ପୁରୀ ଅଫିସ,୨୧।୯: ପୁରୀରେ ଅନ୍ତର୍ଜାତୀୟ ବେଳାଭୂମି ସଫେଇ ଦିବସ ପାଳିତ ହୋଇଛି। ଶନିବାର ଜିଲାର ପ୍ରାୟ ଶହେ କିଲୋମିଟର ପର୍ଯ୍ୟନ୍ତ ବେଳାଭୂମିକୁ ଏକାସାଙ୍ଗରେ ୧୦ହଜାର ସ୍ବେଚ୍ଛାସେବୀ ସଫେଇ କରିଥିବା ଦେଖିବାକୁ ମିଳିଛି। ସକାଳ ୬ରୁ ସାଢେ ୭ଟା ପର୍ଯ୍ୟନ୍ତ ଅରଖକୁଦାଠାରୁ ଅସ୍ତରଙ୍ଗ ପର୍ଯ୍ୟନ୍ତ ସଫେଇ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅଭିଯାନରେ ସବୁ ବର୍ଗର ଲୋକ ସାମିଲ ହୋଇଥିଲେ। ଏହା ବିଶ୍ୱର ସବୁଠୁ ବୃହତ୍ ବେଳାଭୂମି ସଫେଇ ବୋଲି ଜିଲାପାଳ ବଲୱନ୍ତ ସିଂ କହିଛନ୍ତି। କେବଳ ପୁରୀ ପୌରସଂସ୍ଥା ଅଧୀନରେ ଥିବା ୭କିଲୋମିଟର ବେଳାଭୂମିକୁ ୧୭ଟି ଜୋନରେ ବିଭକ୍ତ କରାଯାଇ ଏକକାଳୀନ ସଫେଇ କରାଯାଇଥିଲା। ଏହାପରେ ସକାଳ ୮ଟାରେ ରାଜଭବନ ପଛପଟ ବେଳାଭୂମିରେ ସମସ୍ତେ ଏକତ୍ରିତ ହୋଇ ବେଳାଭୂମିକୁ ସଫା ରଖିବା ଲାଗି ଶପଥ ନେଇଥିଲେ। ଏହି ଅବସରରେ ମନ୍ତ୍ରୀ ବିକ୍ରମ କେଶରୀ ଆରୁଖ, ପର୍ଯ୍ୟଟନ ସଚିବ ବିଶାଲ ଦେବ, ବିଧାୟକ ଜୟନ୍ତ ଷଡ଼ଙ୍ଗୀ, ବଲିଉଡ୍ ଅଭିନେତ୍ରୀ ନନ୍ଦିତା ଦାସ, ଅଭିନେତା ବିଦ୍ୟୁତ୍ ଜାମୱାଲଙ୍କ ସମେତ ବହୁ ସେଲିବ୍ରିଟି ଯୋଗଦେଇଥିଲେ। ବେଳାଭୂମିକୁ ସ୍ବଚ୍ଛ ଏବଂ ପରିଷ୍କାର ରଖିଲେ ଅଧିକ ପର୍ଯ୍ୟଟକ ଆସିବେ। ଅଧିକ ପର୍ଯ୍ୟଟକ ଆସିଲେ ରାଜ୍ୟର ଆର୍ଥିକ ମାନଦଣ୍ଡ ଆହୁରି ସୁଦୃଢ଼ ହୋଇପାରିବ ବୋଲି ମତ ପ୍ରକାଶ ପାଇଛି।