କଟକ ଅଫିସ, ୯ା୪: ଦେଶରେ ପ୍ରଥମ କରୋନାଜନିତ ଶିଶୁ ମୃତ୍ୟୁ ଖବର ମଙ୍ଗଳବାର ହସ୍ତଗତ ହୋଇଛି। ଗୁଜରାଟର ଜୁନାଗଡରେ ଏକ ୧୪ମାସର ଶିଶୁଠାରେ କରୋନା ଭୂତାଣୁ ଚିହ୍ନଟ ହେବା ପରେ ତାକୁ ଲାଇଭ ସପୋର୍ଟିଂ ସିଷ୍ଟମରେ ରଖି ଚିକିତ୍ସା କରାଯାଇଥିଲା। କିନ୍ତୁ ଡାକ୍ତରଙ୍କ ସମସ୍ତ ଚେଷ୍ଟା ସତ୍ତ୍ବେ ଶିଶୁଟିର ମୃତ୍ୟୁ ଘଟିଥିଲା। ଶିଶୁର ମାତାପିତା ଶ୍ରମିକ ଶ୍ରେଣୀର ଓ ସେମାନଙ୍କ କୌଣସି ଟ୍ରାଭେଲ ହିଷ୍ଟ୍ରି ନ ଥିଲା। ଏହାବ୍ୟତୀତ ସେମାନେ ବସବାସ କରୁଥିବା ଗଁ। ଲକ୍ଡାଉନ କରାଯାଇଥିଲା। ଏ ସବୁ ସତ୍ତ୍ୱେ ଶିଶୁଟି କିପରି ସଂକ୍ରମିତ ହେଲା, ତା’ର କାରଣ ନ ଜାଣି ପାରିବାରୁ ଡାକ୍ତରଙ୍କ ଚିନ୍ତା ବଢିଯାଇଛି।
ଏପରିସ୍ଥଳେ ଓଡ଼ିଶାର କୋଭିଡ ହସ୍ପିଟାଲଗୁଡ଼ିକରେ ଏଯାଏ ଶିଶୁଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଥିବା ଦେଖିବାକୁ ମିଳୁନାହିଁ। କାରଣ ଶିଶୁଙ୍କ ନିମନ୍ତେ ଏନଆଇସିୟୁ (ନିଓନେଟାଲ ଇଣ୍ଟେନସିଭ କେୟାର ୟୁନିଟ) ଏବଂ ପିଆଇସିୟୁ (ପେଡିଆଟ୍ରିକ ଇଣ୍ଟେନସିଭ କେୟାର ୟୁନିଟ)ରେ ମିଳୁଥିବା ସମସ୍ତ ସୁବିଧା ଏବଂ ପ୍ରାପ୍ତବୟସ୍କଙ୍କ ପାଇଁ ଉଦ୍ଦିଷ୍ଟ ଆଇସିୟୁ ମଧ୍ୟରେ ଅନେକ ପାର୍ଥକ୍ୟ ଥାଏ। ମୁଖ୍ୟତଃ ପ୍ରାପ୍ତବୟସ୍କଙ୍କ ପାଇଁ ଉଦ୍ଦିଷ୍ଟ ମନିଟର ପ୍ରୋବ, ଭେଣ୍ଟିଲେଟର, ଅକ୍ସିଜେନ ମାସ୍କ, ଭେନଫ୍ଲାମ ଆଦି ଶିଶୁଙ୍କ ଠାରେ ଲାଗି ପାରିବ ନାହିଁ। ସେହିପରି ଆହୁରି ଅନେକ ବୈଷୟିକ ବ୍ୟବସ୍ଥା ଯାହା ବଡ଼ଙ୍କ ପାଇଁ ଜରୁରୀ ତାହା ଶିଶୁଙ୍କ ନିମନ୍ତେ ଉପଯୋଗ ହୋଇପାରିବ ନାହିଁ। ତେଣୁ ଶିଶୁଙ୍କ ନିମନ୍ତେ କୋଭିଡ ହସ୍ପିଟାଲ ଆଇସିୟୁରେ ସ୍ବତନ୍ତ୍ର ଭାବେ କିଛି ଶଯ୍ୟା ସଂରକ୍ଷିତ ରଖି ଏସବୁ ବ୍ୟବସ୍ଥା ପ୍ରତି ଗୁରୁତ୍ୱ ଦିଆଯିବା ଦରକାର ବୋଲି କେତେଜଣ ଶିଶୁରୋଗ ବିଶେଷଜ୍ଞ ମତ ଦେଇଛନ୍ତି।