ଦାରିଙ୍ଗବାଡ଼ି,୧୮।୨(ଡି.ଏନ.ଏ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଳକ ବ୍ରାହ୍ମଣୀଗାଁ ବନ ବିଭାଗ ପକ୍ଷରୁ ଜଣେ କାଠ ମାଫିଆକୁ ଗିରଫ କରିବା ସହ କୋର୍ଟଚାଲାଣ କରିଛି। ଗିରଫ ବ୍ୟକ୍ତି ଜଣକ ହେଲେ ଉକ୍ତ ବନାଞ୍ଚଳ କାରଟିଙ୍ଗିଆ ପଞ୍ଚାୟତ ତିଆରି ଗାଁର ରାଧାକାନ୍ତ ପ୍ରଧାନ ବୋଲଇ ବନାଞ୍ଚଳ ଅଧିକାରାୀ ପ୍ରଦୀପ ବେହେରା କହିଛନ୍ତି। ସେ କହିଛନ୍ତି ଯେ, ରାଧାକାନ୍ତ ଜଣେ କାଠମାଫିଆ। ସେ ଦୀର୍ଘ ଦିନ ଧରି ଉକ୍ତ ଅଞ୍ଚଳରେ ଶାଳ କାଠ ସମେତ ବହୁ ମୂଲ୍ୟବାନ କାଠ କାଟି ବିକ୍ରି କରୁଛନ୍ତି। ସେ କାଟିଙ୍ଗିଆ ସଂରକ୍ଷିତ ଜଙ୍ଗଲରୁ ଶାଳ କାଠ କାଟୁଥିବା ଖବର ପାଇ ବନାଞ୍ଚଳ ଅଧିକାରୀ ପ୍ରଦୀପ ବେହେରାଙ୍କ ନିର୍ଦ୍ଦେଶକ୍ରମେ ବନପାଳ ହରିଶ ପ୍ରଧାନ ଏବଂ ଅନ୍ୟ କର୍ମଚାରୀ ଚଢ଼ାଉ କରି ରାଧାକାନ୍ତଙ୍କୁ ଧରିବାରେ ସଫଳ ହେବା ସହ ତାଙ୍କୁ ଗିରଫ କରି ଦାରିଙ୍ଗବାଡ଼ି ପ୍ରଥମଶ୍ରେଣୀ ବିଚାର ବିଭାଗରେ ହାଜର କରାଇଛନ୍ତି। ତାଙ୍କ ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାରବିଭାଗ ହାଜତକୁ ପଠାଇ ଦିଆଯାଇଛି। ରାଧାକାନ୍ତଙ୍କୁ ଅଧିକା ପଚରାଉଚରା କରିବାକୁ ବନବିଭାଗ ରିମାଣ୍ଡରେ ଆଣିବ ବୋଲି ବନାଞ୍ଚଳ ଅଧିକାରୀ ବେହେରା ସୂଚନା ଦେଇଛନ୍ତି।