ବାରିପଦା ଅଫିସ,୨୪ା୧:ମୟୂରଭଞ୍ଜ ଜିଲା ଶିମିଳିପାଳ ଅଭୟାରଣ୍ୟ ଏବେ ଶିକାରୀଙ୍କ କବ୍ଜାରେ। ଏଠାରେ ପ୍ରତିଦିନ ବନ୍ୟପ୍ରାଣୀ ଶିକାର କରାଯାଉଛି। ବନବିଭାଗ କର୍ମଚାରୀମାନେ ପାଟ୍ରୋଲିଂ କରୁଥିବା ବେଳେ ଶିକାରୀଙ୍କ ଲୋଲୁପ ଦୃଷ୍ଟିରୁ ବର୍ତ୍ତି ପାରୁନାହାନ୍ତି ବନ୍ୟପ୍ରାଣୀ। ୫ଦିନ ତଳେ ଏକ କଲରାପତରିଆ ବାଘର ଚମଡ଼ା ଉଦ୍ଧାର ହେବା ପରେ ପୁଣି ଏକ ଦନ୍ତା ଶିକାରକୁ ନେଇ ବିଭାଗର ଦାୟିତ୍ୱହୀନତା ପ୍ରତି ଅଙ୍ଗୁଳି ଉଠିଛି। ରବିବାର ଦନ୍ତାର ଗଳିତ ମୃତଦେହ ଓ ସୋମବାର ଏକ ଚିତା ପ୍ରଜାତିର ଜଙ୍ଗଲି ବିଲେଇ ଛୁଆ ମରିପଡ଼ିବା ଘଟଣା ପ୍ରାଣୀପ୍ରେମୀମାନଙ୍କୁ ହତୋତ୍ସାହିତ କରିଛି। ବନ୍ୟପ୍ରାଣୀ ସୁରକ୍ଷାରେ ବନବିଭାଗ ବିଫଳ ହେଉଥିବାରୁ ଅଭୟାରଣ୍ୟ ପ୍ରାଣୀଶୂନ୍ୟ ହେବା ନେଇ ଆଶଙ୍କା ପ୍ରକାଶ ପାଇଛି।
ମାସକ ପୂର୍ବେ ଉଦଳା ରେଞ୍ଜ ଅଞ୍ଚଳରୁ ଏସ୍ଟିଏଫ୍ ଏକ ମହାବଳ ବାଘ ଚମଡ଼ା ଜବତ କରି ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲା। ଖୁଣ୍ଟା ଥାନା ପୋଲିସ ଗତ ବୁଧବାର ଏକ କଲରାପତରିଆ ବାଘର ଚମଡ଼ା ଜବତ କରି ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି। ସେହିପରି ଜେନାବିଲ ରେଞ୍ଜ ଗୋରାଣ୍ଡି ବିଟ୍ ହାଉସ୍ ଅଞ୍ଚଳରେ ଏକ ଦନ୍ତା ଶିକାର ପରେ ବିଭାଗୀୟ ଅଧିକାରୀମାନେ ଦୋଷ ଲୁଚାଇବାକୁ ତାହାର ମୃତଦେହ ପୋଡ଼ିଦେଇ ଦେହାବଶେଷକୁ ନିକଟସ୍ଥ ନଦୀରେ ଭସାଇ ଦେଇଥିଲେ। ଏ ସଂକ୍ରାନ୍ତରେ ସ୍ଥାନୀୟ ଗ୍ରାମବାସୀ ବନ ବିଭାଗର ଉଚ୍ଚପଦସ୍ଥ ଅଧିକାରୀଙ୍କୁ ଜଣାଇବା ପରେ ସମସ୍ତ ଘଟଣା ଲୋକଲୋଚନକୁ ଆସିଥିଲା। ମାତ୍ର ବିଭାଗୀୟ ଅନୁକମ୍ପା ପ୍ରଦର୍ଶନ ପୂର୍ବକ ଦୋଷୀ ଅଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିଲା। ଏହି ଘଟଣାକୁ ଉଚ୍ଚ ନ୍ୟାୟାଳୟ ଭର୍ତ୍ସନା କରିବା ପରେ ସମ୍ପୃକ୍ତ ୩ ଅଧିକାରୀଙ୍କ ବିରୋଧରେ ମାମଲା ରୁଜୁ ହୋଇଥିଲା ଏବଂ ପରବର୍ତ୍ତୀ ସମୟରେ ସେମାନଙ୍କୁ କୋର୍ଟ ଚାଲାଣ କରାଯାଇଥିଲା। ସେହିପରି ବ୍ୟାଘ୍ର ସଂରକ୍ଷଣ ପ୍ରକଳ୍ପ ତାଳବନ୍ଧ ରେଞ୍ଜ ବାଙ୍କଡିହୀ ଅଞ୍ଚଳରୁ ରବିବାର ଏକ ଦନ୍ତାହାତୀର ଗଳିତ ମୃତଦେହକୁ ବନ ବିଭାଗ ଜବତ କରିଥିଲା। ଦନ୍ତାର ବୟସ ପାଖାପାଖି ୪୦ବର୍ଷ ହୋଇଥିବା ବେଳେ ମଣଦା ପ୍ରାଣୀ ଚିକିତ୍ସକଙ୍କ ଦ୍ୱାରା ମୃତଦେହ ବ୍ୟବଚ୍ଛେଦ କରାଯାଇଛି। ନିୟମାନୁଯାୟୀ ରକ୍ତ ନମୁନା ସଂଗ୍ରହ କରାଯାଇ ପରୀକ୍ଷା ଲାଗି ଭୁବନେଶ୍ୱରସ୍ଥିତ ଓୟୁଏଟିକୁ ପଠାଯାଇଛି। ହାତୀର ପାଟି, ମୁହଁ ଓ ମୁଣ୍ଡ ଠିକ ଥିବା ବେଳେ ଶିକାରୀମାନେ ଏହାର ଦାନ୍ତକୁ ଉପାଡ଼ି ନେଇଥିବା ବିଭାଗୀୟ ଅଧିକାରୀ ଏକ ପ୍ରେସ ବିବୃତିରେ ଜଣାଇଛନ୍ତି। ତେବେ ହାତୀର ଦାନ୍ତକୁ ଉପାଡ଼ି ନେବା ସମ୍ଭବ ନୁହେଁ ବୋଲି ପ୍ରାକ୍ତନ ବନ୍ୟପ୍ରାଣୀ ତତ୍ତ୍ୱାବଧାରକ ଭାନୁମିତ୍ର ଆଚାର୍ଯ୍ୟ କହିଛନ୍ତି। ଶିକାରୀମାନେ ହାତୀର ଦାନ୍ତକୁ କାଟି ନେଇଥିବା ବେଳେ ବିଭାଗୀୟ ଅଧିକାରୀଙ୍କ ଖାମଖିଆଲ ତଦନ୍ତକୁ ସାଧାରଣରେ ନାପସନ୍ଦ କରାଯାଇଛି। ତେବେ ମୂଲ୍ୟବାନ ଦାନ୍ତକୁ ଜବତ କରିବା ପାଇଁ ଏକ ସ୍ବତନ୍ତ୍ର ଟିମ୍ ସହିତ ଡଗ୍ ସ୍କ୍ବାଡ୍କୁ ନିୟୋଜିତ କରାଯାଇଛି ବୋଲି ଉତ୍ତର ଡିଭିଜନର ଉପ ନିର୍ଦ୍ଦେଶକ ସାଇ କିରଣ ପ୍ରକାଶ କରିଛନ୍ତି। ଶିମିଳିପାଳରେ ପ୍ରତିଦିନ ବନ୍ୟପ୍ରାଣୀଙ୍କ ମୃତ୍ୟୁ ହେଉଥିବା ବେଳେ ସେମାନଙ୍କ ସୁରକ୍ଷା କିପରି ଚାଲିଛି ତାହାକୁ ନେଇ ସନ୍ଦେହ ସୃଷ୍ଟି ହେବାରେ ଲାଗିଛି। ଏପରି ଭାବେ ବନ୍ୟଜନ୍ତୁ ଶିକାର କରାଗଲେ ଆଗାମୀ ଦିନରେ ଅଭୟାରଣ୍ୟରେ ପଥର କିମ୍ବା ସିମେଣ୍ଟରେ ପ୍ରସ୍ତୁତ ଜୀବଜନ୍ତୁ ଶୋଭା ପାଇବେ ବୋଲି କୁହାଯାଉଛି।