ଅନୁଗୋଳ ଅଫିସ, ୧୬।୭ ଅନୁଗୋଳ ସହର ପଶ୍ଚିମ ବଜାରପଡ଼ା ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପ୍ରଣତି ମିଶ୍ର ଓ ସହକାରୀ ଶିକ୍ଷୟିତ୍ରୀ ପ୍ରୀତିମଞ୍ଜରୀ ଦ୍ୱିବେଦୀଙ୍କୁ ଶିକ୍ଷାଦାନରେ ଅବହେଳା କାରଣରୁ ସସ୍ପେଣ୍ଡ କରାଯାଇଥିଲା। ଏହାକୁ ବିରୋଧ କରି ସ୍କୁଲ ପରିଚାଳନା କମିଟିର ସୁଲେଖା ବେଗମ୍ଙ୍କ ସହ ଅନ୍ୟମାନେ ବିଦ୍ୟାଳୟ ଫାଟକରେ ତାଲା ପକାଇ ପ୍ରତିବାଦ କରିଥିଲେ। ଖବରପାଇ ଏବିଇଓ ଉଦ୍ଧବ ପ୍ରଧାନ ଓ ସିଆର୍ସିସି ଅଖିଳ ଷଡ଼ଙ୍ଗୀ ସ୍କୁଲରେ ପହଞ୍ଚି କମିଟି ସଦସ୍ୟାସଦସ୍ୟଙ୍କୁ ବୁଝାଶୁଝା କରିବା ପରେ ଆନ୍ଦୋଳନ ହଟିଥିଲା। ମଙ୍ଗଳବାର ଠାରୁ ସ୍କୁଲରେ ପାଠପଢ଼ା ସ୍ବାଭାବିକ ହେବ ବୋଲି ଅନୁଗୋଳ ବ୍ଲକ ଶିକ୍ଷା ଅଧିକାରୀ ଲୋପାମୁଦ୍ରା ପଟ୍ଟନାୟକ ସୂଚନା ଦେଇଛନ୍ତି। ପ୍ରଧାନ ଶିକ୍ଷୟିତ୍ରୀ ପ୍ରଣତି ମିଶ୍ରଙ୍କୁ ସୌଭାଗ୍ୟ ନଗରସ୍ଥିତ ବିଦ୍ୟାଳୟରେ ଓ ସହକାରୀ ଶିକ୍ଷୟିତ୍ରୀ ପ୍ରୀତିମଞ୍ଜରୀ ଦ୍ୱିବେଦୀଙ୍କୁ ଉତ୍ତରପଡ଼ା ବିଦ୍ୟାଳୟରେ ହାଜିରା ଦେବା ପାଇଁ ନିର୍ଦ୍ଦେଶ ରହିଛି। ଏହି ଦୁଇ ଶିକ୍ଷୟିତ୍ରୀଙ୍କ ସ୍ଥାନରେ ନୂଆ ଦୁଇ ଜଣ ଶିକ୍ଷକଙ୍କୁ ନିଯୁକ୍ତି ଦିଆଯାଇଛି।
