ତିର୍ତ୍ତୋଲ, ୨୧।୨ (ଡି.ଏନ୍.ଏ.): କଟକ-ପାରାଦୀପ ରେଳପଥର ତିର୍ତ୍ତୋଲ ଥାନା ଅଧୀନ ଝଙ୍କଡ଼ ଶାରଳା ରୋଡ ପିଏଚ୍ ନିକଟ ଲେଭଲକ୍ରସିଂଠାରେ ଗୁରୁବାର ଏକ ମାଲବାହୀ ଟ୍ରେନ ଅଟକି ରହିବା ଯୋଗୁ ଦେଢ଼ ଘଣ୍ଟା ଧରି ଏହି ଲାଇନ୍ରେ ରେଳ ଚଳାଚଳ ବ୍ୟାହତ ହେବା ସହ ଯାନବାହନ ଚଳାଚଳ ଠପ୍ ହୋଇଯାଇଥିଲା। ଇଞ୍ଜିନ୍ ଅଚଳ ହୋଇଯିବା ଯୋଗୁ ମାଲ୍ବହୀ ଟ୍ରେନ୍ଟି ଅଟକି ରହିଥିଲା। ତେବେ ଲୋକମାନେ ଟ୍ରେନ୍ ବଗି ଉପରେ ଚଢ଼ି ଯିବାଆସିବା କରୁଥିବା ଦେଖାଯାଇଥିଲା। ପ୍ରକାଶ ଯେ, ଦିନ ସାଢ଼େ ୧ଟା ବେଳେ ପାରାଦୀପରୁ କଟକ ଅଭିମୁଖେ ଆସୁଥିବା ଏକ ମାଲ୍ବାହୀ ଟ୍ରେନ ଯାଉଥିବା ବେଳେ ଜଣେ ଯୁବତୀ ରେଳ ଧାରଣାରେ ମୁଣ୍ଡ ଦେଇ ଆତ୍ମହତ୍ୟା ଉଦ୍ୟମ କରୁଥିଲେ। ଏହାକୁ ଦୂରରୁ ଦେଖି ଟ୍ରେନ୍ ଚାଳକ ଜରୁରୀକାଳୀନ ବ୍ରେକ ମାରିଥିଲେ। ଏଥିରେ ଟ୍ରେନର ଇଞ୍ଜିନଟି ସମ୍ପୂର୍ଣ୍ଣ ବନ୍ଦ ହୋଇଯିବା ସହ ଟ୍ରେନଟି ଲାଇନ ଉପରେ ରହିଯାଇଥିଲା। ପ୍ରାୟ ଦେଢଘଣ୍ଟା ଧରି ଇଞ୍ଜିନ ସଜଡ଼ା ହେବା ପରେ ଯାତାୟାତ ସ୍ବାଭାବିକ ହୋଇଥିଲା।