ଅନୁଗୋଳ ଅଫିସ,୨୦।୫: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ପରିଚାଳନାଗତ ଅବ୍ୟବସ୍ଥା ଯୋଗୁ ଜଣେ ୪ ବର୍ଷର ଶିଶୁକନ୍ୟା ପ୍ରୀତି ଗୋଚ୍ଛାୟତଙ୍କ ମୃତଦେହରୁ ଦୁଇ ଆଖି ଗାଏବ ହେବା ନେଇ ଶୁକ୍ରବାର ଅଭିଯୋଗ ହୋଇଥିଲା। ତେବେ ଶନିବାର ଚିକିତ୍ସାଳୟରେ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ନିର୍ଦ୍ଦେଶକ ଡାକ୍ତର ଦିଲୀପ କୁମାର ଷଡ଼ଙ୍ଗୀ ପହଞ୍ଚି ଖୋଳତାଡ଼ ଆରମ୍ଭ କରିଛନ୍ତି। ସିଡିଏମ୍ଓଙ୍କ କାର୍ଯ୍ୟାଳୟରେ ସେ ମେଡିକାଲ ଉଚ୍ଚ ପଦସ୍ଥ ଅଧିକାରୀଙ୍କ ସହ ଆଲୋଚନା ଆରମ୍ଭ କରୁଥିବା ଜଣାପଡ଼ିଛି।
ପ୍ରକାଶଯୋଗ୍ୟ, ଚିକିତ୍ସାଳୟରୁ ମୃତ ଶିଶୁକନ୍ୟାଙ୍କ ଦୁଇ ଆଖି ଗାଏବ ହେବା ଜଣାପଡ଼ିବା ପରେ ମେଡିକାଲରେ ଉତ୍ତେଜନା ଲାଗିରହିଥିଲା। ଝିଅ ନାକରେ କ୍ଷତ ଚିହ୍ନ ରହିଛି। ତେଣୁ ଡାକ୍ତରଙ୍କ ସମ୍ପୃକ୍ତି ବିନା ଆଖି ତାଡ଼ି ନିଆଯିବା ସମ୍ଭବ ନୁହେଁ। ଏଥିରେ ଏକ ସ୍ବତନ୍ତ୍ର ର଼୍ୟାକେଟ୍ କାମ କରୁଥିବା ଝିଅ ପ୍ରୀତିଙ୍କ ମା’ ଶୀଲା ଗୋଚ୍ଛାୟତ ଅନୁଗୋଳ ଥାନାରେ ଅଭିଯୋଗ କରିଥିଲେ।