ବାହାନଗା, ୨୬ା୧୦(ଡି.ଏନ.ଏ.)-ଲଘୁଚାପ ଜନିତ ଲଗାଣ ବର୍ଷାରେ ବାହାନଗା ବ୍ଲକ ଅଭଣା ପଞ୍ଚାୟତର ବରଜଦେଉଳି ଗ୍ରାମରେ ଥିବା ଶହେ ବର୍ଷର ପୁରୁଣା ଉନ୍ନୀତ ଉ.ପ୍ରା.ବିଦ୍ୟାଳୟର କାନ୍ଥ ଭୁଶୁଡି ପଡିଛି। ତେବେ ରାତିରେ ଏଭଳି ଦୁର୍ଘଟଣା ଘଟିଥିବାରୁ କାହାରି କିଛି କ୍ଷତି ହୋଇନାହିଁ।
ଏହି ବିଦ୍ୟାଳୟ ୧୯୧୯ ମସିହାରେ ପ୍ରତିଷ୍ଠା ହୋଇଥିଲା। ବିଦ୍ୟାଳୟରେ ୧ମରୁ ୭ମ ପର୍ଯ୍ୟନ୍ତ ପାଠ ପଢାଯାଇଥାଏ ା ବିଦ୍ୟାଳୟରେ ୧୨୦ଜଣ ଛାତ୍ରୀଛାତ୍ର ପାଠ ପଢନ୍ତି। ସରକାର ତରଫରୁ ୨ଟି ପକ୍କା ଘର ଯୋଗାଇ ଦିଆଯାଇଥିଲେ ମଧ୍ୟ ସେଥିମଧ୍ୟରୁ ଗୋଟିଏ ଘରେ ଅଫିସ କାର୍ଯ୍ୟ ଚାଲୁଛି। ଅନ୍ୟଟିରେ ପାଠ ପଢାଯାଇଥାଏ। ତେବେ ମାଟି କାନ୍ଥ ଥିବା ୩ ଶ୍ରେଣୀଗୃହର କାନ୍ଥ ପୂର୍ବରୁ ବିପଦସଙ୍କୁଳ ଅବସ୍ଥାରେ ଥିଲା। ଏନେଇ ବିଦ୍ୟାଳୟ ତରଫରୁ ଶିକ୍ଷାଧିକାରୀଙ୍କୁ ଜଣାଇଥିଲେ ମଧ୍ୟ କେହି ପ୍ରତିକାର ନିମନ୍ତେ ପଦକ୍ଷେପ ନେଇ ନ ଥିଲେ ା ତେବେ ୭ ଶ୍ରେଣୀ ପାଇଁ ଆବଶ୍ୟକ ଶ୍ରେଣୀ ଗୃହ ନ ଥିବାରୁ ଛାତ୍ରୀଛାତ୍ରମାନେ ବାରଣ୍ଡାରେ ବସି ପାଠ ପଢୁଥିଲେ ା ଗୁରୁବାର ରାତିରେ ୩ ଶ୍ରେଣୀ ଗୃହ କାନ୍ଥ ସମ୍ପୂର୍ଣ୍ଣ ଭୁଶୁଡି ପଡିଥିଲେ ମଧ୍ୟ କେହି ନ ଥିବାରୁ ଏକ ବଡଧରଣର ବିପଦ ଟଳିଯାଇଛି।