ଭୁବନେଶ୍ୱର, ୨୩।୫(କ୍ରୀଡ଼ା ପ୍ରତିନିଧି):କୋଭିଡ-୧୯ରୁ ଶିକ୍ଷାକୁ ନେଇ ପ୍ରଥମଥର ପାଇଁ ଅନ୍ଲାଇନ୍ରେ ଏକ ଅନ୍ତର୍ଜାତୀୟ ଫିଲ୍ମ ଫେଷ୍ଟିଭାଲ ଅନୁଷ୍ଠିତ ହୋଇଛି। ଏଥିରେ ୩୫ଟି ଦେଶ ଅଂଶଗ୍ରହଣ କରିଛନ୍ତି। ୨ରୁ ୫ ମିନିଟ ବିଶିଷ୍ଟ ଶର୍ଟ ଫିଲ୍ମ ଏଥିରେ ସ୍ଥାନ ପାଇଛି। ପ୍ରାରମ୍ଭିକ ପର୍ଯ୍ୟାୟ ପରେ ୩ଟି ଚଳଚ୍ଚିତ୍ର ଶ୍ରେଷ୍ଠ ତାଲିକାରେ ଶର୍ଟଲିଷ୍ଟ ହୋଇଛି। ଏହା ମଧ୍ୟରେ ଭାରତର ଏକ ଚଳଚ୍ଚିତ୍ର ରହିଛି। ତାହା ହେଉଛି ଓଡ଼ିଶା ରୋଲର ସ୍କେଟିଂ ଆସୋସିଏଶନ ପକ୍ଷରୁ ପ୍ରସ୍ତୁତ ଫିଲ୍ମ ‘ପେସେନ୍ସ ଇନ୍ ଲକ୍ଡାଉନ୍’। ଅନ୍ୟ ୨ଟି ଚଳଚ୍ଚିତ୍ର ହେଲା ଆଫଗାନିସ୍ତାନର ‘ବ୍ୟାକ୍ ଇନ୍ସାଇଡ’ ଏବଂ ନରୱେର ‘ଗ୍ଲୋବାଲ ଇକୋସ୍ ଅଫ୍ ହାପିନେସ’। ଓଡ଼ିଶାର ୨ ଜାତୀୟ ସ୍କେଟର ଏବଂ ତାଙ୍କ ବାପାଙ୍କ ଉପରେ ଲକ୍ଡାଉନ୍ର ପ୍ରଭାବକୁ ନେଇ ସାମ୍ପ୍ରତିକ ଘଟଣା ଉପରେ ‘ପେସେନ୍ସ ଇନ୍ ଲକ୍ଡାଉନ୍’ ଆଧାରିତ। ତତ୍କ୍ଷଣାତ ସମ୍ଭବ ନ ହେଲେ ମଧ୍ୟ ପ୍ରତ୍ୟେକ କଷ୍ଟକର ଏବଂ ଦୁଃଖଦ ପରିସ୍ଥିତିରେ ମଧ୍ୟ ଆଶାର କିରଣ ରହିଥାଏ ବୋଲି ଏହି ଚଳଚ୍ଚିତ୍ରରେ ପ୍ରଦର୍ଶିତ ହୋଇଛି। ଓଡ଼ିଶା ରୋଲର ସ୍କେଟିଂ ଆସୋସିଏଶନ ଏହାର ପ୍ରାୟୋଜକ ରହିଥିବାବେଳେ ଏହାକୁ ରଚନା କରିଛନ୍ତି ସୌଦାମିନୀ ପାତ୍ର। ପ୍ରତୀକ ଅର୍ନବ, ପ୍ରୀତିଶ୍ ଆର୍ଯ୍ୟନ ଓ ପାର୍ଥସାରଥି ଜେନା ଏଥିରେ ଅଭିନୟ କରିଛନ୍ତି ।
କୋଭିଡ୍-୧୯ ଅନ୍ତର୍ଜାତୀୟ ଫିଲ୍ମ ଫେଷ୍ଟିଭାଲ(ସିଆଇଏଫଏଫ)ର ନିର୍ଦ୍ଦେଶକ ସତ୍ୟବ୍ରତ ଜେନା କହିଛନ୍ତି ଯେ, ସାମ୍ପ୍ରତିକ ସ୍ଥିତିରେ କଳା, ସାହିତ୍ୟ, ସଂସ୍କୃତି, ବ୍ୟବସାୟ ଏବ ଅର୍ଥନୀତି ଭୁଶୁଡ଼ି ପଡ଼ିଛି। ଏପରି ସ୍ଥିତିରେ ଏକ ଅନ୍ଲାଇନ୍ ପ୍ଲାଟ୍ଫର୍ମ ପ୍ରସ୍ତୁତ କରାଯାଇ କୋଭିଡ୍-୧୯ରୁ ଅନୁଭବ ଏବଂ ଅଭିଜ୍ଞତାକୁ ଏକ ଛୋଟ ଫିଲ୍ମ ମାଧ୍ୟମରେ ଶେୟାର କରିବାକୁ କୁହାଯାଇଛି। ଏହି ଫିଲ୍ମର ଅବଧି ୨ରୁ ୫ ମିନିଟ ମଧ୍ୟରେ ରହିବ। ଜୁରି କମିଟି ଶ୍ରେଷ୍ଠ ଚଳଚ୍ଚିତ୍ରକୁ ବାଛିବେ। ଏହାକୁ ଅନ୍ଲାଇନ୍ରେ ସମସ୍ତ ଅଂଶଗ୍ରହଣକାରୀ ଦେଖି ପାରିବେ। ଏହି ଫେଷ୍ଟିଭାଲର ଅନ୍ୟତମ ନିର୍ଦ୍ଦେଶକ ଜଗନ୍ନାଥ ପାଣିି କହିଛନ୍ତି ଯେ, ସିଆଇଏଫ୍ଏଫ୍ରେ ୩୫ଟି ଦେଶ ଅଂଶଗ୍ରହଣ କରିଛନ୍ତି। ଏହାର ସ୍କ୍ରିିନିଂ ଓ ଫଳାଫଳ ଚଳିତ ମାସ ୨୭ ତାରିଖରେ ପ୍ରକାଶ ପାଇବ। ଓରିଫାର୍ମିଂ ଏହି ଫିଲ୍ମ ଫେଷ୍ଟିଭାଲର ଆୟୋଜକ ରହିଛି।