ଶିବସେନା ଦାବି ଗ୍ରହଣୀୟ ନୁହେଁ

ନୂଆଦିଲ୍ଲୀ/ମୁମ୍ବାଇ,୧୪ା୧୧(ପି.ଟି.): ୫୦:୫୦ ସୂତ୍ରରେ ମୁଖ୍ୟମନ୍ତ୍ରୀ ପଦବୀ ଭାଗବଣ୍ଟା ସମେତ ଶିବସେନାର ଅନ୍ୟ ଦାବିଗୁଡ଼ିକ ଗ୍ରହଣଯୋଗ୍ୟ ନୁହେଁ। ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଜାରି ହେବା ପରେ ରାଜନୈତିକ ସଙ୍କଟକୁ ନେଇ ବୁଧବାର ପ୍ରଥମଥର ପାଇଁ ମୁହଁ ଖୋଲି ଏପରି ସ୍ପଷ୍ଟବାଣୀ ଶୁଣାଇଛନ୍ତି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ୍‌ ଶାହ। ସେହିପରି ରାଷ୍ଟ୍ରପତି ଶାସନକୁ ନେଇ ଭାଜପାକୁ ଶିବସେନା, ଏନ୍‌ସିପି ଏବଂ କଂଗ୍ରେସ ଟାର୍ଗେଟ କରୁଥିବାବେଳେ ଶାହ ଟୁଇଟରରେ ଏହାର ଜବାବ ରଖିଛନ୍ତି। ରାଷ୍ଟ୍ରପତି ଶାସନକୁ ସାମ୍ବିଧାନିକ ଓ ଯୁକ୍ତିଯୁକ୍ତ ଦର୍ଶାଇ ଏହାକୁ ନେଇ ବିରୋଧୀ ରାଜନୀତି କରୁଥିବା ସେ ସମାଲୋଚନା କରିଛନ୍ତି।
ସ୍ବରାଷ୍ଟ୍ରମନ୍ତ୍ରୀ ଶାହ କହିଛନ୍ତି, ମହାରାଷ୍ଟ୍ରରେ ମଧ୍ୟବର୍ତ୍ତୀକାଳୀନ ନିର୍ବାଚନ ସପକ୍ଷରେ ସେ ନାହାନ୍ତି। ଏବେ ସବୁ ଦଳ ପାଖରେ ସଂଖ୍ୟାଗରିଷ୍ଠତାର ପ୍ରମାଣ ଦେଇ ସରକାର ଗଠନ ଲାଗି ୬ ମାସ ସମୟ ରହିଛି। ମୁଖ୍ୟମନ୍ତ୍ରୀ ପଦବୀ ପାଇଁ ଭାଜପା ସହିତ ଚୁକ୍ତି ହୋଇଥିବା ନେଇ ଶିବସେନା ଅଧ୍ୟକ୍ଷ ଉଦ୍ଧବ ଠାକ୍‌ରେ କହୁଛନ୍ତି, ଯାହାକି ଭୁଲ କଥା। ଗୈରିକ ମେଣ୍ଟ କ୍ଷମତାସୀନ ହେଲେ ଦେବେନ୍ଦ୍ର ଫଡ୍‌ନବିସ ପୁଣି ମୁଖ୍ୟମନ୍ତ୍ରୀ ହେବେ ବୋଲି ପ୍ରଧାନମନ୍ତ୍ରୀ ଓ ସେ ନିଜେ ଅନୂ୍ୟନ ୧୦୦ ଥର ପୂର୍ବରୁ ସାଧାରଣରେ ପ୍ରକାଶ କରିଥିଲେ। ଶିବସେନା ସେତେବେଳେ ଚୁପ୍‌ ରହିଥିଲା। ଏବେ କାହିଁକି ମୁଖ୍ୟମନ୍ତ୍ରୀ ପଦ ଉପରେ ଦାବି ଉଠାଉଛି। ଆମେ ଜନାଦେଶ ପାଇଛୁ। କିନ୍ତୁ ଆମ ସହଯୋଗୀ ଏବେ ଏପରି ଦାବି କରୁଛି, ଯାହାକି ଆମ ପାଇଁ ଗ୍ରହଣୀୟ ନୁହେଁ ବୋଲି ଶାହ ସ୍ପଷ୍ଟ କରିଛନ୍ତି। ଅନ୍ୟପକ୍ଷରେ ରାଜ୍ୟପାଳ ଭଗତ ସିଂ କୋଶୟାରୀ ଅଧିକ ସମୟ ଦେଲେନାହିଁ ବୋଲି ତାଙ୍କ ବିରୋଧରେ ସୁପ୍ରିମକୋର୍ଟ ନ ଯିବା ପାଇଁ ଶିବସେନା ବୁଧବାର ନିଷ୍ପତ୍ତି ନେଇଛି। ରାଷ୍ଟ୍ରପତି ଶାସନ ଜାରି ହେବା ପରେ ରାଜ୍ୟରେ ରାଜନୈତିକ ସ୍ଥିତି ବଦଳିଥିବାରୁ ଦଳ ପିଟିଶନ ଦାଖଲ କରିବାକୁ ଚାହୁଁ ନ ଥିବା ଶିବସେନା ଓକିଲ ସୁନୀଲ ଫର୍ନାଣ୍ଡେଜ୍‌ କହିଛନ୍ତି। ଶିବସେନା ନେତା ସଞ୍ଜୟ ରାଉତ୍‌ ସୁସ୍ଥ ହୋଇ ମୁମ୍ବାଇର ଲୀଳାବତୀ ହସ୍ପିଟାଲରୁ ଘରକୁ ଫେରିଛନ୍ତି। ରାଜସ୍ଥାନର ଜୟପୁରସ୍ଥିତ ଏକ ହୋଟେଲରେ ଥିବା କଂଗ୍ରେସର ୪୪ ବିଧାୟକ ମହାରାଷ୍ଟ୍ରକୁ ବାହୁଡ଼ିଛନ୍ତି। ଶିବସେନା ସହ ମିଶି ସରକାର ଗଠନ ପାଇଁ ସେମାନେ ଦଳୀୟ ହାଇକମାଣ୍ଡଙ୍କୁ ଜଣାଇଦେଇଥିବା କହିଛନ୍ତି। କଂଗ୍ରେସ ନେତାଙ୍କ ସହ ମିଶି ସାଧାରଣ ସର୍ବନିମ୍ନ କାର୍ଯ୍ୟକ୍ରମ (ସିଏମ୍‌ପି) ଚୂଡ଼ାନ୍ତ କରିବା ଲାଗି ହେବାକୁ ଥିବା ମିଳିତ ବୈଠକକୁ ବାତିଲ କରାଯାଇଥିତ୍ବା ଏନ୍‌ସିପି ନେତା ଅଜିତ ପାଓ୍ବାର ସୂଚନା ଦେଇଛନ୍ତି। ଭାଜପାର ନବନିର୍ବାଚିତ ବିଧାୟକମାନଙ୍କ ବୈଠକ ଗୁରୁବାର ହେବ।