ନୂଆଦିଲ୍ଲୀ,୧୪-୧୦: ପଞ୍ଜାବ ଏବଂ ମହାରାଷ୍ଟ୍ର କୋଅପରେଟିଭ(ପିଏମ୍ସି) ବ୍ୟାଙ୍କରେ ଋଣ ଠକେଇ ପରେ ଏବେ ମହାରାଷ୍ଟ୍ରର ଆଉ ଏକ ବ୍ୟାଙ୍କରେ ଏଭଳି ଘଟଣା ସାମ୍ନାକୁ ଆସିଛି। ଶିବାଜୀ ରାଓ ଭୋସଲେ ସମବାୟ ବ୍ୟାଙ୍କରେ ପ୍ରାୟ ୩୦୦ କୋଟି ଟଙ୍କାର ଋଣ ଠକେଇ ମାମଲା ନଜରକୁ ଆସିବା ପରେ ମହାରାଷ୍ଟ୍ର ସରକାର ବ୍ୟାଙ୍କ ବୋର୍ଡ ଅଫ୍ ଡାଇରେକ୍ଟର୍ସଙ୍କୁ ବରଖାସ୍ତ କରିଛନ୍ତି। ବ୍ୟାଙ୍କର ପରିଚାଳନା ଲାଗି ନୂଆ ଆଡମିନିଷ୍ଟ୍ରେଟର ନିଯୁକ୍ତ କରାଯାଇଛି। ଭୂତ ଜମାକାରୀଙ୍କୁ ଋଣ ପ୍ରଦାନ କରାଯିବା ଫଳରେ ବ୍ୟାଙ୍କର ସ୍ଥିତି ବର୍ତ୍ତମାନ ସଙ୍କଟଜନକ ହୋଇଥିବା ଗଣମାଧ୍ୟମରେ ଖବର ପ୍ରକାଶ ପାଇଛି। ଏନ୍ସିପି ଏମ୍ଏଲ୍ଏ ଅନିଲ ଶିବାଜୀରାଓ ଭୋସଲେ ଏହାର ପ୍ରମୋଟର ରହିଛନ୍ତି। ବ୍ୟାଙ୍କର ଏଭଳି ସ୍ଥିତି ଯୋଗୁ ପ୍ରାୟ ୧ ଲକ୍ଷ ଜମାକାରୀ ଅସୁବିଧା ସ୍ଥିତିକୁ ଚାଲିଯାଇଛନ୍ତି। ଜମାକାରୀ ସେମାନଙ୍କ ଅର୍ଥ ଉଠାଣ କରିବାକୁ ସମର୍ଥ ହେଉ ନାହାନ୍ତି। ୨୦୧୯ ଏପ୍ରିଲରେ ରିଜର୍ଭ ବ୍ୟାଙ୍କ ଏହାର ବିଭିନ୍ନ ବ୍ୟବସ୍ଥାକୁ ଅଡିଟ କରିବା ପରେ ପରିଚାଳନାରେ ବିଭିନ୍ନ ଅନିୟମିତତା ହୋଇଥିବା ଜଣା ପଡିଥିଲା। ମହାରାଷ୍ଟ୍ରର ସମବାୟ କମିଶନର ରିଜର୍ଭ ବ୍ୟାଙ୍କର ପରାମର୍ଶ ନେବା ପରେ ବୋର୍ଡକୁ ବରଖାସ୍ତ କରାଯାଇଥିବା ଜଣାପଡିଛି।