ଖଇରା, ୨୪।୯(ଡି.ଏନ.ଏ.)-ବାଲେଶ୍ୱର ଜିଲା ଖଇରା ତହସିଲ ଓ ମୟୂରଭଞ୍ଜ ଜିଲା କପ୍ତିପଦା ତହସିଲ ଅଧୀନରେ ଥିବା ଶାରିଶୂଆ ପାହାଡ଼ରେ ବେଆଇନ ଖଣି କାରବାର ଚରମ ସୀମାରେ ପହଞ୍ଚିଛି। ଖଇରା ତହସିଲ ଅଧୀନରେ ୯୭ଖଣି ମଧ୍ୟରୁ ୩୫ ଖଣି ଲିଜ୍ ନେଇଥିବା ବ୍ୟକ୍ତି ନିଲାମ ଅର୍ଥ ପୈଠ କରିଥିବାବେଳେ ସମସ୍ତ ଖଣିରୁ ଚୋରାରେ ମୋରମ ଉତ୍ତୋଳନ କରାଯାଉଛି। ଏଭଳିକି ଭିଜିଲାନ୍ସ ଓ ହାଇକୋର୍ଟ କେସ୍ ଚାଲିଥିବା କିଛି ଖଣିରୁ ମଧ୍ୟ ମାଫିଆମାନେ ଟନ ଟନ ପଥର ଉତ୍ତୋଳନ କରି ପରିବହନ କରୁଛନ୍ତି। ୱାଗନ ମେଶିନରେ ବ୍ଲାଷ୍ଟିଂ ଯୋଗୁ ଘର କାନ୍ଥରେ ଫାଟ ସୃଷ୍ଟି ହେଉଛି। ଫଳରେ ପାହାଡ଼ତଳି ବାସିନ୍ଦା ରାତିରେ ଶାନ୍ତିରେ ଶୋଇ ପାରୁନାହାନ୍ତି।
ଖଣି ସଂଲଗ୍ନ ରାସ୍ତାଗୁଡ଼ିକ ଅତ୍ୟନ୍ତ ଶୋଚନୀୟ ହୋଇପଡିଥିବାରୁ ପାଦରେ ଚାଲିଚାଲି ଯିବା ଅସମ୍ଭବ ହୋଇପଡୁଛି। ଓଭରଲୋଡିଂ କରି ପରିବହନ କରାଯାଉଥିବାରୁ ଅଭିଭାବକମାନେ ପିଲାଙ୍କୁ ସ୍କୁଲ ଛାଡିବାକୁ ଅନିଚ୍ଛା ପ୍ରକାଶ କରୁଛନ୍ତି। ଖଣିନିଲାମଧାରୀମାନେ ଖଣିର ଗଭୀରତା ୧୧ଫୁଟ ରଖିବାର ନିୟମ ଥିଲେ ହେଁ ଗୋଟିଏ ଗୋଟିଏ ଖଣି ୮୦ଫୁଟ ପର୍ଯ୍ୟନ୍ତ ଖୋଳାଯାଉଛି। ପ୍ରତ୍ୟେକ ବର୍ଷ ଧନଜୀବନ ହାନି ଘଟୁଥିଲେ ମଧ୍ୟ ଅଧିକାରୀମାନେ ଚୁପ୍ ରହିଯାଉଛନ୍ତି। ହାତୀ ଚଲାପଥ ମଧ୍ୟରେ ଆସୁଥିବା ଅଧିକାଂଶ ଖଣିକୁ କେତେକ ସଂସ୍ଥା ଦ୍ୱାରା ଭୁଲ ଦର୍ଶାଇ ୫ ବର୍ଷିଆ ଲିଜ୍ ଦେଇ ପରିବେଶ ନିୟମକୁ ଖୁଲମଖୁଲା ଉଲ୍ଲଂଘନ କରାଯାଉଛି। ପାହାଡ଼ ସଂଲଗ୍ନ ଚାଷ ଜମିଗୁଡ଼ିକରେ ପଥରଖଣ୍ଡ ଧସି ପଡୁଥିବାରୁ ଚାଷଜମି ଅବ୍ୟବହୃତ ହୋଇପଡ଼ିଲାଣି। ଖଣିମାଲିକମାନେ ବହୁଳ ଭାବେ ମେଶିନ ବ୍ୟବହାର କରିବା ଯୋଗୁ ଶ୍ରମିକମାନେ ଜୀବିକା ହରାଉଛନ୍ତି। ଶହଶହ ସଂଖ୍ୟାର ଗ୍ରାମବାସୀ ବାଧ୍ୟହୋଇ ଦାଦନ ଖଟିବାକୁ ବାହାରକୁ ଚାଲି ଯାଉଛନ୍ତି। ଶ୍ରମ ଆଇନ କାର୍ଯ୍ୟକାରୀ କରାଯାଉ ନ ଥିବାରୁ ଖଣିରେ ପଡି ମୃତ୍ୟୁବରଣ କରୁଥିବା କିମ୍ବା ଆହତ ହେଉଥିବା ଶ୍ରମିକମାନେ ସାମାନ୍ୟତମ କ୍ଷତିପୂରଣ ପାଉନାହାନ୍ତି। କେହି ଗ୍ରାମବାସୀ ଏହି ବେଆଇନ କାର୍ଯ୍ୟ ସମ୍ପର୍କରେ ମୁହଁ ଖୋଲିଲେ ତାଙ୍କୁ ମରଣାନ୍ତକ ଆକ୍ରମଣ କରାଯାଉଛି। ପାହାଡ଼ ପାଦଦେଶରେ ରହୁଥିବା ୨୦ଖଣ୍ଡ ଗ୍ରାମର ଲୋକେ ନିର୍ଯାତନାର ଶିକାର ହେଉଛନ୍ତି। ପରିବହନ ସମୟରେ ଗୋଟିଏ ଚାଲାଣକୁ ଏକାଧିକ ଥର ବ୍ୟବହାର କରାଯାଉଛି। ନିଜ ସୁରକ୍ଷା ଦାବି କରି ଗ୍ରାମବାସୀ ସୋମବାର ଖଇରା ବ୍ଲକରେ ଅନୁଷ୍ଠିତ ଜନ ଅଭିଯୋଗ ଶୁଣାଣି ଶିବିରକୁ ଆସିଥିଲେ। ସେଠାରେ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କୁ ଲିଖିତ ଭାବେ ଅବଗତ କରାଇଛନ୍ତି। ଜିଲାପାଳ ଚକ୍ରବର୍ତ୍ତୀ ରାସ୍ତାରେ ସିସି କ୍ୟାମେରା ଲଗାଇବାକୁ ରାଜସ୍ବ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ସମସ୍ତ ଅଭିଯୋଗର ତଦନ୍ତ ପାଇଁ ଉପଜିଲାପାଳ ନିଲୁ ମହାପାତ୍ରଙ୍କୁ ସେ ନିର୍ଦ୍ଦେଶ ଦେଇଥିବା ଗ୍ରାମବାସୀ ଜଣାଇଛନ୍ତି। ଏ ସମ୍ପର୍କରେ ନିଲୁ ମହାପାତ୍ରଙ୍କୁ ଯୋଗାଯୋଗ କରାଯିବାରୁ ଏକ ଟିମ୍ ଗଠନ କରାଯାଇ ସମସ୍ତ ଖଣି ଅନୁଧ୍ୟାନ କରାଯିବ ବୋଲି କହିଛନ୍ତି।