ପାଟଣା,୨୨।୬(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବନାଞ୍ଚଳ ଅନ୍ତର୍ଗତ ଧନୁର୍ଜୟପୁର ପ୍ରସ୍ତାବିତ ସଂରକ୍ଷିତ ଜଙ୍ଗଲରୁ ଶନିବାର ସକାଳେ ପାଟଣା ବନ ବିଭାଗ ୫ ଖଣ୍ଡ ଶାଳକାଠ ଥିବା ଏକ ପିକ୍ଅପ୍ ଗାଡ଼ିକୁ ଜବତ କରିଛି। ତେବେ ବନ ବିଭାଗ କାଠ ମାଫିଆଙ୍କୁ ଧରିବାରେ ବିଫଳ ହୋଇଛି।
୩/୪ ଜଣ କାଠମାଫିଆ ବିରାଟ ଶାଳ ଗଛ କାଟି ଗଣ୍ଡିଗୁଡ଼ିକୁ ଏକ ନମ୍ବରବିହୀନ ଟାଟା ଜେନନ ପିକ୍ଅପ୍ ଭ୍ୟାନରେ ବୋଝେଇ କରି ନେଇ ଯାଉଥିଲେ। ଖବର ପାଇ ପାଟଣା ବନ ବିଭାଗ ଘଟଣାସ୍ଥଳରେ ପହଞ୍ଚି କାଠ ବୋଝେଇ ଗାଡ଼ିକୁ ଜବତ କରିଛି। ତେବେ କାଠମାଫିଆ ବନ ବିଭାଗ ଗାଡ଼ିକୁ ଦେଖି କୌଶଳକ୍ରମେ ଜଙ୍ଗଲ ଭିତରକୁ ଦୌଡ଼ି ପଳାଇବାକୁ ସକ୍ଷମ ହୋଇଥିଲେ। ଜବତ ଶାଳଗଣ୍ଡିର ମୂଲ୍ୟ ପ୍ରାୟ ୫୦ ରୁ ୬୦ ହଜାର ଟଙ୍କା ହେବ ବୋଲି ବନାଞ୍ଚଳ ଅଧିକାରୀ ପବିତ୍ର ମୋହନ ନାୟକ ସୂଚନା ଦେଇଛନ୍ତି। ଏ ନେଇ ପାଟଣା ରେଞ୍ଜରେ ୩/୧୯ରେ ଏକ ମାମଲା ରୁଜୁ ହୋଇ ତଦନ୍ତ ଜାରି ରହିଛି। ଚଢ଼ାଉରେ ରେଞ୍ଜର ପବିତ୍ର ମୋହନ ପ୍ରଧାନ, ବନପାଳ ସନ୍ତୋଷ କୁମାର ପୋହି, ପାରା ସ୍କ୍ବାଡ୍ ଓ ଏଲିଫ୍ୟାଣ୍ଟ ସ୍କ୍ବାଡ୍ ସାମିଲ ହୋଇଥିଲେ।