ଆଠମଲ୍ଲିକ, ୪ା୧୦ (ଡି.ଏନ.ଏ.)-ବିଦ୍ୟାଳୟ ଛାତ୍ରୀଙ୍କୁ ମାଗଣାରେ ସାନିଟାରି ନାପକିନ ଯୋଗାଇଦେବାର ବ୍ୟବସ୍ଥା କରାଯାଇଛି। ସମସ୍ତ ବିଦ୍ୟାଳୟରେ ଛାତ୍ରୀମାନେ ଯେପରି ଏହି ପ୍ୟାଡ ପାଇବେ ସେଥିପାଇଁ ସରକାରୀ ସ୍ତରରେ ନିୟମ ରହିଛି। ହେଲେ ଅନେକ ସ୍ଥାନରେ ଥିବା ବିଦ୍ୟାଳୟଗୁଡିକର ଛାତ୍ରୀମାନଙ୍କୁ ସାନିଟାରି ନାପକିନ ବଣ୍ଟା ନ ଯାଇ ପଡିରହିଛି, ଯାହା ଅନୁଗୋଳ ଜିଲା ଆଠମଲ୍ଲିକ ବ୍ଲକରେ ଦେଖିବାକୁ ମିଳିଛି। ବ୍ଲକକୁ ଆସିଥିବା ୯ ଲକ୍ଷ ଟଙ୍କାର ପ୍ୟାଡରୁ ୭ ଲକ୍ଷର ନାପକିନ ବଣ୍ଟା ନ ହୋଇ ବନ୍ଦ କୋଠରୀରେ ପଡିରହିଥିବା ଅଭିଯୋଗ ଆସିଛି। ଏଥିଯୋଗୁ ଅଭିଭାବକ ତଥା ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ସୂଚନା ମୁତାବକ, ଆଠମଲ୍ଲିକ ବ୍ଲକରେ ସମୁଦାୟ ୨୦୮ଟି ପ୍ରାଥମିକ ବିଦ୍ୟାଳୟ, ୨୬ଟି ହାଇସ୍କୁଲ ରହିଛି। ନିୟମ ମୁତାବକ, ୧୧ରୁ ୧୯ ବର୍ଷର ବାଳିକାମାନଙ୍କୁ ସାନିଟାରି ନାପକିନ ଯୋଗାଇଦିଆଯିବ। ଏଥିପାଇଁ ଆଠମଲ୍ଲିକ ବ୍ଲକରେ ଥିବା ବିଦ୍ୟାଳୟଗୁଡିକ ପାଇଁ ୯ ଲକ୍ଷ ଟଙ୍କାର ନାପକିନ ସରକାରଙ୍କ ପକ୍ଷରୁ ଯୋଗାଣ କରାଯାଇଥିଲା। ହେଲେ ସେଥିମଧ୍ୟରୁ ପ୍ରାୟ ୭ ଲକ୍ଷ ଟଙ୍କାର ନାପକିନ ସ୍ଥାନୀୟ ଲିପ୍ତିଙ୍ଗ ପ୍ରାଥମିକ ବିଦ୍ୟାଳୟରେ ୬ ମାସ ହେଲା ପଡିରହିଛି। ଏହାର ବଣ୍ଟନ ଦାୟିତ୍ୱ ମାଧପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଦିଆଯାଇଥିଲେ ମଧ୍ୟ ସମସ୍ତ ବିଦ୍ୟାଳୟକୁ ପ୍ୟାଡ ପ୍ରଦାନ କରାଯାଇପାରି ନାହିଁ। ଉଭୟ ସ୍ବାସ୍ଥ୍ୟ ଓ ଶିକ୍ଷା ବିଭାଗର ଅବହେଳା ଯୋଗୁ ଏପରି ଅବ୍ୟବସ୍ଥା ହୋଇଥିବା ଅଭିଭାବକମାନେ ଅଭିଯୋଗ କରିଛନ୍ତି। ଏ ସମ୍ପର୍କରେ ମାଧପୁର ମେଡିକାଲ ଅଫିସର ରାହୁଲ୍ ଗର୍ଗ କହିଛନ୍ତି, ଶିକ୍ଷା ବିଭାଗ ଏଥି ପାଇଁ ସହଯୋଗ କରୁ ନ ଥିବାରୁ ସାନିଟାରି ନାପକିନ ବଣ୍ଟା ଯାଇପାରୁନାହିଁ। ସ୍ଥାନୀୟ ବିଆରସିସି ଛବୀନ୍ଦ୍ର ସିଠଙ୍କୁ ଯୋଗାଯୋଗ କରିବାରୁ ସେ କହିଲେ, ଶିକ୍ଷା ବିଭାଗକୁ ବିଭିନ୍ନ ସ୍କୁଲରେ ନାପକିନ ଯୋଗାଇ ଦେବା ପାଇଁ କୌଣସି ନିର୍ଦ୍ଦେଶାନାମା ନାହିଁ। ସେ ସମ୍ପର୍କରେ କିଛି ଜାଣୁନାହୁଁ।