ଛତ୍ରପୁର, ୧୧।୪(ଡି.ଏନ୍.ଏ.): ଗଞ୍ଜାମ ଜିଲା ଶିତଳାପଲିଠାରେ ଥିବା ଟାଟା ହସ୍ପିଟାଲକୁ କୋଭିଡ ହସ୍ପିଟାଲରେ ପରିଣତ କରାଯାଇଛି। ଗତ ଶୁକ୍ରବାରଠାରୁ ଏହା କାର୍ଯ୍ୟକ୍ଷମ ହୋଇଛି। ଏ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟୁଇଟକରି ଗଞ୍ଜାମ ଜିଲା ପ୍ରଶାସନର ପ୍ରଶଂସା କରିଛନ୍ତି।
କରୋନା ସଂକ୍ରମିତଙ୍କ ପାଇଁ ଖୁବ୍ କମ୍ ଦିନରେ ଗଞ୍ଜାମ ଜିଲା ପ୍ରଶାସନ ଦ୍ୱାରା ୨୦୦ ଶଯ୍ୟା ଓ ୧୫ ଆଇସିୟୁ ବିଶିଷ୍ଟ କୋଭିଡ ହସ୍ପିଟାଲ କାର୍ଯ୍ୟକ୍ଷମ ହେବା ଏକ ପ୍ରଶଂସନୀୟ ପଦକ୍ଷେପ। ଟାଟା ଷ୍ଟିଲର ସହଯୋଗରେ ନିର୍ମାଣ ହୋଇଥିବା ଏହି ହସ୍ପିଟାଲରେ ସାଧାରଣ କରୋନା ୱାର୍ଡ ଏବଂ ଆଇସୋଲେଶନ ୱାର୍ଡ ପୃଥକ ଭାବେ ରହିଛି। ଏମ୍କେସିଜି ଗଞ୍ଜାମର ଡାକ୍ତର, ନର୍ସ, ଟେକ୍ନିସିଆନ ଓ ସିଡିଏମ ଏବଂ ପିଏଚ୍ଓ କର୍ମୀମାନେ ଏଠାରେ ଚିକିତ୍ସା ସେବା ଯୋଗାଇ ଦେବେ। କରୋନା ସଂକ୍ରମିତଙ୍କ ଉତ୍ତମ ଚିକିତ୍ସା ସୁନିଶ୍ଚିତ କରିବା ପାଇଁ ଅଧିକ ସ୍ବତନ୍ତ୍ର କୋଭିଡ ହସ୍ପିଟାଲ ନିର୍ମାଣ ଉପରେ ଓଡ଼ିଶା ସରକାର ଗୁରୁତ୍ୱ ଦେଉଥିବା ମୁଖ୍ୟମନ୍ତ୍ରୀ ତାଙ୍କ ଟୁଇଟ୍ରେ ଲେଖୁଛନ୍ତି।
