ନୂଆଦିଲ୍ଲୀ,୨୪-୮: କେନ୍ଦ୍ର ସରକାର ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକୁ ୭୦ ହଜାର କୋଟି ଟଙ୍କା ପ୍ରଦାନ କରିବେ। ବ୍ୟାଙ୍କର ପୁଞ୍ଜି ଉପଲବ୍ଧତା ବୃଦ୍ଧି ସହ ଋଣ ପ୍ରଦାନ କ୍ଷମତାକୁ ବଢ଼ାଇବା ଉଦ୍ଦେଶ୍ୟରେ ସରକାର ଏହି ପଦକ୍ଷେପ ନେବାକୁ ଯାଉଛନ୍ତି। ସରକାରଙ୍କ ଏହି ପଦକ୍ଷେପ ଯୋଗୁ ବ୍ୟାଙ୍କଗୁଡ଼ିକ ଅଧିକ ମାତ୍ରାରେ ଋଣ ପ୍ରଦାନ କରିପାରିବେ। ଏହାଦ୍ୱାରା ବ୍ୟାଙ୍କିଙ୍ଗ ଫାଇାନାନ୍ସିଆଲ ସିଷ୍ଟମରେ ୫ ଲକ୍ଷ କୋଟି ଟଙ୍କା ପ୍ରବେଶ କରିବ ବୋଲି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶୁକ୍ରବାର ଅର୍ଥନୀତିକୁ ପ୍ରୋତ୍ସାହିତ କରିବା ଲାଗି ବିଭିନ୍ନ ପଦକ୍ଷେପ ଘୋଷଣା କରି କହିଛନ୍ତି।
ସେ କହିଛନ୍ତି ଯେ, ଆଗାମୀ ଦିନରେ ସମସ୍ତ ପ୍ରକାର ଋଣ ଶସ୍ତା ହୋଇଯିବ। ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶୁକ୍ରବାର ଏ ସମ୍ପର୍କରେ ଘୋଷଣା କରିଛନ୍ତି। ସମସ୍ତ ବ୍ୟାଙ୍କ ଏଣିକି ଆର୍ବିଆଇର ରେପୋ ରେଟ ସହ ନିଜର ସୁଧ ହାରକୁ ଯୋଡିବେ। ଫଳରେ ଆଜି ଯାଏ ଚାଲିଆସୁଥିବା ମାର୍ଜିନାଲ କଷ୍ଟ ଅଫ୍ ଲେଣ୍ଡିଂ ରେଟ୍(ଏମ୍ସିଏଲ୍ଆର୍) ବ୍ୟବସ୍ଥା ସମ୍ପୂର୍ଣ୍ଣ ପ୍ରତ୍ୟାହାର ହୋଇଯିବ। ଏହାଦ୍ୱାରା ଅଟୋ ଓ ଗୃହ ଋଣ ସମେତ ସମସ୍ତ ପ୍ରକାର ଋଣ ଉପରେ ଇଏମ୍ଆଇ(ଇକ୍ୟୁଏଟେଡ ମନ୍ଥଲୀ ଇନ୍ଷ୍ଟଲମେଣ୍ଟ) କମିଯିବ। ଏଠାରେ ଖବରଦାତା ସମ୍ମିଳନୀରେ ଯୋଗ ଦେଇ ସୀତାରାମନ୍ କହିଛନ୍ତି ଯେ, ଆଜିଯାଏ ଏମ୍ସିଏଲ୍ଆର୍ ଭିତ୍ତିରେ ବ୍ୟାଙ୍କଗୁଡ଼ିକ ଋଣ ଉପରେ ସୁଧ ହାର ସ୍ଥିର କରୁଥିଲେ। ଆର୍ବିଆଇ ଦ୍ୱାରା ରେପୋ ରେଟ ହ୍ରାସର ଫାଇଦା ଗ୍ରାହକଙ୍କୁ ମିଳୁ ନ ଥିଲା। ଏହାକୁ ନେଇ ବ୍ୟାଙ୍କମୁଖ୍ୟମାନଙ୍କ ସହ ଅର୍ଥ ମନ୍ତ୍ରଣାଳୟର ବୈଠକ ହୋଇଥିଲା। ସେମାନେ ସମସ୍ତ ପ୍ରକାର ଋଣକୁ ରେପୋ ରେଟ ସହ ଯୋଡିବାକୁ ରାଜି ହୋଇଯାଇଥିଲେ। ଆଗାମୀ ଦିନରେ ସମସ୍ତ ବ୍ୟାଙ୍କ ରେପୋ ରେଟ୍ ସହ ସୁଧ ହାରକୁ ଯୋଡି ଦେବେ ବୋଲି ସେ କହିଛନ୍ତି।
୧୫ ଦିନରେ କ୍ଲୋଜର ରିପୋର୍ଟ
ଅର୍ଥମନ୍ତ୍ରୀ କହିଛନ୍ତି ଯେ, ବ୍ୟାଙ୍କଗୁଡ଼ିକ ଋଣ ଦେୟ ପ୍ରଦାନ ବନ୍ଦ ହେବାର ୧୫ ଦିନ ମଧ୍ୟରେ କ୍ଲୋଜର ରିପୋର୍ଟ ଦେବାକୁ ହେବ। ଏହାଦ୍ୱାରା ଗ୍ରାହକଙ୍କୁ ଅସୁବିଧାରୁ ମୁକ୍ତି ମିଳିବ। ଏଣିକି ବ୍ୟାଙ୍କ ଏବଂ ଏନ୍ବିଏଫ୍ସିକୁ ଋଣ ପାଇବା ଲାଗି ଆବେଦନ କରିଥିବା ଗ୍ରାହକ ନିଜ ଆବେଦନକୁ ଅନ୍ଲାଇନରେ ଟ୍ରାକ୍ କରିପାରିବେ ବୋଲି ସେ କହିଛନ୍ତି।
କ୍ରେଡିଟ ଲିମିଟ ବଢ଼ାଯିବ
ଚାହିଦା ବୃଦ୍ଧି ଲାଗି ଅର୍ଥମନ୍ତ୍ରୀ ସୀତାରାମନ୍ ଘର, ଗାଡ଼ି ଓ ଘରୋଇ ସାମଗ୍ରୀ କିଣିବା ଲାଗି ଫାଇନାନ୍ସ କମ୍ପାନୀଙ୍କୁ କ୍ରେଡିଟ ଲିମିଟ ବଢ଼ାଇବାକୁ ନେଇ ଘୋଷଣା କରିଛନ୍ତି। ଏଥିସହିତ ସେ ହାଉସିଂ ଫାଇନାନ୍ସ କର୍ପୋରେଶନ୍ସକୁ ୨୦ ହଜାର କୋଟି ଟଙ୍କା ପୁଞ୍ଜି ଦେବାକୁ ଘୋଷଣା କରିଛନ୍ତି।
ସିଏସ୍ଆର ଉଲ୍ଲଂଘନ ଆପରାଧିକ ହେବନି
ଅର୍ଥମନ୍ତ୍ରୀ ସୀତାରାମନ୍ କହିଛନ୍ତି ଯେ, କର୍ପୋରେଟ ସାମାଜିକ ଦାୟିତ୍ୱ(ସିଏସ୍ଆର୍) ଉଲ୍ଲଂଘନ ହେବା କ୍ଷେତ୍ରରେ ଆପରାଧିକ ମକଦ୍ଦମା କରାଯିବ ନାହିଁ। ସେ କହିଛନ୍ତି ଯେ, ଏଣିକି ଏହାକୁ ଆପରାଧିକ ଭାବେ ଗ୍ରହଣ କରାଯିବ ନାହିଁ। ବଜେଟରେ ଏ ସମ୍ପର୍କରେ ଘୋଷଣା କରାଯିବା ପରେ ଉଦ୍ୟୋଗ ଜଗତ ଏହା ଉପରେ ଚିନ୍ତାବ୍ୟକ୍ତ କରିଥିଲେ ଏବଂ ଏହାକୁ ପ୍ରତ୍ୟାହାର କରିବା ଲାଗି ଅର୍ଥମନ୍ତ୍ରୀଙ୍କ ନିକଟରେ ଦାବି ଜଣାଇଥିଲେ।