ବାଲେଶ୍ୱର ଅଫିସ, ୪।୮-ବାଲେଶ୍ୱର ସେଣ୍ଟ୍ରାଲ ସ୍କୁଲ ଛକ ନିକଟ ଆଇଟିଆର୍ କଲୋନୀରେ ଏମ୍୍ସ ସାଟେଲାଇଟ୍ ଓପିଡ଼ି ସେଣ୍ଟରର ଏକ ଶତ ଦିବସ ପୂର୍ତ୍ତି ଉପଲକ୍ଷେ ଏକ ସ୍ବାସ୍ଥ୍ୟ ଶିବିର ଶନିବାର ଅନୁଷ୍ଠିତ ହୋଇଯାଇଛି। ଏମ୍ସ ନିର୍ଦ୍ଦେଶକ ଭୁବନେଶ୍ୱର ଡା. ଗୀତାଞ୍ଜଳି ବଟନାବନେ ଏବଂ ଆଇଟିଆର୍ର ନିର୍ଦ୍ଦେଶକ ବିନୟ କୁମାର ଦାସ ଏହାକୁ ଉଦ୍ଘାଟନ କରିଥିଲେ।
୨୦୧୭ ଜୁଲାଇ ୮ ତାରିଖରୁ ଭୁବନେଶ୍ୱର ଏମ୍ସ ସାଟେଲାଇଟ୍ ପକ୍ଷରୁ ଓପିଡି ଆରମ୍ଭ ହୋଇଥିଲା। ବିଭିନ୍ନ ବିଭାଗର ଡାକ୍ତରମାନେ ପ୍ରତ୍ୟେକ ଶନିବାର ଆସି ସର୍ଜରୀ, ମେଡ଼ିଶିନ୍, କାର୍ଡ଼ିଓଲୋଜି, ଏଣ୍ଡୋକ୍ରୋନୋଲୋଜି, ଅର୍ଥୋପେଡ଼ିକ୍ସ, ଡର୍ମାଟୋଲୋଜି, ଡେଣ୍ଟାଲ, ପେଡ଼ିଆଟ୍ରିକ୍ସ, ଅନକୋଲୋଜି, ନ୍ୟୁରୋଲୋଜି, ଅପ୍ଥାଲମୋଲୋଜି, ଜେନେରାଲ ମେଡ଼ିଶିନ୍, ଜେନେରାଲ ସର୍ଜରୀ ରୋଗର ଚିକିତ୍ସା କରିଥାନ୍ତି। ପ୍ରତ୍ୟେକ ସପ୍ତାହରେ ୯୦ରୁ ଅଧିକ ରୋଗୀ ଚିକିତ୍ସା କରିବା ସହ ଅଦ୍ୟାବଧି ୧୯ହଜାରରୁ ଅଧିକ ରୋଗୀଙ୍କୁ ଉତ୍ତରଓଡ଼ିଶାରୁ ଚିକିତ୍ସିତ କରାଯାଇଥିବା ଜଣାପଡ଼ିଛି। ଏହି ସଫଳତାକୁ ଆଜି ଏକ ଉତ୍ସବ ଭାବେ ପାଳନ କରାଯାଇଛି। ବହୁ ଅଭିଜ୍ଞ ଡାକ୍ତରଙ୍କ ଦ୍ୱାରା ଶତାଧିକ ରୋଗୀ ଚିକିତ୍ସିତ ହୋଇଥିବା ଜଣାପଡ଼ିଛି। ପିଏକ୍ସଇ ନିର୍ଦ୍ଦେଶକ ଡି.କେ. ଯୋଶୀ, ଡା. ଏମ୍.ସି. ସାହୁ, ନୀଳାଦ୍ରି ରାୟ, ସି.ଆର୍. ଓଝା, ଅନୁପ କୁମାର ସାହୁ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ।