ବଇଣ୍ଡା,୩୦।୮(ଡି.ଏନ.ଏ.)- କିଶୋରନଗର ବ୍ଲକ ହଣ୍ଡପା ଥାନା ନୁନୁକାପଶି ପଞ୍ଚାୟତ ଶିକ୍ଷକପଡ଼ାରେ ରହୁଥିବା ପ୍ରଭାତ ରଞ୍ଜନ ବିଶ୍ୱାଳଙ୍କ ଘରୁ ଗୁରୁବାର ବିଳମ୍ବିତ ରାତିରେ ଲୁଟ୍ ହୋଇଛି। ଦୁର୍ବୃତ୍ତମାନେ ତାଙ୍କ ଝରକା ଗ୍ରୀଲ ତାଡି ଆଲମିରା ଭାଙ୍ଗି ୧୦ଟି ସୁନା ମୁଦି, ୧୦ ହଜାର ଟଙ୍କା ସହ ଆସବାବପତ୍ର ଚୋରି କରି ନେଇଯାଇଛନ୍ତି। ଏ ନେଇ ପ୍ରଭାତ ଶୁକ୍ରବାର ସକାଳେ ହଣ୍ଡପା ଥାନାରେ ଅଭିଯୋଗ କରିଛନ୍ତି। ପୋଲିସ ନଂ. ୧୪୭/୧୯ରେ ଏକ ମାମଲା ରୁଜୁ କରିଛି। ଖବରପାଇ ଆଠମଲ୍ଲିକ ଏସଡିପିଓ ସେକ ଅବଦୁଲ କରିମ, ହଣ୍ଡପା ଥାନା ସେକେଣ୍ଡ ଅଫିସର ସରୋଜ କୁମାର ଦାସ, ସନ୍ଧାନୀ କୁକୁର, ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ହେଲେ ଚୋରି କିମ୍ବା ଚୋରର କୌଣସି ସନ୍ଧାନ ପାଇପାରି ନାହାନ୍ତି। ପ୍ରଭାତ ଘରେ ନ ଥିବାବେଳେ ତାଙ୍କ ବଡ଼ ନାନି ଏକୁଟିଆ ଅନ୍ୟ ରୁମରେ ଶୋଇଥିଲେ। ପ୍ରଭାତଙ୍କ ଶୋଇବା ଘରେ ଦୁର୍ବୃତ୍ତମାନେ ପଶି ଲୁଟ କରିଥିବା ଅଭିଯୋଗପତ୍ରରେ ଦର୍ଶାଯାଇଛି। ଗତ ୨ ମାସ ତଳେ ଶିକ୍ଷକପଡ଼ାରୁ ଜଣେ ଅବସରପ୍ରାପ୍ତ ଅବକାରୀ ବିଭାଗ କର୍ମଚାରୀଙ୍କ ଘରୁ ତାଲା ଭାଙ୍ଗି ସୁନା ଗହଣା ଲୁଟ୍ ହୋଇଥିଲା। ବାରମ୍ବାର ବଇଣ୍ଡା ଅଞ୍ଚଳରେ ଚୋରି ବଢୁଥିବାବେଳେ ପୋଲିସର ରାତ୍ର ପାଟ୍ରୋଲିଂ ଠିକ ଭାବେ ହେଉ ନ ଥିବା ଯୋଗୁ ଚୋରି ବଢୁଥିବା ଶିକ୍ଷପଡ଼ାବାସୀ ଅଭିଯୋଗ କରିଛନ୍ତି। ତୁରନ୍ତ ରାତ୍ର ପାଟ୍ରୋଲିଂ କଡ଼ାକଡ଼ି କରିବା ସହ ବଇଣ୍ଡା ଫାଣ୍ଡିକୁ ଏକ ଜିପ ସହ ଆବଶ୍ୟକ କର୍ମଚାରୀ ଯୋଗାଇ ଦେବା ପାଇଁ ବଇଣ୍ଡା ଗ୍ରାମବାସୀ ଦାବି କରିଛନ୍ତି। (ଫଟୋ-)