ପଟ୍ଟାଙ୍ଗି,୨୭।୬(ଶରତ ଧଳ): ମୃତ୍ୟୁ କେତେବେଳେ ଆସିବ କିଏ ବା କହିପାରିବ। ଘରୁ ଖୁସିରେ ବାହାରିଥିଲେଲେ ବିବାହ ଉତ୍ସବରେ ଯୋଗ ଦେବାପାଇଁ ହେଲେ ଅଧା ରାସ୍ତାରେ ଅପେକ୍ଷା କରି ରହିଥିଲା ମୃତ୍ୟୁ। ଏପରି ଏକ ଦୁଃଖଦ ଘଟଣା ଘଟିଛି କୋରାପୁଟ ଜିଲା ପଟ୍ଟାଙ୍ଗି ଥାନା ଅନ୍ତର୍ଗତ ସୁଣ୍ଡି ପୁଙ୍ଗାରଗ୍ରାମ ନିକଟରେ ।
ସୂଚନାନୁଯାୟୀ, ଉକ୍ତ ଥାନା ଅଧୀନରେ ରହିଥିବା ମାଳିମାର୍ଲା ଗ୍ରାମର ପିଣ୍ଟୁ ଚୌଧିରୀଙ୍କ ଭଉଣୀ ବୋରିଗୁମ୍ମା ଅଞ୍ଚଳର ବାଙ୍ଗସାହିର ଟୁନେଶ୍ୱର ପ୍ରଧାନଙ୍କୁ ମଙ୍ଗଳବାର ବିବାହ କରିଥାନ୍ତେ। ଉକ୍ତ ବିବାହ ପୂର୍ବରୁ ପରମ୍ପରା ଅନୁଯାୟୀ ଟୁନେଶ୍ୱରଙ୍କ ଭିଣେଇ ରବୀ ପ୍ରଧାନ ୨ ମାସର ଗର୍ଭବତୀ ଭଉଣୀ ରଶ୍ମିତା ପ୍ରଧାନ ଏବଂ ୬ ବର୍ଷର ଶିଶୁ କନ୍ୟା ଶୁଭଲକ୍ଷ୍ମୀ ପ୍ରଧାନଙ୍କୁ ନେଇ ଝିଅ ଡାକରା ପାଇଁ ପିଣ୍ଟୁ ଚୌଧିରୀଙ୍କ ଘରକୁ କାର ନଂ ଓଡି୧୦ପି ୫୯୧୨ ଯୋଗେ ଯାଉଥିଲେ। ମାତ୍ର ବିପରୀତ ଦିଗରୁ ଆସୁଥିବା ଟ୍ୟାଙ୍କର ନଂ ଓଡ୦୭ଏଡି୨୫୧୭ ସହ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ କାର ଚଲାଉ ଥିବା ରବୀ ଏବଂ ତାଙ୍କ ସ୍ତ୍ରୀ ରଶ୍ମିତା ଘଟଣାସ୍ଥଳେ ମୃତ୍ୟୁବରଣ କରିଥିବା ବେଳେ କାର ପଛପଟରେ ବସିଥିବା ଶିଶୁକନ୍ୟା ଶୁଭଲକ୍ଷ୍ମୀ ଗୁରୁତର ହୋଇଥିଲେ। ହେଲେ ଉଦ୍ଧାର କରିବା ପୂର୍ବରୁ ତାଙ୍କର ମୃତ୍ୟୁ ଘଟିଥିବା ସେଠାରେ ଉପସ୍ଥିତଥିବା ଲୋକେ କହିଛନ୍ତି। ଅନ୍ୟପକ୍ଷରେ ଟ୍ୟାଙ୍କର ଡ୍ରାଇଭର ଦିଲ୍ଲୀପ କୁମାର ବେହେରା କହିଛନ୍ତି, ମୋ ଗାଡ଼ି ସମ୍ମୁଖରୁ ଆସୁଥିବା କାରଟି ଦ୍ରୁତ ଗତିରେ ଥିଲ। ପରେ ମୋର ଡାହାଣ ପାର୍ଶ୍ୱରେ କାରଟି ପିଟିହୋଇ ଓଲଟି ପଡିଥିଲା। ଖବରପାଇ ପଟ୍ଟାଙ୍ଗି ପୋଲିସ ଘଟଣାସ୍ଥଳରେ ପହଞ୍ଚି ସମସ୍ତ ମୃତକଙ୍କୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପଠାଇଛନ୍ତି ମୃତଦେହ ବ୍ୟବଚ୍ଛେଦ ପାଇଁ। ପରେ ଟ୍ୟାଙ୍କର ଡ୍ରାଇଭରଙ୍କୁ ପୋଲିସ ଅଟକ ରଖି ପଚରାଉଚରା ଜାରି କରିଛି।