ମାଲକାନଗିରି,୧୯ା୨(ଡି.ଏନ.ଏ.): ରାଜ୍ୟରେ ବୁଧବାରଠାରୁ ଦଶମ ଶ୍ରେଣୀ ପରୀକ୍ଷା ଆରମ୍ଭ ହୋଇଛି। ପ୍ରଥମ ଦିବସର ପରୀକ୍ଷା ଜିଲାରେ ପ୍ରାୟ ଶାନ୍ତିଶୃଙ୍ଖଳାର ସହ ଶେଷ ହୋଇଛି। ଏଥିପାଇଁ ପ୍ରଶାସନ ପକ୍ଷରୁ କଡା ପଦକ୍ଷେପ ନିଆଯାଇଛି। ମାଲକାନଗିରି ଜିଲାରେ ୫୬୭୪ ପରୀକ୍ଷାର୍ଥୀଙ୍କ ମଧ୍ୟରୁ କେତେକ କେନ୍ଦ୍ରରେ ପରୀକ୍ଷାର୍ଥୀ ପରୀକ୍ଷା ଦେଇନାହାନ୍ତି। ତେବେ ନିର୍ଦ୍ଧିଷ୍ଟଭାବେ କେତେ ଜଣ ପରୀକ୍ଷା ଦେଇନାହାନ୍ତି ସେ ସମ୍ପର୍କରେ ଠିକ୍ ଖବର ସନ୍ଧ୍ୟାସୁଦ୍ଧା ମିଳିନାହିଁ ବୋଲି ଜିଲା ଶିକ୍ଷା ଅଧିକାରୀ ରମେଶ ଚନ୍ଦ୍ର ସେଠୀ କହିଛନ୍ତି। ସୂଚନାଯୋଗ୍ୟ ଯେ, ଜିଲାରେ ୫୩୧୨ ରେଗୁଲାର, ୩୪୨ ଏକ୍ସ ରେଗୁଲାର ଏବଂ ୨୦ ଜଣ ପତ୍ର ବିନିମୟ ମାଧ୍ୟମରେ ୩୨ଟି କେନ୍ଦ୍ରରେ ପରୀକ୍ଷା ଦେବାପାଇଁ ବ୍ରବସ୍ଥା ହୋଇଛି। ୧୧ଟି ସମ୍ବେଦନଶୀଳ କେନ୍ଦ୍ରରେ ସିସି କ୍ୟାମେରା ଲାଗିଛ। ପ୍ରତି ସେଣ୍ଟର ପାଇଁ ସୁପରିଣ୍ଟେଣ୍ଡେଣ୍ଟ, ନୋଡାଲ ଇନ୍ଚାର୍ଜ, ଡେପୁଟି ନୋଡାଲ ଇନ୍ଚାର୍ଜ ନିଯୁକ୍ତି ହୋଇଛନ୍ତି। ଥାନାରୁ ପ୍ରଶ୍ନପତ୍ର କେନ୍ଦ୍ରରେ ପହଞ୍ଚାଇବା ପାଇଁ ୧୦ ଅଧିକାରୀ ତଦାରଖ ଲାଗି ନିଯୁକ୍ତି ହୋଇଛନ୍ତି। ଜିଲା ପ୍ରଶାସନ ପକ୍ଷରୁ ୩୨ ପର୍ଯ୍ୟବେକ୍ଷକଙ୍କୁ ନିଯୁକ୍ତି କରାଯାଇଥିବା ବେଳେ ବୋର୍ଡରୁ ଏକ ସ୍ବତନ୍ତ୍ର ସ୍କ୍ବାଡ, ଜିଲା ଶିକ୍ଷା ଅଧିକାରୀଙ୍କ ତରଫରୁ ସ୍କ୍ବାଡ ଗଠନ ହୋଇଛି।