ବଡ଼ସାହି,୩୦ା୮(ସ୍ବ.ପ୍ର)-ବିଜ୍ଞାନ ଶିକ୍ଷକ ନିଯୁକ୍ତି ଦାବିରେ ଗୁରୁବାର ପୂର୍ବାହ୍ନରେ ବଡ଼ସାହି ବ୍ଲକ ଶିକ୍ଷାଧିକାରୀ (ବିଇଓ)ଙ୍କ କାର୍ଯ୍ୟାଳୟ ସମ୍ମୁଖରେ ଶାଳଗାଁ ପଞ୍ଚାୟତର ପାଳପାଟଣା ଗ୍ରାମବାସୀ ଧାରଣା ଦେଇଥିଲେ। ଗ୍ରାମରେ ଥିବା କ୍ଷୀରଚୋରା ଗୋପୀନାଥ ନୋଡ଼ାଲ ଉପ୍ରା ସ୍କୁଲର ପରିଚାଳନା କମିଟିର ସଭାପତି ଓ ସମ୍ପାଦକଙ୍କ ନେତୃତ୍ୱରେ ସମସ୍ତ ସଦସ୍ୟାସଦସ୍ୟ ଏବଂ ଅବିଭାବକଗଣ ଧାରଣା ଦେବା ସହିତ ଅଧିକାରୀ ଓ କର୍ମଚାରୀଙ୍କୁ ଭିତରକୁ ଛାଡ଼ି ନ ଥିଲେ। ଅଭିଯୋଗରୁ ପ୍ରକାଶ ଯେ, ଏହି ସ୍କୁଲରେ ୧ମରୁ ୮ମଶ୍ରେଣୀ ପର୍ଯ୍ୟନ୍ତ ୧୦୧ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି ା ତେବେ ୪ଜଣ ଶିକ୍ଷକଙ୍କ ବଦଳରେ ବର୍ତ୍ତମାନ ୨ଜଣ ଅଛନ୍ତି। ଛୁଟିରେ ଥିବା ଶିକ୍ଷୟିତ୍ରୀଙ୍କର ୨୦୧୮ ଡ଼ିସେମ୍ବର ମାସରେ ଅକାଳ ମୃତ୍ୟୁ ଘଟିଥିବା ବେଳେ ଫେବୃଆରୀ ମାସରେ ଭାରପ୍ରାପ୍ତ ପ୍ରଧାନଶିକ୍ଷକ ଅବସର ଗ୍ରହଣ କରିଥିଲେ। ଶିକ୍ଷାବିଭାଗ ପକ୍ଷରୁ ଏହି ସମୟରେ ଅନ୍ୟ ଜଣେ ଶିକ୍ଷକଙ୍କୁ ଉକ୍ତ ସ୍କୁଲରେ ନିଯୁକ୍ତ କରାଯାଇଥିଲା ା ତେବେ ଗ୍ରାମବାସୀ ଜଣେ ବିଜ୍ଞାନ ଶିକ୍ଷକ ନିଯୁକ୍ତ ଦାବି କରି ଉକ୍ତ ଶିକ୍ଷକଙ୍କୁ କାର୍ଯ୍ୟରେ ଯୋଗଦେବାକୁ ଦେଇ ନ ଥିଲେ। ସେହିଦିନଠାରୁ ୨ଜଣ ଶିକ୍ଷକ ୮ଟି ଶ୍ରେଣୀରେ ପାଠ ପଢ଼ାଉଛନ୍ତି। ବିଜ୍ଞାନ ଶିକ୍ଷକ ନ ଥିବାରୁ ଛାତ୍ରୀଛାତ୍ରମାନେ ବିଜ୍ଞାନ ଓ ଗଣିତ ଶିକ୍ଷାରୁ ବଞ୍ଚିତ ରହୁଛନ୍ତି। ଶିକ୍ଷକ ନିଯୁକ୍ତିରେ ଅହେତୁକ ବିଳମ୍ବ ହେବାରୁ ଧାରଣା ଦେବାକୁ ବାଧ୍ୟ ହୋଇଛୁ ବୋଲି ଅଭିଭାବକ ପରମାନନ୍ଦ ତରେଇ, ବିଜୟ କୁମାର ମାଝି, ହରିହର ଗିରି, ବଂଶୀଧର ଗିରି ଓ ରାଜେନ୍ଦ୍ର କୁମାର ଜେନା କହିଛନ୍ତି ା ଏ ସମ୍ପର୍କରେ ବିଆରସିସି ବାବାଜୀ ଚରଣ ବେହେରା କୁହନ୍ତି, ଘଟଣା ସମ୍ପର୍କରେ ସେ ଛୁଟିରେ ଥିବା ବିଇଓ ଦେବବ୍ରତ ବାରିକଙ୍କ ଦୃଷ୍ଟି ଆକର୍ଷଣ କରିଥିଲେ ା ନୂତନ ଶିକ୍ଷକ ନିଯୁକ୍ତ ହେବା ପର୍ଯ୍ୟନ୍ତ ଜଣେ ବିଜ୍ଞାନ ଶିକ୍ଷୟିତ୍ରୀ ଡ଼େପୁଟେସନରେ କାର୍ଯ୍ୟ ତୁଲାଇବେ ବୋଲି ଧାରଣାକାରୀଙ୍କୁ ବିଇଓ ପ୍ରତିଶ୍ରୁତି ଦେବାରୁ ୧୧ଟା ୩୦ମିନିଟରେ ଧାରଣା ପ୍ରତ୍ୟାହୃତ ହୋଇଥିଲା।