ବିଜେପୁର, ୬।୮ (ଡି.ଏନ୍.ଏ):
ବରଗଡ଼ ଜିଲା ବିଜେପୁର ବ୍ଲକ ଟି.ଗଣ୍ଡପାଲି ପଁଚେତ୍ ସଦର ଗଁାର ସନିକଟ୍ ସାହୁ(୪୮)। ଦିନ୍ଥିଲା ସେ ବାହାଜଁାଗଲ୍ ମାଜି ମା’ବାପ୍, ସିଆନି ସଂଗେ ତିନ୍ ତିନଟା ଛୁଆପିଲାକୁ ପୁଷୁଥିଲେ। ଜମିବାଡ଼ି ବଲି କିଛି ନାଇଁ, ପରିବାରଟା ସୁଖବାସୀ ଆନ୍। ହେଲେ ସୁଖେ ଦୁଖେ ପରିବାରଟା ଚଲି ଯାଉଥିଲେ। ଆଏଜ୍କେ ୧୫ ବଛର୍ ତଲେ ସନିକଟ୍ର ଦିହିପା ବନେ ବିଗଡି ଗଲା। ଏନ୍ତାଥି କମିହା ପୁଓକେ ଭଲ କରବାକେ ବାପ୍ ମୂରଲି ସାହୁ ମାଗିଯାଚି ତାହାକୁ ବୁର୍ଲା ଡାକ୍ତରଖାନା ନେଲେ। ଡାକ୍ତର କହେବାର ହିସାବେ ସନିକଟ୍ ମାନସିକ୍ ରୋଗ୍ରେ ପୀଡ଼ିତ ଅଛନ୍। ଉଷୋକଷା କରି ଭଲ କରବାକେ ହେଲେ ଉଚ ଧରନ୍ର ଚିକିଛା ଦରକାର। ହେଲେ ଟଁକା ପଏସା ଅଭାବୁ ମୂରଲି ମୁଡ଼କାନ ସୁଅଁାଲି ପୁଓକେ ଧରି ଘରକେ ଫିରିଆଏଲେ। ଗଁାରେ ଚେରମୂଲି, ବଇଦ୍ ଗୁନିଅଁା, ଫୁକାଝରା କଲେ। ହେଲେ ସନିକଟ୍ର ରୋଗ୍ କମ୍ବାର ଜାଗାରେ ଦିନୁଦିନ୍କେ ବଢ଼ତେଲ ଗଲା। ବେଭାର ଆଚାର ବଦଲି ଗଲା, ଘରୁ ଯହିଁତହିଁ ପଲେଇ ବସଲେ। ପରିବାର ଲୋକ୍ ଇ ସବୁରୁ ମୁକ୍ତି ପାଏବାର ଲାଗି ସନିକଟ୍ର ଗୁଟେ ଲୁହା ଶିଁକ୍ଲା ବଁାଧିଦେଲେ। ଆଏଜ୍କେ ୪ ବଛର ହେଲା ଶନିକଟ୍ ଶିଁକ୍ଲା ବଁଧା ଜୀବନ୍ ବିତଉଛନ୍। ଗଁାର ଦୁର୍ଗା ମଡ଼ପ ପାସେ ତାକର ଘର। ପରଛିରେ ଗୁଟେ ଗଁଧୁଆ ଖଟେ ଖୁଁଟ ଲେଖେଁ ବସି ସନିକଟ୍ ଦିନ ବିତଉଛନ୍। ଇଆଡ଼େ ମା’ବାପ୍ ଅପାରୁ ହେଲେନ। ଏହେଦେ ରାଶନ କାର୍ଡରେ ମିଲୁଥିବାର ସରକାରୀ ଚାଉଲ ଦୁରା ଆର ବୁଢ଼ାବୁଢ଼ି ପାଉଥିବାର ଭତା ପରିବାରର ସାହାଭରସା ପାଲଟିଛେ। ବଡ଼ାକଷ୍ଟେ ପୁଓ ଆର ନାତି ନାତେନକଁର ଲାଗି ମୂରଲି ଥିରପାଏନ୍ ଯୁଗାଡ଼ କରୁଛନ୍। ଏନ୍ତାଥି ଉପେ ଶୂଇନ୍ ଅସାହା ମୂରଲି ପୁଓର ଚିକିଛା ସାହାଯ୍ ଲାଗି ଗଣମାଧ୍ୟମ ଜରିଆରେ ଜିଲା ପରଶାସନ, ସହୁରୁଦ୍ ଲୁକ୍କୁ ବିନ୍ତି କରିଛନ୍। ଯେ ମୋର ପୁଓକେ ନୁକୋ କରବାରେ ସାହାଯ୍ କରବା ମୁଇଁ ତାରଠାନେ ଯୁଗ ଯୁଗ ତକ୍ ଲଗ୍ତିଆ ହେଇ ରହିମି ବଲି ସେ କଁଦ୍କଁଦ୍ନିଅଁା ହେଇ କହିଛନ୍। ଇ ବାବ୍ଦେ ସରପଁଚ୍ ପ୍ରଭାତୀ ମେହେରକୁଁ ପଚରାଲାରୁ ସରକାରୀ ନିୟମ କାଣା ଅଛେ ମୁଇଁ ନାଇଁ ଜାନି। ବ୍ଲକ ପରଶାସନକେ ବୁଝି ଯେନ୍ଟା ହେବା ନିହାତି ଭାବେ ସାହାଯ୍ ଯୁଗେଇ ଦିଆଯିବା ବଲି ସେ କହିଥିଲେ।