କିଛିବର୍ଷ ପୂର୍ବରୁ ଲୋକମାନେ ମାଟି ବା କାଚ ପାତ୍ରରେ ଚା’ ପିଉଥିଲେ। ହେଲେ ଆଧୁନିକ ଯୁଗରେ ମାଟି ବା କାଚ ପାତ୍ରର ସ୍ଥାନ ନେଇଛି ଥର୍ମୋକୋଲ ଓ ପ୍ଲାଷ୍ଟିକ କପ୍। ଏହା ଆଖିକୁ ସୁନ୍ଦର ଦେଖାଯିବା ସହ ବ୍ୟବହାରରେ ସହଜ ହେଉଥିବାରୁ ଲୋକମାନେ ଏହାର ବହୁଳ ବ୍ୟବହାର କରୁଛନ୍ତି। ଆଜିକାଲି ଥର୍ମୋକୋଲ ଓ ପ୍ଲାଷ୍ଟିକ କପ୍ର ବ୍ୟବହାର କେବଳ ବଜାରରେ ନୁହେଁ, ବିବାହ ବ୍ରତ ବା ଘରେ କୌଣସି ପାର୍ଟିରେ ମଧ୍ୟ କରାଯାଉଥିବା ଦେଖିବାକୁ ମିଳୁଛି। ବଜାରରେ ଆମେ ଚା’ ପିଇଲା ବେଳେ ପ୍ଲାଷ୍ଟିକ ବା ଥର୍ମୋକୋଲ କପ୍ରେ ଚା’ ପିଇଥାଉ। ହେଲେ ଜାଣିଛନ୍ତି କି, ଏହା ଶରୀର ପାଇଁ କେତେ କ୍ଷତିକାରକ। ଲଗାତର ଭାବେ ଏହି ପାତ୍ରରେ ଚା’ ପିଇଲେ କ୍ୟାନ୍ସର ଭଳି ରୋଗ ହେବାର ଆଶଙ୍କା ବୃଦ୍ଧିପାଇଥାଏ ବୋଲି ବିଶେଷଜ୍ଞଙ୍କ ମତ ପ୍ରକାଶ ପାଇଛି। ତେବେ ଆସନ୍ତୁ ଜାଣିବା ଏହାର ବହୁଳ ବ୍ୟବହାର ଦ୍ୱାରା କ’ଣ କ’ଣ କ୍ଷତି ହୋଇଥାଏ।
*ଡାକ୍ତରଙ୍କ କହିବା ଅନୁସାରେ ଏହି ପାତ୍ର ପଲିଷ୍ଟିରେନ୍ରୁ ତିଆରି ହୋଇଥାଏ, ଯାହା ଆମ ଶରୀର ପାଇଁ ବହୁତ ହାନିକାରକ ହୋଇଥାଏ। ଗରମ ଚା’ କି କଫି ଏହି କପ୍ରେ ପିଇବା ଯୋଗୁ ଅନେକ ହାନିକାରକ ତତ୍ତ୍ୱ ଆମ ଶରୀର ଭିତରକୁ ଚାଲିଯାଇଥାଏ। ଏହା ପରେ ମାରାତ୍ମକ ରୋଗର ରୂପ ନେଇପାରେ।
*ଏହି କପ୍ରେ ଚା’ ପିଇବା ଦ୍ୱାରା ଆଲର୍ଜି ମଧ୍ୟ ହୋଇପାରେ। ଯଦି ନିୟମିତ ଏହି କପ୍ରେ ଚା’ କି କଫି ପିଇବେ ତେବେ ଆଲର୍ଜି ସମସ୍ୟା ଦେଖାଦେବ। ଆଉ ଆପଣ ଜାଣି ମଧ୍ୟ ପାରିବେ ନାହିଁ କି କେଉଁ କାରଣରୁ ଆଲର୍ଜି ହେଉଛି।
*କେବଳ ସେତିକି ନୁହେଁ ପେଟ ଖରାପ ହେବା ପଛରେ ମଧ୍ୟ ଏହି କପ୍ ଦାୟୀ ହୋଇପାରେ। ଏହା ହାଇଜିନିକ ହୋଇ ନ ଥିବାରୁ ଖାଦ୍ୟ ହଜମ ହେବାରେ ମଧ୍ୟ ସମସ୍ୟା ସୃଷ୍ଟି କରିଥାଏ। ଏହି କପ୍ରେ ଗରମ ଚା’ କିମ୍ବା କଫି ଢାଳିବା ମାତ୍ରେ ଏଥିରେ ଥିବା ଜୀବାଣୁ ତରଳ ପଦାର୍ଥରେ ମିଶିଯାଇଥାଏ। ଆଉ ଏହା ପାଟି ଦ୍ୱାରା ଆମ ଶରୀରକୁ ଯାଇ ପେଟ ସମସ୍ୟା ଦେଖାଦେଇଥାଏ।
* ଏହି କପ୍ରେ ପିଇବା ଅଭ୍ୟାସ ନ ଛାଡ଼ିଲେ ଆପଣଙ୍କୁ ହାର୍ଟ ଓ ଡାଇବେଟିସ ସମ୍ବନ୍ଧୀୟ ରୋଗ ଭଳି ସମସ୍ୟା ସୃଷ୍ଟି କରିପାରେ। କେବଳ ବ୍ୟାକ୍ଟେରିଆ ନୁହେଁ ଏହି କପ୍ରେ ଗରମ ପଦାର୍ଥ ପିଇଲେ ଏସିଡ୍ ମଧ୍ୟ ପେଟ ଭିତରକୁ ଚାଲିଯାଏ।
*ଆଉ ଏହା ଯୋଗୁ କିଡ୍ନୀ ଏବଂ ଲିଭରରେ କ୍ୟାନ୍ସର ସମସ୍ୟା ବଢ଼ିଯାଏ। ଏହା କେବଳ ଆମ ଶରୀର ପାଇଁ ନୁହେଁ ପରିବେଶ ପାଇଁ ମଧ୍ୟ ଖରାପ ହୋଇଥାଏ। ମାଟିରେ ଏହା ସହଜରେ ମିଶି ପାରୁ ନ ଥିବାରୁ ପରିବେଶ ପ୍ରଦୂଷିତ ହୋଇଥାଏ।