ରୂପ୍ସା, ୯।୧୨(ଡି.ଏନ.ଏ.)-ବାଲେଶ୍ୱର ସଦର ବ୍ଲକ ଅନ୍ତର୍ଗତ ହଳଦୀପଦାସ୍ଥିତ ଜନାର୍ଦ୍ଦନ ସରକାରୀ ଉପ୍ରା ବିଦ୍ୟାଳୟରେ ୧ମରୁ ୮ମ ଶ୍ରେଣୀ ପର୍ଯ୍ୟନ୍ତ ୨୭୭ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଶିକ୍ଷା ବିଭାଗର ନିୟମ ଅନୁଯାୟୀ ୩୦ଜଣ ଛାତ୍ରୀଛାତ୍ରଙ୍କ ଲାଗି ଜଣେ ଲେଖାଏ ଶିକ୍ଷକ ହିସାବରେ ଏଠାରେ ୯ଜଣ ଶିକ୍ଷକ ରହିବା କଥା। ମାତ୍ର ଏବେ ୬ଜଣ ଶିକ୍ଷୟିତ୍ରୀ, ଶିକ୍ଷକ ରହିଛନ୍ତି। ଏମାନଙ୍କ ମଧ୍ୟରୁ ବିଜ୍ଞାନଶିକ୍ଷକଙ୍କୁ ବଦଳି କରାଯାଉଥିବା ଜାଣି ଅଭିଭାବକମାନେ ଏହାକୁ ବିରୋଧ କରୁଛନ୍ତି। ତାଙ୍କ ସ୍ଥାନରେ ଅନ୍ୟ କାହାକୁ ନିଯୁକ୍ତି ଦେବା ପ୍ରସଙ୍ଗ ଉଠାଯାଉ ନ ଥିବାରୁ ଏଭଳି ବଦଳି ନ କରିବାକୁ ଦାବି କରି ସ୍କୁଲ ମ୍ୟାନେଜମେଣ୍ଟ କମିଟି (ଏସଏମସି)ର ସଭ୍ୟାସଭ୍ୟ ସୋମବାର ସ୍କୁଲ ଫାଟକ ଆଗରେ ଧାରଣା ଦେଇଥିଲେ। କମିଟିର ସଭାପତି କାର୍ତ୍ତିକ ସାହୁ, ସଭ୍ୟା ଆରତୀ ଜେନା, କମଳିନୀ ମହାପାତ୍ର, ସରସ୍ବତୀ ରଣା, ସଭ୍ୟ ଲକ୍ଷ୍ମୀକାନ୍ତ ସାହୁ, ପରେଶ ପାଣିଗ୍ରାହୀ, ଗଣେଶ ଚନ୍ଦ୍ର ଜେନା ଓ ସେକ ମୀନାର ପ୍ରମୁଖ ଏହି ଧାରଣା ଆନ୍ଦୋଳନରେ ସାମିଲ ହୋଇଥିଲେ। ଉଲ୍ଲେଖନୀୟ ଯେ, ସ୍କୁଲର ବିଜ୍ଞାନଶିକ୍ଷକଙ୍କୁ ଅନ୍ୟତ୍ର ବଦଳି କରିବା ପାଇଁ ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟରେ ଏକ ପ୍ରସ୍ତାବ ଆଗତ ହୋଇଛି। ଏ ସମ୍ପର୍କରେ ଏସଏମସି କର୍ମକର୍ତ୍ତା ଓ ଅଭିଭାବକମାନେ ଜାଣିବା ପରେ ଶିକ୍ଷକ ବଦଳିକୁ ବାତିଲ୍ କରା ନ ଗଲେ ଅଭିଭାବକ ଓ ଛାତ୍ରୀଛାତ୍ର ଅନିର୍ଦ୍ଦିଷ୍ଟ କାଳ ପାଇଁ ଧାରଣାରେ ବସି ରହିବେ ବୋଲି ଚେତାବନୀ ଦେଇଛନ୍ତି।