନେଇ ପୋଲିସ ପ୍ରଶାସନ ପକ୍ଷରୁ ପୁରୀ ଏସ୍ପିଙ୍କ ସମେତ ଡେପୁଟି କମାଣ୍ଡନାଣ୍ଟ, ୨ଜଣ ଆଡିସିନାଲ ଏସ୍ପି, ୮ଜଣ ଡିଏସ୍ପି, ୨୫ଜଣ ଇନ୍ସପେକ୍ଟର ଉପସ୍ଥିତ ରହିଛନ୍ତି। ଏହାଛଡ଼ା ୨୮ ପ୍ଲାଟୁନ ପୋଲିସ ଫୋର୍ସ ନିୟୋଜିତ କରାଯାଇଛି। ପୁରୀ କୋଣାର୍କ ଏବଂ ପିପିଲି ରାସ୍ତାରେ ଟ୍ରାଫିକ ବ୍ୟବସ୍ଥା କଡ଼ାକଡ଼ି କରାଯାଇଥିବା ସୂଚନା ମିଳିଛି।