କେସିଙ୍ଗା,୨୯।୩(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ ବାଲସି ଗ୍ରାମ ପଞ୍ଚାୟତର ମଶାଣିବନ୍ଧା, କୋକୋଡ଼ମାଲ ଓ ଭବାନୀପାଟଣା ବ୍ଲକର ଭିକାଝରଣ ଗ୍ରାମର ଶତାଧିକ ଦାଦନ ଶ୍ରମିକ ମହାରାଷ୍ଟ୍ରରେ ଫସି ରହିଛନ୍ତି। କେନ୍ଦ୍ର ସରକାର କରୋନା ମୁକାବିଲା ଲାଗି ୨୧ ଦିନ ଲକ୍ଡାଉନ୍ ଘୋଷଣା ପରେ ଶ୍ରମିକମାନେ ଝୁପୁଡ଼ି ଘରେରହି ଭୋକ ଉପାସରେ ଦିନ କାଟୁଛନ୍ତି। ସେମାନେ ମହାରାଷ୍ଟ୍ର ପାଳଗଡ଼ ଜିଲା ଅନ୍ତର୍ଗତ କୁରୁଷ ସହରରେ ଥିବା ଏକ କମ୍ପାନୀରେ କାମ କରୁଥିଲେ। ଗତ ଫେବୃୟାରୀ ମାସରେ ଏହି ଶ୍ରମିକମାନେ ଏକତ୍ର ମିଶି କାମ କରିବାକୁ ଯାଇଥିଲେ। ଲକ୍ଡାଉନ୍ ଘୋଷଣା ପରେ ସେଠାରେ ଫସି ରହିଥିଲେ। ପାଖରେ ଥିବା ଅର୍ଥ ଶେଷ ହୋଇଯାଇଥିବା ବେଳେ ଭୋକରେ ରହୁଛନ୍ତି। ବାହାରକୁ ବାହାରିଲେ ପୋଲିସ ଲାଠିଚାର୍ଜ କରୁଥିବା ସେମାନେ କହିଛନ୍ତି। ସେମାନଙ୍କୁ ଉଦ୍ଧାର ଲାଗି ମୁଖ୍ୟମନ୍ତ୍ରୀଙ୍କୁ ଏକ ଭିଡିଓ ଜରିଆରେ ନିବେଦନ କରିଛନ୍ତି।