ନାଉଗାଁ,୨୩।୮(ସ୍ବ.ପ୍ର.): ନାଉଗାଁ ବ୍ଲକ ଗଜରାଜପୁର ପଞ୍ଚାୟତରେ ଥିବା ଗୋପାଳଜୀଉ ଉ.ପ୍ରା. ବିଦ୍ୟାଳୟର ସହକାରୀ ଶିକ୍ଷକ ଉମାକାନ୍ତ ଆଚାଯର୍ୟଙ୍କୁ ନିଳମ୍ବନ କରିବା ପ୍ରତିବାଦରେ ଗୁରୁବାର ଛ୍ରାତ୍ରୀଛାତ୍ର, ଅଭିଭାବକ ଓ ଶିକ୍ଷା କମିଟି ସଦସ୍ୟମାନେ ଆନ୍ଦୋଳନକୁ ଓହ୍ଲାଇଛନ୍ତି। ସେମାନେ ବିଦ୍ୟାଳୟ ଗେଟ୍ରେ ତାଲା ପକାଇଦେବା ସହ ଧାରଣାରେ ବସିଥିଲେ। ଏପରିକି ବିଦ୍ୟାଳୟ ସମ୍ମୁଖ ଗଜରାଜପୁର-ମୁଣ୍ଡାଳ ମୁଖ୍ୟ ରାସ୍ତାକୁ ଟାୟାର ଜାଳି ଅବରୋଧ କରିଥିଲେ। ଖବରପାଇ ଘଟଣାସ୍ଥଳରେ ବ୍ଲକ ଶିକ୍ଷା ଅଧିକାରୀ ଗଣେଶ୍ୱର ସେଠୀ ପୋଲିସ ସହ ପହଞ୍ଚତ୍ଥିଲେ। ଶିକ୍ଷା କମିଟି ସଭାପତି ଅଶୋକ କୁମାର ପଟ୍ଟନାୟକ, ସରପଞ୍ଚ ରଶ୍ମିତା ମହାନ୍ତି, ସ୍ଥାନୀୟ ଯୁବକ ତୁଷାରକାନ୍ତ ମହାନ୍ତିଙ୍କ ସହ ଆଲୋଚନା କରି ଶନିବାର ସୁଦ୍ଧା ଏନେଇ ନିଷ୍ପତ୍ତି ଗ୍ରହଣ କରାଯିବ ବୋଲି ସେ ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ତେବେ ୨ ଦିନ ମଧ୍ୟରେ ପ୍ରତିଶ୍ରୁତି ପାଳନ କରା ନ ଗଲେ ଶନିବାରଠାରୁ ଉକ୍ତ ବିଦ୍ୟାଳୟ ସମେତ ପଞ୍ଚାୟତର ସମସ୍ତ ବିଦ୍ୟାଳୟରେ ତାଲା ପଡିବ ବୋଲି ସେମାନେ ଚେତାବନୀ ଦେଇଛନ୍ତି। ଏନେଇ ୯୨ ଛାତ୍ରୀଛାତ୍ରଙ୍କ ଦସ୍ତଖତ ସମ୍ବଳିତ ଏକ ଦାବିପତ୍ର ବ୍ଲକ ଶିକ୍ଷା ଅଧିକାରୀଙ୍କୁ ଦିଆଯାଇଥିଲା। ଏଥିରେ ଦର୍ଶାଯାଇଛି ଯେ, ଉମାକାନ୍ତ ସାର ଜଣେ ଭଲ ଶିକ୍ଷକ ଓ ତାଙ୍କର ଶିକ୍ଷାଦାନ ଶୈଳୀ ଉଚ୍ଚକୋଟିର। ତାଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରା ନ ଗଲେ କୌଣସି ଶିକ୍ଷକଙ୍କୁ ବିଦ୍ୟାଳୟକୁ ପୁରାଇ ଦିଆଯିବ ନାହିଁ। ସୂଚନାଯୋଗ୍ୟ, ବୁଧବାର ଜିଲା ଶିକ୍ଷା ଅଧିକାରୀ ପ୍ରତିଭା ମଞ୍ଜରୀ ଦାସ ଅଚାନକ ନାଉଗଁା ବ୍ଲକ ଗସ୍ତରେ ଆସି ଗୋପାଳଜୀଉ ଉପ୍ରା ବିଦ୍ୟାଳୟକୁ ଯାଇଥିଲେ। ସେଠାରେ ଶିକ୍ଷକମାନଙ୍କୁ ଲେଶନ ପ୍ଲାନ ମାଗିଥିଲେ। ସହକାରୀ ଶିକ୍ଷକ ଶ୍ରେଣୀଗୃହରେ ଥିବାବେଳେ ଲେଶନ ପ୍ଲାନ ଦେଇ ପାରି ନ ଥିଲେ। ଫଳରେ ସଙ୍ଗେ ସଙ୍ଗେ ତାଙ୍କୁ ନିଲମ୍ବନ କରାଯାଇଥିଲା। ଏନେଇ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରୁ ପ୍ରଧାନ ଶିକ୍ଷକ ରମାକାନ୍ତ ମହାନ୍ତିଙ୍କ ନିକଟକୁ ଚିଠି ଆସିଥିଲା।