ଚଣ୍ଡିଗଡ଼,୨୯।୭: ପଞ୍ଜାବ ବଟାଲା ଗଁାର ପାବଲାରାଲି କାଲନ୍ରେ ଏକ ହୃଦୟ ବିଦାରକ ଚିତ୍ର ସାମ୍ନାକୁ ଆସିଛି। ଜଣେ ଶହୀଦ ଯବାନଙ୍କୁ ବୃଦ୍ଧା ମା’ କାନ୍ଧରେ କାନ୍ଧେଇଥିବା ବେଳେ ୭ମାସର ଶିଶୁପୁତ୍ର ତାଙ୍କୁ ମୁଖାଗ୍ନି ଦେଇଥିବା ଦେଖିବାକୁ ମିଳିଛି। ଜମ୍ମୁ କଶ୍ମୀର ଶ୍ରୀନଗର ନିକଟସ୍ଥ ମଛଲି ସେକ୍ଟରରେ ମୁତୟନ ହୋଇଥିବା ଲାନ୍ସ ନାୟକ ରଜିନ୍ଦର ସିଂହ ଆତଙ୍କବାଦୀଙ୍କୁ ନିପାତ କରିବା ସହ ନିଜେ ଶହୀଦ ହୋଇଥିଲେ। ରବିବାର ଶହୀଦ ଯବାନଙ୍କ ମୃତଦେହକୁ ତାଙ୍କର ପୈତୃକ ବାସଭବନ ପଞ୍ଜାବକୁ ଅଣାଯାଇଥିଲା। ଏହି ସମୟରେ ଶହୀଦଙ୍କ ମା’ ପଲବିନ୍ଦର କୌର ତାଙ୍କ ମୃତଦେହକୁ ନିଜ କାନ୍ଧରେ କାନ୍ଧେଇ ଶ୍ମଶାନକୁ ନେଇଥିଲେ। ଏହାପରେ ଶହୀଦଙ୍କ ଭାଇ ଓ ତାଙ୍କର ସାତ ମାସର ପୁଅ ତାଙ୍କୁ ମୁଖାଗ୍ନି ଦେଇଥିଲେ। ଏହି ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ସମସ୍ତଙ୍କୁ ଏହା ମର୍ମାହତ କରିଛି। ଗଁାକୁ ମୃତଦେହ ଆସିବା ପରେ ଶୋକାକୂଳ ପରିବେଶ ମଧ୍ୟରେ ଶହୀଦଙ୍କୁ ତୋପ ସଲାମି ଦିଆଯାଇ ଶେଷକୃତ୍ୟ ସମ୍ପନ୍ନ କରାଯାଇଥିଲା। ଅପରପକ୍ଷରେ ପଞ୍ଜାବ ସରକାରଙ୍କ ପକ୍ଷରୁ ଶହୀଦ ଯବାନଙ୍କ ପରିବାରଙ୍କୁ ୧୨ଲକ୍ଷ ଟଙ୍କା ସହାୟତା ରାଶି ଓ ଜଣେ ସଦସ୍ୟଙ୍କୁ ସରକାରୀ ଚାକିରୀ ଦିଆଯିବା ପାଇଁ ପ୍ରତିଶୃତି ଦିଆଯିବା ସହ ଗଁାରେ ଥିବା ସ୍କୁଲର ନାମକୁ ଶହୀଦଙ୍କ ନାମରେ ନାମିତ କରାଯିବ ବୋଲି ଘୋଷଣା କରାଯାଇଛି।